1 Aqbhu Miqyail neq, ngadao bhai khadai gaiq-a nail dai, saol-nvq daiq yaoq. Ngadao bhai Miqyail nail yaq dai, mil lavq-a nail ngaol. Ngadao neq, maldil aivq nail yaq ngaol. Miltsaq yaq juq aivq bhai maq heeq nia nail ngel-i mail, ngadao juq bhai iqsanl maq heeq nia-ail. 2 Ngal mailma-ail gaiq-a nail aqtsaoq juq-ol. Niil aq-il ngadao Miqyail nail yaq ngaol. Yaqhao ngadao khalhai pevq lal nail bhai maq phaodaiq lavq haq-al. Thailhai ngaol-aoq, Yeiqsul dov lee-u phao, ngadao aivq khe-ai pevq lal nail ngaol dai, heeq kivq nail ngaol. Khul khi mail dai ngal-aq neq, aivq khalhai pevq nail bhai ngadao bhaqlaoq kheq dai, ya moel nail ngaol. 3 Yeiqsul bhai alhai khal noeqthunq nail tsaol-aq yaoq gaq yaoq-ao nee mail, Yeiqsul haol nail khe-ai, tsaol-aq al juq iqsanl yovqgavq bhai yovqgavq ya bhi haol lal nail ngaol.

4 Oeqbal khal nl nail tsaol-aq yaoq gaq yaoq-ao nee mail, Miqyail nail aoldaoq kovqdaoq bhai nl bheeq-a nail ngaol. Oeqbal neq, aoldaoq kovqdaoq bhai nl bheeq-a nail phaq pevq nail ngaol. 5 Thailhai ngaol-aoq, nuljuq heeq nia nail khe-ai, ngadao nail oeqbal bhai oil ha nail dai khi, Yeiqsul lee-a nail ngaol. Aivq neq, oeqbal teevq peivq-ail maq aol-ail. 6 Yeiqsul nail lavqkhoel bhai jaol nail khul gaq maqkhaiq, oeqbal maq nl-ail*3.6 Oeqbal maq noeq pov dai, khaq mao iqsanl nl kovq ail nail tsaol-aq bhai ge movq nail ngaol.. Oeqbal nl nail tsaol-aq khul gaq maqkhaiq, aivq bhai maq phuq maq moel daiq-a nail tsaol-aq ngaol. 7 Ngaq nail yaq juq-ol. Tsaol-aq teevq gaq iqsanl nuljuq bhai maq ya hevq bheel-aivq dai, yaolphaol yaoq. Yeiqsul neq, tsaq nail daol nail gaq pevq nail khe-ai, aqtsaq aqdaol daol dai, khal nl nail khul gaq maqkhaiq, tsaq nail daol nail tsaol-aq ngaol. 8 Oeqbal khal nl nail tsaol-aq neivq heeqphaq nail yaq ngaol. Khul khi mail dai ngal-aq, neivq heeqphaq neq, iqmoeq-u nee mail oeqbal nl-a nail ngaol. Alheel ngel-i mail, neivq heeqphaq nl nail hal nail phaq bhai lav cov nail dai khi, Miqyail nail Yaqyov dov lee-a nail ngaol. 9 Miqyail nail yaq pevq lal-a nail juq neq, oeqbal maq nl-ail. Khul khi mail dai ngal-aq, Miqyail nail aqiq aqyu juq nail lavqkhoel bhai doevq nail ngaol. Aqyu juq Miqyail nail yaq pevq nail ngel-i mail, oeqbal maq nl-ail. 10 Alheel ngel-i mail, Miqyail nail yaq khi mail neivq heeqphaq nail yaq bhai, aqmeeq-ai tselpav kivq nail ngaol. Aqtsaq aqdaol daol dai maq khal nl nail tsaol-aq, Miqyail nail yaq maq ngel-ail. Alhai dul dai, Yovqgavq nail aqivq jaqbheq bhai maq gaiq-a nail tsaol-aq iqsanl, Miqyail nail yaq maq ngel-ail.

