1 Alheel ngel-i mail, ngal nuljuq bhai maq bhi noeqhaq nail haqbhoil nuljuq jaol nail bha maq lee yaoq-aol dai, ngal noeqceiv-ai thaq nail ngaol. 2 Ngal nuljuq bhai bhi noeqhaq haq neq, kha sil gaq ngaq bhai bhi noeqsal lal nia nail-aiq. Ngaq-i mail bhi noeqhaq-a nail tsaol-aq taivq-ail, ngaq bhai bhi noeqsal lal nia nail ngaol. 3 Alheel ngel-i mail, ngal nuljuq bhai haoqgavq al gevq bhoel-ai leevq-a nail ngaol. Ngal kev lee-u phao, ngaq bhai lavqkhiq bhi tsail lal nail tsaol-aq juq, ngaq bhai maq ya bhi noeqhaq lavq dai, gevq bhoel-ai leevq-a nail ngaol. Ngal lavqkhiq tsail haq neq, nuljuq iqsanl mail lavqkhiq tsail nail ngaol dai, nuljuq iqsanl nail neema bhai ngal heeq kivq nail ngaol. 4 Khul khi mail dai ngal-aq neq, noeqhaq deedee nail, khaoqlaol nail khi, maivbhil dov nail lavqkhoel nee, ngal nuljuq bhai haoqgavq al gevq bhoel-ai lavq-a nail ngaol. Nuljuq bhai bhi noeqhaq nail dai khi, gevq bhoel-ai lavq nail maq ngel-ail. Ngal nuljuq bhai khadai gaiq-a nail ngel-ail dai, nuljuq heeq nia dai, gevq bhoel-ai lavq-a nail ngaol.

5 Tsaol-aq teevq gaq ganav yu bhai bhi noeqhaq nail phaq nl haq neq, ngaq bhai bhi noeqhaq lavq nail nee maqtsil nuljuq bhai iqsanl bhi noeqhaq lavq nail ngaol. Ngal niailhai ge nail neq, nuljuq bhai al jaiq maq ge jel movq-il. 6 Nuljuq jemao teevq pav aivq bhai alhai dal bhiq nail neq, gaq-ao nail ngaol. 7 Thailhai ngaol-aoq, noeqhaq deedee nail ngel-i mail, aivq maq noeq maq mav-ail maq ya pevq-ail dai, aivq nail oeqbal phaiq bhiq khi, aivq bhai bhi noeqsal nail neq, tsaq nail ngaol. 8 Alheel ngel-i mail, “Aqyu juq ngaq bhai maldil gaiq-a lao thaq nial” dai, aivq heeq nia dai, aivq bhai nl bhiq yaoq dai, ngal nuljuq bhai hal nail ngaol. 9 Al ovqtavq, nuljuq ngaq nail daoq yaoq daoq yaoq-ao nee bhai naldaiq-ail laiq dai, ngal ya heeq kivq dai, nuljuq bhai laonqdaiq nail dai khi, ngal haoqgavq al gevq bhoel-ai lavq-a nail ngaol. 10 Nuljuq tsaol-aq al gaq nail oeqbal bhai phaiq bhiq haq neq, ngal iqsanl aivq nail oeqbal bhai phaiq bhiq nail ngaol. Khul khi mail dai ngal-aq neq, ngal oeqbal teevq phaq ganav bhai phaiq bhiq haq neq, nuljuq nail haqbhoil Khali nail sivtavq bhai, ngal phaiq bhiq-a nail ngaol. 11 Alhai maq ngel haq neq, neivq Saqdaq ngadao bhai gaq lal nail ngaol. Ngadao aivq nail neenoeq bhai heeq kivq nail ngaol.

12 Khali nail ganl lavqkhiq tsail nail geeqlaoq daoq cavq nail dai khi, ngal Daqlol meenq bhai kev lal-u phao, Miqyail ngaq nail haqbhoil gailkhaol phao daol lavq-a nail ngaol. 13 Thailhai ngaol-aoq, ngal ngaq nail jaqbheq Tiltuv bhai Daqlol meenq bhai maq ya moel-a nail ngel-i mail, neema maq sal-il. Alheel ngel-i mail, ngal a bhai jaol nail tsaol-aq bhai daoq cavq cavq-ail ceevq khi, Maqgeiqdaolnil milkhaoq bha lal-a nail ngaol.

14 Miqyail bhai tsiqeeq bhel. Khul khi mail dai ngal neq, ngadao juq Yeiqsul Khali nee teevq gaq khe-ai khaq mao iqsanl gaq lai dai, Miqyail hevq daiq lavq nail ngaol. Yu Khali bhai ya heeq nia dai, huqbhiq nil nail phaq yaoq dao yaoq-ao nee nil kev-ail dai, aivq ngadao bhai yuq lavq-a nail ngaol. 15 Khul khi mail dai ngal-aq neq, nvjuq neq, hevqkovq nail phaq ya-a nail tsaol-aq nail lavqkhoel bhai maqkhaiq, luq-ail seil-ail nail tsaol-aq nail lavqkhoel bhai maqkhaiq, Miqyail bhai laol bhiq nail Khali nail huqbhiq nil nail phaq pevq nail ngaol. 16 Luq-ail seil-ail nail tsaol-aq nail haqbhoil neq, bhi sil nail aqbuvq aqnil nil nail phaq khe-ai dul khi hevqkovq nail phaq ya nail tsaol-aq nail haqbhoil neq, bhi doevq lal nail huqbhiq nil nail phaq khe-ai dul nail ngaol. Niil heel nail ganl nl nia nail khaq sil gaq jaol nail-aiq. 17 Tsaol-aq maodai gaq Miqyail nail daoq cavq-u phao, jailjeq ya dai, cavq nail ngaol. Nvjuq neq, alheel nail tsaol-aq maq ngel-ail. Miqyail-i mail bhi cavq lavq nail khe-ai taivq-ail, Miqyail nail sivtavq bhai Khali nail yaqkav khe-ai, meeq nail haol nail lavqkhoel nee, cavq nail ngaol.