1 Tilmolseiq
Gevq-a nail gaq
Haoqgavq niil keiv iqmoeq ilmoeq bhai Gaqkhoel Paolluv aivq-i mail gevq-a nail ngaol dai, gevq-ai thaq nail ngaol. Al ovqtavq, milnee uqnee khe Khali yaq juq jemao iqsanl, Paolluv-i mail gevq-a nail ngaol dai, noeq nail ngaol.
Gevq-a nail aqyanq khi aqduq
Gevq-a nail aqyanq neq, A.D. 62-64 kovq bhai ngaol. Gevq-a nail aqduq neq, Maqgeiqdaolnil milkhaoq bhai ngaol. Paolluv Lolmav meenq nail thaonq bhai nvq pov teevq pov maq bhi nieivq bhoel dan-u nee mail, gevq-a nail ngaol.
Khaq sil gaq bhai gevq bhiq-a nail
Haoqgavq niil keiv neq, Tilmolseiq bhai gevq bhiq-a nail ngaol. Tilmolseiq neq, Luldaqlal meenq yaq ngaol. Tilmolseiq dai ge nail daoqceevq neq, Miqyail bhai tsiqeeq tsiqheel nail dai, ge movq nail ngaol. Aivq nail aqma neq, Khali yaq pevq nail Yuldav tsaol-aq Ulnil dai mil khi, aivq nail aqbhu neq, Heiqlaqsal tsaol-aq ngaol. Aivq yaqnoil-ail jiav-u nee mail Jalliq aqlil heeq nia nail ngaol. Yuldav tsaol-aq nee mail ganl nl tavq nia dai Paolluv-i mail bavkov uqjaq oev bhiq-a nail ngaol. Tilmolseiq neq, gaqkhoel tsel nvq gaq nail lavqkhoel bhai maq aol-ail. Aivq neq, Khali yaq munl juq bhai heldaiq phail khi Paolluv bhai ganl nl tsao bhiq nail teevq gaq ngaol.
Khul bhai noeqthunq khi gevq-a nail
Haoqgavq niil keiv neq, Paolluv-i mail Tilmolseiq bhai, Eilpheilsu meenq khe Khali yaq munl bhai heldaiq phail nail juq khalhai ya tsel dov khi, ya heldaiq phail nail dai, gevq bhiq-a nail ngaol. Khul khi mail dai ngal-aq, yanq al yanq bhai neema thaqtsaol nail phaq maq dul lai nail ganl cavq bheeq nail tsaol-aq dov lal-a nail ngaol. Alheel ngel-i mail, Khali yaq juq aqdoevq khalhai ya doevq khi Miqyail nail ganl nl yaq juq khalhai ya nl nail dai, gevq bhiq-a nail ngaol.
1
Iqmoeq ilmoeq khe daoq
1 Ngal neq, Yeiqsul Khali nail gaqkhoel Paolluv ngaol. Ngadao nail Hevqkovq nail gaq pevq nail Miqyail khi ngadao nail noeqthunq duq pevq nail Yeiqsul Khali daoq bivq lavq-a nail khe-ai, gaqkhoel jiovq thailthaiq nail ngaol.
2 Neema thaqtsaol nail phao ngaq nail yaqyov maldil pevq nail Tilmolseiq bhai haoqgavq niil gevq bhoel-ai leevq-a nail ngaol. Aqbhu Miqyail khi ngadao nail Heeqphaq Yeiqsul Khali nail geeqlaoq eeljaol, gaoqhaq gaiq-a nia nail phaq khi neesal-ovq nail phaq, naoq nail kovtavq bhai bhi jiav dei-eiq.
