1 Nuljuq nail lavqkhoel, yaqyov-aq khi yaqmai-aq nail gaiqlaq bhai maq nl khaoq nail phaq nl thailthaiq nail ngaol dai, ngal ya gaiq-a nail ngaol. Maq nl khaoq nail al phaq neq, laolkivq yaq iqsanl maq nl khaoq nail phaq pevq nail ngaol. Al khul dai ngal-aq neq, nuljuq nail lavqkhoel khe teevq gaq yovqgavq nail aqbhu nail khaqma bhai bheeq-a nail ngaol. 2 Alhai nl thailthaiq khi ngaol-aoq, nuljuq neema eeq nail ngaol. Nuljuq noeqhaq heeq phaq-ail pevq nail, maq ngel-ail laiq. Nuljuq alhai nl thailthaiq nail tsaol-aq bhai nuljuq nail lavqkhoel nee the ha heeq phaq-ail tsaq nail ngaol. 3 Ngal nuljuq nee mail maq jaol khi ngaol-aoq, ngaq nail neema nuljuq nee mail jiav nail ngaol. Ngal nuljuq nee mail jaol nail khe-ai, alhai nl nail tsaol-aq bhai, niil aq-il iqsanl ngal dal bhiq nail ngaol. 4 Heeqphaq Yeiqsul nail aqmil kov-uvq nee nuljuq jil lai khi, ngaq nail neema iqsanl nuljuq nee mail jiav-u phao, Heeqphaq Yeiqsul nail bhaqaoq bhai juq juq-ail, niailhai nl yaoq. 5 Tsaol-aq al gaq, aqsivq haqjoil phao luq-ail seil-ail dai, neivq Saqdaq nail aqlavq lavqkhoel-ai av bhiq yaoq. Alhai nl haq neq, Heeqphaq Yeiqsul nail aqn n-gaol Miqyail aivq nail Aqhaqlal bhai hevqkovq bhiq-ail jaol-aq.

6 Nuljuq neema eeq nail maq meeq-ail. Deqtsiq micil teevq-eel ngaol-aoq, khaqmul teevq heeq heeq lao bhai bhi bhaonq lal nia nail ngaol dai, nuljuq maq heeq kivq-ail laiq. 7 Nuljuq deqtsiq maq aol nail khaqmul aqsivq teevq heeq pevq lal dai, deqtsiq aqlil oil haq yaoq. Maldil dai, ge haq neq, nuljuq deqtsiq maq aol nail khaqmul aqsivq pevq lal-a nail ngaol. Khul khi mail dai ngal-aq neq, Khali neq, ngadao nail haqbhoil laol bhiq-a nail Bhaqsaqkhaq yaol yaq pevq nail ngaol. 8 Alheel ngel-i mail, bhaoqaiq lav sav-u phao, haqeiv nail phaq khi aqjiivq aqcavq bhai tavq nail deqtsiq aqlil thaq oil bhoel. Deqtsiq maq aol nail meeq nail haol nail khi maldil tsaq nail khaqmul jaq bhel.

9 Khaqmiq sev nail tsaol-aq nee aqtsaoq thaq tsaoq-o dai, ngal nuljuq bhai haoqgavq gevq bhiq-a nail ngaol. 10 Ngal haoqgavq alhai gevq-ai lavq-a nail neq, yu nee mail bheeq nail juq bhai maqkhaiq, neekhaol jiav nail juq bhai maqkhaiq, yu nail yalkav khoiq khi kav jaq nail juq bhai maqkhaiq, thaoqphaoq aqma maolkhoel bhai uqhuq thaoq nail juq bhai maqkhaiq, alhai nl thailthaiq nail laolkivq yaq bhai aqtsaoq thaq tsaoq-o dai, ge movq nail maq ngel-ail. Alheel juq bhai aqtsaoq maq tsaoq haq neq, nuljuq miltsaq niil heeq nail lavqkhoel nee, ya dov ail nail ngaol. 11 Ngal ge movq nail neq, “Ngal Yeiqsul bhai neema thaqtsaol nail ngaol” dai, ge nail bhai, yu nee mail bheeq nail, neekhaol jiav nail, thaoqphaoq aqma maolkhoel bhai uqhuq thaoq nail, khal ge movq-ail ge nail, khaq mao iqsanl jilpheeq daol bov nail, yu nail yalkav bhai khoiq khi kav jaq nail, alheel nail tsaol-aq bhai aqtsaoq thaq tsaoq. Aqyu juq nee mail aoq iqsanl thaq jaq tavq dai, ngal nuljuq bhai gevq bhiq-a nail ngaol.

12 Yeiqsul bhai neema thaqtsaol nail munl nail lavqniil phao khe jaol nail tsaol-aq bhai yalkhaq dal nail, ngaq bhai khalhai tavq nail-aiq. Nuljuq iqsanl, Yeiqsul bhai neema thaqtsaol nail munl lavqkhoel bhai jaol nail tsaol-aq bhai yalkhaq dal nail, maq ngel-ail laiq. 13 Yeiqsul bhai neema thaqtsaol nail munl lavqniil phao jaol nail tsaol-aq bhai, Miqyail yalkhaq dal nail ngaol. Jalliq lavqkhoel bhai gevq-ai thaq nail khe-ai, “Haqeiv nail tsaol-aq bhai nuljuq nail lavqkhoel nee the ha yaoq.”