2 Theilsaqlolni
Gevq-a nail gaq
Haoqgavq niil keiv iqmoeq ilmoeq bhai maqkhaiq, haoqnao naosaq bhai maqkhaiq, Gaqkhoel Paolluv aivq-i mail gevq-a nail ngaol dai, gevq-ai thaq nail ngaol. Al ovqtavq, milnee uqnee khe Khali yaq juq jemao iqsanl, Paolluv-i mail gevq-a nail ngaol dai, noeq nail ngaol.
Gevq-a nail aqyanq khi mail aqduq
Gevq-a nail aqyanq neq, A.D. 51-52 kovq bhai ngaol. Gevq-a nail aqduq neq, Gaolliqthu meenq ngaol. Paolluv 1 Theilsaqlolni haoqgavq gevq khi, Siqlav khi mail Tilmolseiq aqyu nvq gaq-i mail Theilsaqlolni meenq bhai jaol nail Khali yaq munl bhai bhi bivq ail khi kovq lal-al nee ngal-aq, 2 Theilsaqlolni haoqgavq gevq-a nail ngaol.
Khaq sil gaq bhai gevq bhiq-a nail
Haoqgavq niil keiv neq, Theilsaqlolni meenq khe jaol nail Khali yaq munl bhai gevq bhiq-a nail ngaol. Theilsaqlolni meenq neq, ngaqkha daoljail bhai jiav khi jaiq gaiq jaiq kha kha nail al jaiq-ail mao nail meenq meenq ma teevq meenq ngaol. Tsaol-aq nvq sainv gaq niidai jaol nail ngaol. Theilsaqlolni Khali yaq munl neq, Paolluv-i mail daoqthaoq thaoq-a nail ngaol. A bhai khe Khali yaq jemao Yuldav tsaol-aq maq ngel dai, yuq nail jeq-e jaq-a ngaol.
Khul bhai noeqthunq khi gevq-a nail
Haoqgavq niil keiv neq, khoeq nail jiovq nail phaq bhai ya daq khi ngaol-aoq, ivqdao dai jaol yaoq dai, gaq bivq nail haqbhoil gevq-a nail ngaol. Heeqphaq Yeiqsul nvq pov teevq pov yavq kha lee nail ganl bhai noeq bheeq-ai thaq nail juq khalhai neema ya thaqtsaol nail tsaq nail dai, cavq bhiq cov bhiq-a nail nee ovqtavq, Heeqphaq Yeiqsul nvq pov teevq pov yavq kha lee nail bhai daonq thailthaiq-u phao, aqdoevq khalhai ya doevq nail dai iqsanl, cavq bhiq cov bhiq-a nail ngaol.
1
Iqmoeq ilmoeq khe daoq
1 Paolluv, Siqlav khi Tilmolseiq, nvjuq hail gaq, ngadao nail Aqbhu Miqyail khi Heeqphaq Yeiqsul Khali nail lavqkhoel bhai jaol nail, Theilsaqlolni meenq khe jaol nail Khali yaq munl bhai haoqgavq niil gevq bhoel-ai lavq-a nail ngaol.
2 Ngadao nail Aqbhu Miqyail khi Heeqphaq Yeiqsul Khali nail geeqlaoq eeljaol khi neesal-ovq nail phaq nuljuq nail kovtavq bhai jiav dei-eiq.
Yeiqsul yavq kha lee-u phao, yalkhaq dal nail ganl
3 Aqivq jaqbheq juq-ol, nvjuq nuljuq nail haqbhoil khaq mao iqsanl, Miqyail bhai tsiqeeq heeq phaq-ail tsaq nail ngaol. Khul khi mail dai ngal-aq neq, nuljuq neema thaqtsaol nail phaq eeq lal mao lal thailthaiq khi, nvjuq iqsanl teevq gaq nee teevq gaq goil nail gaiq-a nail phaq mao lal thailthaiq nail ngel-i mail, nvjuq alhai tsiqeeq heeq phaq-ail tsaq nail ngaol. 4 Miqyail nail Khali yaq munl juq nail sivtavq bhai nvjuq nuljuq bhai tsiqeeq naol. Khul khi mail dai ngal-aq neq, nuljuq khoeq nail jiovq nail khi, haq dee aoq deedee nail iqsanl bhai ya daq khi ngaol-aoq, ol ol-ail neema thaqtsaol nail ngaol.