11 “Nuljuq teevq gaq nee teevq gaq gaiq-a yaoq” dai, ge-ai thaq nail daoq al daoq bhai, iqmoeq-u nee mail nuljuq ya gaiq-a nail ngaol. 12 Haqeiv nail gaq nail yaq khe-ai dul nail Gaqilnav†3.12 Gaqilnav khi mail Aqbheiqlal neq, Aqdaq khi Eilbav nail yaqyov ngaol. khe-ai thaq nl. Aivq neq, aivq nail jaqbheq Aqbheiqlal bhai heivq-a nail ngaol. Khul khi mail heivq-a nail dai ge haq neq, aivq-i mail nl-a nail phaq neq, haqeiv nail phaq pevq khi, aivq nail jaqbheq-i mail nl-a nail phaq neq, tsaq nail daol nail ngel-i mail, heivq-a nail ngaol. 13 Aqivq jaqbheq juq-ol, miltsaq yaq nuljuq bhai neejiav jiav nail bhai, noeq-u maq dov dai, thaq pevq-ail. 14 Ngadao neq, sil nail phaq nail lavqkhoel nee dov ail khi, aqdoevq doevq nail phaq nail lavqkhoel aol lai-a nail ngaol. Khalhai khi heeq lal nail dai ge haq neq, aqivq jaqbheq juq bhai gaiq-a nail ngel-i mail ngaol. Goil nail gaiq-a nail phaq maq nl dol leevq nail gaq neq, sil nail phaq nail lavqkhoel bhai jaol-ai haq nail ngaol. 15 Yovqgavq nail aqivq jaqbheq bhai neejiav jiav nail tsaol-aq yaoq gaq yaoq-ao nee tsaol-aq bhai heivq gaq-ao nail khe-ai dul nail ngaol. Tsaol-aq bhai heivq nail khul gaq maqkhaiq, aivq nail lavqkhoel bhai nqmaq maqluv halyeel doevq nail phaq maq aol-ail dai, nuljuq heeq nia nail ngaol. 16 Khali neq, ngadao nail haqbhoil yeeldan-a nail ngel-i mail, ngadao goil nail gaiq-a nail phaq bhai heeq kivq lal-a nail ngaol. Ngadao iqsanl aqivq jaqbheq juq nail haqbhoil yeeldan heeq phaq-ail tsaq nail ngaol. 17 Thailhai ngaol-aoq, tsaol-aq khul gaq maqkhaiq, miltsaq kovtavq khe phul heel ildaoq maoqgaiq jiav khi, aivq nail aqivq jaqbheq haq nail aoq nail bhai moel-u phao, gaoqhaq gaiq-a nail neema maq aol haq neq, Miqyail nail goil nail gaiq-a nail phaq aivq nail lavqkhoel bhai aol nia naol laiq. 18 Ngaq nail yaq juq-ol, moeqthaoq-i mail ge khi taivq-ail thaq gaiq-a, nl nail hal nail lavqkhoel nee, maldil goil nail gaiq-a nail phaq bhi dov lal yaoq.

19-20 Ngadao alhai gaiq-a haq neq, maldil tsaq nail phaq bhai tavq nail ngaol dai, ya heeq kivq nail ngaol. Ngadao alhai gaiq-a nail ngel-i mail, ngadao nail neema ngadao nail kovtavq bhai oeqbal teevq phaq ganav thaq haq neq, Miqyail nail sivtavq bhai ngadao neema sal lal nia nail ngaol. Khul khi mail dai ngal-aq Miqyail neq, ngadao nail neema nee maqtsil eeq khi, iqsanl bhai heeq nia nail ngaol.

21 Ngal mailma-ail gaiq-a nail aqtsaoq juq-ol, ngadao nail neema ngadao nail kovtavq bhai oeqbal maq thaq haq neq, Miqyail nail sivtavq bhai neema ivqdao dai, jiav nail ngaol. 22 Aivq-i mail bivq-ai thaq nail daoq juq bhai ngadao naldaiq khi, aivq neema tsaq nail khe-ai, nl haq neq, aivq bhai hal nail khe-ai, ngadao ya nail ngaol. 23 Aivq-i mail bivq-ai thaq nail daoq neq, niailhai ngaol. Aivq nail Yaqyov Yeiqsul Khali bhai ngadao neema thaqtsaol khi, Yaqyov-i mail daoq bivq thaq-ail ceevq-a nail khe-ai, teevq gaq nee teevq gaq ya gaiq-a nail ngaol. 24 Miqyail-i mail bivq thaq-ail ceevq-a nail daoq bhai naldaiq nail tsaol-aq, aivq nail lavqkhoel bhai jaol khi, aivq iqsanl tsaol-aq al gaq nail lavqkhoel bhai jaol nail ngaol. Aivq ngadao nail lavqkhoel bhai jaol nail ngaol dai, ngadao niailhai heeq kivq nail ngaol. Aqhaqlal Miqyail ngadao nail lavqkhoel bhai bhi jaol lee-a nail ngaol.