Maq dul lai nail neema thaqtsaol nail phaq bhai thaq gaoq cavq dai, daoq bivq yaoq
3 Ngal Maqgeiqdaolnil milkhaoq bhai lai nail dai khi-u phao, “Eilpheilsu meenq bhai jaol-ail ceevq yaoq” dai, naoq bhai hal-a nail ngaol. Maq tsaq nail phaq bhai, tsaol-aq teevq pav ganav juq bhai daoq bhi bivq nail dai khi, ngal naoq bhai bhi jaol-ail ceevq-a nail ngaol. 4 Al ovqtavq, ganqje juq bhai maqkhaiq, teevq thal-iq ge gil lai nail maq bhao nail aqceevq ge nail juq bhai maqkhaiq, thaq thaqeeq dei-eiq dai, aqyu juq bhai daoq bhi bivq nail dai khi iqsanl, ngal naoq bhai bhi jaol-ail ceevq-a nail ngaol. Ganl al juq neq, Miqyail-i mail bivq lavq-a nail neema thaqtsaol nail phaq bhai maq bhi dov lal-ail. Jil pheeljaq nail phaq taivq-ail bhi dov lal nail ngaol. 5 Naol aqyu juq bhai daoq alhai bivq-a nail bhaqda nee, aqyu juq goil nail gaiq-a nail phaq aol lal dai, ngal noeqthunq nail ngaol. Goil nail gaiq-a nail niil phaq neq, neema aqhaol haol dai, oeqbal thaq duq maq jiav nail heeq nia nail neema khi maldil neema thaqtsaol nail neema lavqkhoel nee dov lal nail ngaol. 6 Tsaol-aq teevq pav ganav juq neq, al hail phaq bhai khaonq-ail ceevq khi, khul nail ganl maq tsoiq nail juq bhai taivq-ail ge thailthaiq nail ngaol. 7 Aoldaoq kovqdaoq cavq nail cov nail tsaol-aq jiovq movq khi ngaol-aoq, aqyu juq khalhai ge nail bhai maqkhaiq, neema eeq eeq-ail ge nail juq bhai maqkhaiq, aqyu juq maq heeq nia-ail.
8 Aoldaoq kovqdaoq neq, aqtsaq tsaq dai, yuq ha neq, aqmeeq ngaol dai, ngadao heeq kivq nail ngaol. 9 Tsaq nail daol nail tsaol-aq nail haqbhoil aoldaoq kovqdaoq bhi jiav-a nail maq ngel-ail. Maq meeq maq jaq nail phaq nl nail tsaol-aq, daoq maq naldaiq nail tsaol-aq, Miqyail bhai maq ev nail tsaol-aq, oeqbal nl nail tsaol-aq, maq meeq maq haol nail tsaol-aq, Miqyail nail aol bhai maq ev nail tsaol-aq, aqbhu aqma bhai heivq nail tsaol-aq, yu bhai lav heivq nail tsaol-aq, 10 khaqmiq sev nail tsaol-aq, yaqyov-aq aqtsaoq gaiqlaq bhai maq nl khaoq nail phaq nl nail tsaol-aq, tsaol-aq bhai gaoq nail tsaol-aq, goiqbhaoq bhaoq nail tsaol-aq, goiqbhaoq bhaoq nail lavqkhoel nee salkhil khanq nail tsaol-aq, maldil tsaq nail ganl cavq nail cov nail phaq bhai lav tsoiq nail tsaol-aq, maq meeq nail yaoq phaq yaoq-ao nee nl nail tsaol-aq niil juq nail haqbhoil aoldaoq kovqdaoq bhi jiav-a nail ngaol dai, ngadao heeq kivq nail ngaol. 11 Maldil tsaq nail ganl al, geeqlaoq eeq nail Miqyail-i mail av lavq-a nail seiqleiq khaoqsail eeq nail lavqkhiq tsail nail geeqlaoq daoq lavqkhoel nee, dov lee nail ngaol.
