1 Bheiqtuvluv
Gevq-a nail gaq
Haoqgavq niil keiv iqmoeq ilmoeq bhai Gaqkhoel Bheiqtuvluv aivq-i mail gevq-a nail ngaol dai, gevq-ai thaq nail ngaol. Al ovqtavq, milnee uqnee khe Khali yaq juq iqsanl Bheiqtuvluv-i mail gevq-a nail ngaol dai, noeq nail ngaol. Bheiqtuvluv nail aqmil neq, iqmoeq-u phao Silmoq dai, mil nail ngaol. Daoqceevq neq, naldaiq nail gaq dai, ge movq nail ngaol. Thailhai ngaol-aoq, haoqnao Heeqphaq Yeiqsul-i mail Geiqphal dai, mil phal bhiq-a nail ngaol. Daoqceevq neq, lovmav dai, ge movq nail ngaol. Bheiqtuvluv dai mil nail neq, Heiqlaqsal daoq pevq khi, daoqceevq neq, Geiqphal khe-ai lovmav dai, ge movq nail ngaol. Aivq nail jaqbheq Aqdaiqlaiq dai mil khi, aivq nail aqbhu neq, Yaolnav dai mil nail ngaol. Heeqphaq Yeiqsul nail gaqkhoel maq jiovq lal-u phao, Yaolhaq khi mail Yaqkov khe-ai, delgil nieivq jaq-a nail tsaol-aq ngaol.
Gevq-a nail aqyanq khi mail aqduq
Gevq-a nail aqyanq neq, A.D. 64 kovq niidai bhai gevq-a nail ngaol. Gevq-a nail aqduq neq, Lolmav meenq bhai ngaol dai, noeq nail ngaol. 1 Bheiqtuvluv nail haoqgavq bhai ge daiq-u phao, Bheiqtuvluv neq, Paolluv-i mail gevq-a nail 1 Tilmolseiq, Lolmav, Eilpheilsu, Pillilpiv khi mail Yaqkov haoqgavq bhai heeq nia nail khe-ai, gevq-ai thaq nail ngaol. Bheiqtuvluv neq, heeqphaq Neiqlol uvthaiq nail tsel hail kovq teevq kovq A.D. 67-68 kovq nii dai bhai uqhuq thaoq pov phaq-ail bhi tavq heivq-a nail ngaol, noeq nail ngaol.
Khaq sil gaq bhai gevq bhiq-a nail
Haoqgavq niil keiv neq, khoeq nail jiovq nail bhai ya daq-a nail ngel-i mail, teevq gaq teevq phao tsaoq pav tsaoq sal-aivq khi jaol nail Miqyail-i mail tsel dov-ai thaq nail tsaol-aq bhai gevq bhiq-a nail ngaol.
Khul bhai noeqthunq khi gevq-a nail
Haoqgavq niil keiv neq, Khali yaq juq khoeq nail jiovq nail phaq bhai thaoqphuq-u phao, neema ivq khi, Heeqphaq Yeiqsul bhai noeqthunq khi aqmeeq-ai daq nia dai, gaq bivq-a nail ngaol.
Al ovqtavq, hevqkovq nail phaq bhai neema thaqtsaol nail phaq maq bhi laiq-ail dai, Miqyail neema tsaq nail khe-ai, khalhai ya doevq ya nl nail dai iqsanl, cavq bhiq cov bhiq nail haqbhoil gevq-a nail haoqgavq ngaol.
1
Iqmoeq ilmoeq khe daoq
Ngal neq, Yeiqsul Khali nail Gaqkhoel Bheiqtuvluv ngaol. Gaoq ail gail ail khi, Bhaoqthul milkhaoq, Gaqlaqtil milkhaoq, Gaqbhaqdaolciv milkhaoq, Aqsil-aq milkhaoq khi Bheiqthulnil milkhaoq bhai daq-i jiovq khi jaol ail-a nail Miqyail-i mail tsel dov-ai thaq nail tsaol-aq bhai haoqgavq niil gevq bhoel-ai leevq-a nail ngaol. Yeiqsul Khali nail daoq bhai naldaiq dai maqkhaiq, aivq nail aqsivq nuljuq nail kovtavq bhai hoeldav dai maqkhaiq, iqmoeq-u nee mail Aqbhu Miqyail heeq nia khi noeqceiv-ai thaq nail khe-ai, nuljuq bhai tsel dov-ai thaq nail ngaol. Al ovqtavq, aivq nail Aqhaqlal-i mail nuljuq bhai bhi meeq bhi haol lal-a nail ngaol. Geeqlaoq eeljaol khi neesal-ovq nail phaq nuljuq nail lavqkhoel bhai bhi mao lal dei-eiq.
