1 Aqivq jaqbheq juq-ol, milnee uqnee ngal nuljuq jaol nail bha Miqyail nail ganl salkhil khanq nail daoq cavq lee-u phao, naldaiq meeq nail daoq ge ge-ail cavq lee-a nail maq ngel-ail. Neenoeq neekha aol nail daoq ge ge-ail cavq-a nail iqsanl maq ngel-ail. 2 Ngal nuljuq nee mail jaol-u phao, lavqyavq kovtavq bhai khanqsil-a nail Yeiqsul Khali bhai taivq-ail heeq kivq naol dai, ngal noeqceiv-ai thaq nail ngaol. 3 Ngal nuljuq nee mail jaol-u phao, gaq teevq peivq-ail maq aol ail, geesil khi aqjuq juq juq-ail jaol-a nail ngaol. 4 Ngaq-i mail ge nail thail nail daoq juq khi daoq cavq cavq nail ganl neq, tsaol-aq yaq nail neenoeq neekha bhai juq khi jalmul mul lee-a nail maq ngel. Aqhaqlal Miqyail nail bhaqaoq bhi dov lal dai, nl lee-a nail teevq-eel ngaol. 5 Alheel ngel-i mail, nuljuq nail neema thaqtsaol nail phaq neq, tsaol-aq yaq nail neenoeq neekha nail kovtavq bhai ivq nail maq ngel-ail. Miqyail nail bhaqaoq kov-uvq bhai ivq nail ngaol.

6 Neema thaqtsaol nail phao gaq kav lal-a nail juq bhai nvjuq neenoeq neekha bhai tavq lai nail daoq saol bhiq nail ngaol. Thailhai ngaol-aoq, miltsaq nail neenoeq neekha bhai ge nail maq ngel. Peivq-ail boev-ail nia nail miltsaq khe heeqphaq juq nail neenoeq neekha bhai ge nail iqsanl maq ngel. 7 Oiltsail-ai thaq khi, daoqceevq navq deedee nail, Miqyail nail neenoeq neekha bhai nvjuq saol bhiq nail ngaol. Neenoeq neekha al bhaqda nee, ngadao juq seiqleiq khaoqsail ya dai, miltsaq niil maq teivq-u nee mail Miqyail-i mail noeqceiv-ai thaq nail ngaol. 8 Miltsaq kovtavq khe heeqphaq juq neq, neenoeq neekha niilniai maq heeq nia-ail. Aqyu juq heeq nia-ail nul neq, seiqleiq khaoqsail eeq nail Heeqphaq bhai lavqyavq kovtavq-ai maq tavq heivq-ail. 9 Jalliq lavqkhoel bhai gevq-ai thaq nail khe-ai,

gevq-ai thaq nail ngaol.

10 Miqyail neq, aivq nail Aqhaqlal bhai juq khi al juq ngadao bhai phaodaiq lavq nail ngaol. Khul khi mail dai ngal-aq neq, Aqhaqlal Miqyail neq, yaoq phaq yaoq-ao nee bhai halpov moel khi, Miqyail nail daoqceevq mao-ail navq nail juq bhai iqsanl halpov moel nail ngaol. 11 Tsaol-aq nail lavqkhoel bhai aol nail neema maq ngel nail neq, tsaol-aq bhai tavq nail juq bhai khaq sil gaq heeq nia nail-aiq. Alhai dul dai, Miqyail nail Aqhaqlal maq ngel nail neq, Miqyail bhai tavq nail juq bhai teevq gaq-ail maq heeq nia-ail. 12 Ngadao neq, miltsaq yaq nail neema ya-a nail maq ngel. Miqyail-i mail ngadao bhai bivq lavq-a nail juq iqsanl bhai heeq nia dai, Miqyail nee mail lee-a nail Aqhaqlal Miqyail bhai ya-a nail ngaol. 13 Nvjuq ganl al cavq-u phao, tsaol-aq nail neenoeq neekha bhai juq juq-ail cavq nail maq ngel. Aqhaqlal Miqyail cavq lavq nail khe-ai, cavq nail ngaol. Aqhaqlal phao khe ganl cavq-u phao, aqhaqlal phao tavq nail juq bhai juq juq-ail cavq bhiq cov bhiq nail ngaol. 14 Aqhaqlal Miqyail maq ya-a nail tsaol-aq khul gaq maqkhaiq, Miqyail nail Aqhaqlal bhai tavq nail juq bhai maq hav bhoel-ail. Khul khi mail dai ngal-aq neq, al juq neq, aivq nail haqbhoil neenoeq neekha maq aol nail juq pevq nail ngaol. Aqhaqlal phao taivq-ail al juq bhai tselpav khi gov heeq nia nail ngel-i mail, aivq al juq bhai maq gov heeq nia-ail. 15 Aqhaqlal phao noeq dov nia nail tsaol-aq, iqsanl bhai tselpav bhoilpav nia nail ngaol. Thailhai ngaol-aoq, tsaol-aq al gaq nail ganl bhai teevq gaq-ail maq tselpav nia-ail.

Thailhai ngaol-aoq, ngadao neq, Khali nail neema aol nail ngaol.