1 Ngal neq, Yeiqsul Khali nail yaqkav khi mail gaqkhoel pevq nail Silmoq Bheiqtuvluv ngaol. Miqyail khi mail Hevqkovq nail gaq pevq nail, Yeiqsul Khali nail tsaq nail daol nail phaq bhaqda nee, nvjuq nail neema thaqtsaol nail phaq khe-ai dul nail aqphoiq kav deedee nail neema thaqtsaol nail phaq ya-ai thaq nail nuljuq jaol nail bha haoqgavq gevq bhoel-ai leevq-a nail ngaol.

2 Miqyail khi mail ngadao nail Heeqphaq Yeiqsul bhai nuljuq heeq nia nail phaq bhaqda nee, geeqlaoq eeljaol khi mail neesal-ovq nail phaq nuljuq nail lavqkhoel bhai mao lal dei-eiq.

3 Aivq nail seiqleiq khaoqsail khi meeq dee bhee deedee nail phaq bhai juq khi ngadao bhai khul-a nail Miqyail bhai ngadao heeq kivq nail ngel-i mail, aivq bhai ev khi doevq kivq nail haqbhoil, ngadao loq nail phaq iqsanl mail, aivq nail eeq deedee nail bhaqaoq ngadao bhai bivq lavq-a nail ngaol. 4 Alhai dul dai, aqphoiq kav khi eeq deedee nail aivq nail saljial juq ngadao bhai bivq lavq-a nail ngaol. Aqsivq haqjoil nail neekhaol bhaqda nee miltsaq kovtavq bhai luq-ail seil-ail nail phaq jiav lal-a nail ngaol. Saljial al juq bhaqda nee, luq-ail seil-ail nail phaq bhai nuljuq ya jel-ail khi, Miqyail neema thaq nail khe-ai, nuljuq iqsanl mail thaq nia lal nail ngaol.

5 Alheel ngel-i mail, nuljuq neema thaqtsaol nail phaq bhai, aqmeeq phaq nl nail bhi mao lal yaoq. Aqmeeq phaq nl nail bhai neenoeq neekha bhi mao lal yaoq. 6 Neenoeq neekha bhai, yovqgavq nail neema bhai gaq lai nia nail phaq bhi mao lal yaoq. Yovqgavq nail neema bhai gaq lai nail phaq bhai, oltsaol nail phaq bhi maol lal yaoq. Oltsaol nail phaq bhai, Miqyail bhai ev nail phaq bhi mao lal yaoq. 7 Miqyail bhai ev nail phaq bhai, aqivq jaqbheq bhai gaiq-a nail phaq bhi mao lal yaoq. Aqivq jaqbheq bhai gaiq-a nail phaq bhai, goil nail gaiq-a nail phaq bhi mao lal yaoq. Al juq nail haqbhoil, laijai deedee yaoq. 8 Niil juq nuljuq nail lavqkhoel bhai aol nail nee ovqtavq, mao lal thailthaiq haq neq, ngadao nail Heeqphaq Yeiqsul Khali bhai heeq nia nail lavqkhoel, nuljuq ganl tsoiq nail tsaol-aq pevq lal khi, aqheeq maodai heeq lee nail ngaol. 9 Thailhai ngaol-aoq, niil juq maq aol nail tsaol-aq neq, maivneev maq moel haol nia nail tsaol-aq khe-ai dul nail ngaol. Jel lal-u phao, aqyu juq-i mail nl-a nail oeqbal juq bhai tsiqhaol bhiq-a nail phaq bhai iqsanl, nioil peivq gil-a nail ngaol.

10 Alheel ngel-i mail, aqivq jaqbheq juq-ol, Miqyail nuljuq bhai khul khi tsel dov-a nail phaq bhai ivq lal dai, laijai deedee yaoq. Alhai nl haq neq, nuljuq teevq thal-iq maq gaq tsuq-ail. 11 Alhai dul dai, ngadao nail Heeqphaq khi mail Hevqkovq nail gaq pevq nail Yeiqsul Khali neq, nqmaq maqluv halyeel ivq nail aivq nail Milkhaoq lavqkhoel bhai, aivq nuljuq bhai lavqkhiq teevq tsail hav bhoel lavq nail ngaol.