Paolluv gaoqhaq gaiq-a lavq-a nail Miqyail bhai geeqlaoq eeq kovq nail ganl
12 Ngal ngadao nail Heeqphaq Yeiqsul Khali bhai tsiqeeq naol. Khul khi mail dai ngal neq, aivq ngaq bhai gaq bivq lavq-a nail ngaol. “Naol saljial ivq nail ngel-i mail, ngaq nail ganl nl nia-ail nial” dai, aivq ngaq bhai saol-nvq-ai thaq khi, tsel dov lavq-a nail ngaol. 13 Jel lal-u phao, ngal Yeiqsul bhai khal ge movq-ail ge-a nail, aivq bhai neema thaqtsaol nail tsaol-aq juq bhai khoeq bhiq jiovq bhiq khi haqeiv nail gaq pevq-a nail ngaol. Thailhai ngaol-aoq, ngal neema maq thaqtsaol lal-u phao, maldil tsaq nail phaq bhai maq heeq kivq-ail nl-a nail ngel-i mail, aivq ngaq bhai gaoqhaq gaiq-a lavq nail ngaol. 14 Yeiqsul Khali nail lavqkhoel bhai aol nail neema thaqtsaol nail phaq khi goil nail gaiq-a nail phaq nee teevq gaq khe-ai, ngadao nail Heeqphaq Miqyail nail geeqlaoq eeljaol iqsanl, maq ge gil tsaol dai, ngal ya-a nail ngaol.
15 Yeiqsul Khali neq, oeqbal yaq bhai hevqkovq lee nail dai khi, miltsaq kovtavq-ai lee-a nail ngaol dai, ge-ai thaq nail daoq niil daoq neq, saljial ivq khi, maldil hav bhoel heeq phaq-ail tsaq nail daoq ngaol. Ngal neq, oeqbal yaq nail lavqkhoel yu nee maqtsil oeqbal eeq nail gaq ngaol. 16 Thailhai phal-iq neq, Yeiqsul Khali khadai oltsaol nail ngel-ail dai, aivq phaodaiq bhiq movq nail ngel-i mail, ngal yu nee maqtsil oeqbal eeq khi ngaol-aoq, aivq ngaq bhai gaoqhaq lavq-a nail ngaol. Alheel ngel-i mail, aivq bhai neema thaqtsaol nail bhaqda nee nqmaq maqluv halyeel doevq nail phaq ya nail tsaol-aq nail haqbhoil ngal neq, saol oil duq ngaol. 17 Miqyail neq, nqmaq maqluv halyeel uvthaiq nail Heeqphaq ngaol. Aivq neq, maq luq maq seil-ail nia-ail. Tsaol-aq aivq bhai maq moel nia-ail. Aivq teevq gaq taivq-ail Miqyail ngaol. Nqmaq maqluv halyeel aivq bhai tsiqeeq tsiqheel khi, seiqleiq khaoqsail bhi jiav dei-eiq. Aqmiq.
18-19 Ngaq nail yaqyov Tilmolseiq-ol, aq-u phao, Miqyail nail haqbhoil gedan nail tsaol-aq juq neq, Aqhaqlal Miqyail bhai juq khi naoq nail ganl ge-ai thaq nail khe-ai, ngal naoq bhai daoq niailhai bivq nail ngaol. Neema thaqtsaol nail phaq bhai nieivq thaiq-ai thaq khi, oeqbal thaq duq maq jiav nail heeq nia nail neema aol nail lavqkhoel, aq-u phao ge-ai thaq nail al juq bhai juq juq-ail khi, genl aqmeeq-ail dev yaoq. Tsaol-aq teevq pav ganav juq neq, oeqbal thaq duq maq jiav nail heeq nia nail neema bhai khaonq-ail ceevq-a nail ngel-i mail, laovq cov ail-a nail khe-ai, aqyu juq nail neema thaqtsaol nail neema cov ail-a nail ngaol. 20 Huqmiqnail khi mail Aqleiqsaqdul iqsanl, cov ail-a nail tsaol-aq al juq nail lavqkhoel bhai aol nail ngaol. Miqyail bhai khal ge movq-ail maq ya ge-ail dai, aqyu nvq gaq bhai cavq bhi cov bhiq movq nail ngel-i mail, ngal aqyu nvq gaq bhai neivq Saqdaq nail aqlavq lavqkhoel bhai av bhiq-a nail ngaol.