Noeqthunq duq jiav lal-a nail ganl
Ngadao nail Heeqphaq Yeiqsul Khali nail Aqbhu Miqyail bhai tsiqeeq bhel. Khul khi mail dai ngal neq, aivq gaoqhaq gaiq-a nia deedee nail bhaqda nee, Yeiqsul Khali sil khi doevq kovq lal nail ngel-i mail, ngadao bhai doevq yeel aqsivq bivq lavq-a nail ngaol. Alheel ngel-i mail, ngadao aqdoevq doevq nail noeqthunq nail phaq ya-a nail ngaol. Al ovqtavq, ngadao Miqyail nail jaiqbhoil ovq nail tsaol-aq pevq lal-a nail ngaol. Maq cov-ail nia nail, maq jiiv maq cavq-ail nia nail, maq khuq-ail nia nail jaiqbhoil al bhai Miqyail nuljuq nail haqbhoil nqtavq kovtavq bhai lainq-ai thaq nail ngaol. Nuljuq neema thaqtsaol nail ngel-i mail, haoqnao naosaq n-gaol phaodaiq lavq nail hevqkovq nail phaq bhai ya nail aqyanq bhai kev dai, Miqyail aivq nail bhaqaoq lavqkhoel nee heldaiq phail lavq nail ngaol. Alheel ngel-i mail, nuljuq niil aq-il teevq yanq nail lavqkhoel haq nail aoq nail khi laonqdaiq nail phaq bhai ya daq khi ngaol-aoq, lavqkhiq tsail yaoq. Heel bhai miqjaq nee tsaotsel daiq nail khe-ai, haq nail aoq nail niil juq, nuljuq-i mail neema thaqtsaol nail phaq bhai laonqdaiq nail ngaol. Nuljuq-i mail neema thaqtsaol nail phaq neq, peivq-ail boev-ail nia nail heel nee maqtsil aqphoiq phoiq jaiq nail ngaol. Nuljuq nail neema thaqtsaol nail phaq laonqdaiq nail phaq bhai ya daq khi ngaol-aoq, ivqdao dai jiav haq neq, Yeiqsul Khali dov lee-u phao, aivq-i mail tsiqeeq lavq nail bhai maqkhaiq, seiqleiq khaoqsail bivq lavq nail bhai maqkhaiq, thaqeeq thaqheel lavq nail bhai maqkhaiq, ya nail ngaol. Nuljuq aivq bhai maq moel daiq khi ngaol-aoq, aivq bhai gaiq-a nail ngaol. Nuljuq niil aq-il aivq bhai maq ya moel khi ngaol-aoq, aivq bhai neema thaqtsaol nail ngel-i mail, maq ge gil tsaol nail seiqleiq khaoqsail nee bhee nail lavqkhiq tsail nail phaq nuljuq nail lavqkhoel bhai aol nail ngaol. Khul khi mail dai ngal neq, nuljuq Yeiqsul bhai neema thaqtsaol nail bhaqda nee, hevqkovq nail phaq ya gaq-ao nail ngaol.
10 Hevqkovq nail niilniai Miqyail nail haqbhoil gedan nail juq aqmeeq-ai halpov khi tsaotsel daiq-a nail ngaol. Miqyail nuljuq bhai geeqlaoq eeljaol bivq-a nail ganl, milnee uqnee nee aqyu juq daoq cavq cavq-a nail ngaol. 11 Khali ya haq ya aoq khi, yaqhao aivq seiqleiq khaoqsail ya nail ngaol dai, aqyu juq nail lavqkhoel bhai aol nail Khali nail Aqhaqlal aqyu juq bhai bhi heeq nia-a nail ngaol. Alheel ngel-i mail, khul yanq bhai khalhai pevq lal nail bhai heeq nia dai, tsaotsel-a nail ngaol. 12 Aqyu juq ganl al gedan-u phao, yovqgavq nail haqbhoil yovqgavq ganl nl nail maq ngel-ail. Nuljuq nail haqbhoil nl nail ngaol dai, Miqyail aqyu juq bhai phaodaiq bhiq-a nail ngaol. Aqyu juq-i mail gedan-a nail ganl al, niil aq-il, nqtavq nee mail bhi lee-a nail Meeqnail Haolnail Aqhaqlal lavqkhoel nee, gaqkhoel juq nuljuq bhai cavq lavq-a nail ngaol. Cavq lavq-a nail al neq, lavqkhiq tsail nail geeqlaoq daoq ngaol. Nqtavq gaqkhoel iqsanl, al juq bhai moel movq deedee nail ngaol.