12 Alheel ngel-i mail, ganl niil juq bhai nuljuq heeq nia gil khi, yovqgavq-i mail ya-ai thaq nail maldil tsaq nail phaq nail lavqkhoel nuljuq ivqdao dai jaol khi ngaol-aoq, ganl niil juq nuljuq bhai khaq mao iqsanl ge noeq bhiq nail ngaol. 13 Nuljuq ganl al juq bhai maq ya nioil peivq-ail dai, ngal khal doevq-u kev dai, nuljuq bhai ge noeq bhiq nail neq, tsaq nail ngaol dai, noeq nail ngaol. 14 Khul khi mail dai ngal-aq neq, ngadao nail Heeqphaq Yeiqsul Khali ngaq bhai bhaqlaoq kheq dai phaodaiq lavq-a nail khe-ai, maq maoq lal mail, ngaq nail aqmaol niilniai ya khaonq ha-ail ceevq nail ngaol dai, ngal heeq kivq nail ngaol. 15 Ngal miltsaq kovtavq bhai maq jaol dai, pevq ail-u phao, nuljuq khaq mao iqsanl ganl al juq bhai noeq kev nia dai, niil aq-il, ngal laijai thailthaiq nail ngaol.

16 Ngadao nail Heeqphaq Yeiqsul Khali nail bhaqaoq nail ganl khi mail aivq yavq kha lee nail ganl, nvjuq nuljuq bhai ge daiq bhiq-u phao, yu nail neenoeq neekha bhai juq khi ge dov-a nail ganqje maq ngel-ail. Nvjuq neq, aivq nail eeq dee heel deedee nail bhaqaoq bhai maivneev nee mail ya moel-a nail ngaol. 17 Aqbhu Miqyail aivq bhai tsiqeeq tsiqheel bhiq khi seiqleiq khaoqsail bivq-a nail bhai nvjuq ya moel-a nail ngaol. “Tsaol-aq niil gaq neq, ngal mailma-ail gaiq-a nail ngaq nail Yaqyov ngaol. Ngal aivq bhai neekhaol sil deedee naol” dai, aivq bhai ge bhiq-a nail seiqleiq khaoqsail teevq bhee aol nail eeq nail heel nail gaq nail aqthel bhai, nvjuq ya gaiq-a nail ngaol. 18 Nvjuq aivq nee mail meeq nail haol nail gaoqjaoq kovtavq bhai jaol-u phao, nqtavq nee mail daoq al daoq alhai meel dov-ai leevq-a nail bhai ya gaiq-a nail ngaol.

19 Alheel ngel-i mail, nvjuq Miqyail nail haqbhoil gedan nail juq nail daoq bhai, neema thaqtsaol jaiq lal-a nail ngaol. Nuljuq iqsanl, nuljuq nail neema lavqkhoel nqbhaq bhaq lal khi, nqhao khe aqbhaq bhaq deedee nail aqgil maq dov lal-u phao kev dai, aqnav nail lavqkhoel bhaq nail phalmanq bhai juq nail khe-ai, Miqyail nail haqbhoil gedan nail al juq nail daoq bhai aqmeeq-ail naldaiq yaoq. 20 Miqyail nail haqbhoil gedan nail juq-i mail Jalliq lavqkhoel bhai gevq-ai thaq nail daoq khul daoq maqkhaiq, yovqgavq bhai yovqgavq noeq dov nia nail maq ngel-ail dai, iqmoeq heeq kivq thaq-ai yaoq. 21 Khul khi mail dai ngal-aq, Miqyail nail haqbhoil gedan nail juq neq, yovqgavq bhai yovqgavq noeq dov khi ge nail maq ngel-ail. Meeqnail Haolnail Aqhaqlal aqyu juq bhai bhi noeq dov-a nail khe-ai, aqyu juq Miqyail nail daoq ge nail ngaol.