Aqmeeq aqhaol haol dai, doevq yaoq
13 Alheel ngel-i mail, neema lavqkhoel bhai aqmeeq-ai lainq khi, neema bhai gaq lai dai doevq yaoq. Yeiqsul Khali dov lee-u phao, aivq-i mail nuljuq bhai bivq lavq nail geeqlaoq eeljaol bhai aqmeeq-ai noeqthunq yaoq. 14 Aq-u phao, nuljuq khul teevq phaq iqsanl maq heeq nia nail ngel-i mail, yovqgavq nail aqsivq haqjoil nail neekhaol nee doevq-a nail ngaol. Niil aq-il alhai thaq gaoq doevq. Daoq naldaiq nail yaq khe-ai doevq yaoq. 15 Nuljuq bhai khul-a nail Miqyail meeq nail haol nail khe-ai, nuljuq iqsanl aqmeeq aqhaol haol dai doevq yaoq. 16 Khul khi mail dai ngal neq,
“Ngal aqmeeq aqhaol ngel-i mail, nuljuq iqsanl ya meeq ya haol nail ngaol” dai,
Jalliq lavqkhoel bhai gevq-ai thaq nail ngaol.
17 Nuljuq geeqlaoq hal-u phao, Miqyail bhai “Aqbhu-ol” dai, khul nail ngaol. Aivq neq, maivphaoq eeq nil maq tsel-ail, teevq gaq khai-aq teevq gaq-i mail nl-a hal-a nail bhai heldaiq khi dal bhiq nail ngaol. Alheel ngel-i mail, nuljuq miltsaq kovtavq bhai daq-i jiovq-u phao, aivq bhai ev ev-ail doevq yaoq. 18 Aqphiq aqbhal juq-i mail thaoq khal leevq-a nail aol juq bhai ya jel-ail dai, aivq nuljuq bhai ul kovq lavq-a nail ngaol. Peivq-ail boev-ail nia nail phul heel bhai juq khi ul kovq lavq-a nail maq ngel-ail dai, nuljuq heeq nia nail ngaol. 19 Aqphoiq phoiq deedee nail Khali nail aqsivq-i mail ul kovq lavq-a nail ngaol. Khali neq, malbavq maq daol nail nee ovqtavq, aqjiivq aqcavq phaq teevq peivq-ail maq aol nail yaolyaq khe-ai dul nail ngaol. 20 Aivq alhai pevq lal dai, miltsaq maq teivq-u nee mail Miqyail aivq bhai tsel dov-ai thaq nail ngaol. Haoqnao naosaq khe aqyanq niil nail lavqkhoel-ai, Miqyail aivq bhai nuljuq nail haqbhoil bhi dov lee-a nail ngaol. 21 Khali bhaqda nee nuljuq Miqyail bhai neema thaqtsaol nail ngaol. Miqyail aivq bhai bhi doevq kovq lal khi, seiqleiq khaoqsail bivq-a nail ngaol. Alheel ngel-i mail, nuljuq Miqyail bhai neema thaqtsaol khi noeqthunq nail ngaol.
22 Nuljuq maldil tsaq nail phaq bhai naldaiq-a nail ngaol. Alheel ngel-i mail, aqivq jaqbheq Khali yaq juq bhai maldil gaiq-a kivq dai, nuljuq nail neema meeq lal haol lal-a nail ngaol. Nuljuq neema lavqkhoel bhai kev dai, teevq gaq nee teevq gaq gaiq-a yaoq. 23 Nuljuq neq, aqsivq doevq phal lal-aoq nail ngaol. Luq-ail seil-ail nia nail tsaol-aq bhaqda nee doevq phal lal-a nail maq ngel-ail. Maq luq maq seil-ail nia nail Miqyail nail daoq bhaqda nee doevq phal lal-a nail ngaol. Daoq al daoq neq, doevq khi ivq nail ngaol. 24 Khul khi mail dai ngal-aq neq,
“Tsaol-aq iqsanl mail
moeqgaq khe-ai
dul nail ngaol.
Aqyu juq nail
khaoqsail iqsanl
moeqgaq aqeiv khe-ai
dul nail ngaol.
Moeqgaq neq,
khuq-ail kov-ail khi,
aqeiv iqsanl
ga kha ail nail ngaol.
25 Thailhai ngaol-aoq,
Miqyail nail
daoq neq,
nqmaq maqluv
halyeel ivq nail ngaol” dai,
ge-ai thaq nail ngaol.
Daoq al daoq neq, nuljuq bhai cavq bhiq-a nail lavqkhiq tsail nail geeqlaoq daoq al daoq ngaol.