5 Nuljuq alheel nail neema aol nail ngel-i mail, Miqyail tsaq nail daol nail lavqkhoel nee yalkhaq dal nail bhai bhaqlaoq kheq dai, bhi dov lal-a nail ngaol. Khul khi mail dai ngal-aq neq, nuljuq aivq nail Milkhaoq bhai geel-nvq lal dai, aivq nl thailthaiq nail ngaol. Milkhaoq al nail haqbhoil nuljuq daq thailthaiq nail ngaol. 6 Miqyail neq, tsaq nail daol nail lavqkhoel nee yalkhaq dal nail gaq pevq nail ngaol. Alheel ngel-i mail, nuljuq bhai khoeq lavq jiovq lavq nail tsaol-aq juq bhai khoeq nail jiovq nail phaq bhi kev lee nail ngaol.
7 Heeqphaq Yeiqsul nqtavq nee mail, bhaqaoq teevq bhee aol nail aivq nail nqtavq gaqkhoel nee mail teevq gaq khe-ai, miqjaq nail aqbhaq lavqkhoel nee dov lee-u phao, khoeq nail jiovq nail bhai ya daq-a nail nuljuq bhai nvjuq nee mail teevq gaq khe-ai gaqnaq bhi naq lavq nail ngaol. 8 Aq-u phao, Miqyail bhai maq heeq nia nail tsaol-aq bhai maqkhaiq, ngadao nail Heeqphaq Yeiqsul nail lavqkhiq tsail nail geeqlaoq daoq bhai maq naldaiq nail tsaol-aq bhai maqkhaiq, aivq mailma-ail nl kovq bhiq nail ngaol. 9 Yeiqsul yavq kha lee-u n-gaol, tsaol-aq al juq neq, aivq bhai maqkhaiq, seiqleiq khaoqsail teevq bheeq aol nail aivq nail bhaqaoq bhai maqkhaiq, ya pav-ail khi, nqmaq maqluv halyeel luq-ail seil-ail nail bhai ya daq nail ngaol. 10 Aq-u n-gaol Yeiqsul neq, aivq nail tsaol-aq bhaqda nee seiqleiq khaoqsail ya nail nee ovqtavq, aivq bhai neema thaqtsaol nail tsaol-aq iqsanl mail noeq-u maq dov-ail tsiqeeq nia dai, yavq kha lee nail ngaol. Nvjuq salkhil khanq nail bhai nuljuq neema thaqtsaol nail ngel-i mail, nuljuq iqsanl munl al munl nail lavqkhoel bhai aol nail ngaol.
11 Alheel ngel-i mail, nvjuq khaq mao iqsanl nuljuq nail haqbhoil geeqlaoq niailhai hal nail ngaol. Ngadao nail Miqyail-i mail khul-a nail bhai geel-nvq lal dai, aivq nl lavq dai maqkhaiq, aqmeeq phaq nl movq nail neema iqsanl khi neema thaqtsaol nail ngel-i mail khal nl khal hal nail iqsanl, aivq nail bhaqaoq bhaqda nee aivq nl gil nia dai maqkhaiq, nvjuq geeqlaoq hal nail ngaol. 12 Alhai bhee lal haq neq, nuljuq bhaqda nee ngadao nail Heeqphaq Yeiqsul nail aqmil seiqleiq khaoqsail ya khi, aivq bhaqda nee nuljuq seiqleiq khaoqsail ya nail ngaol. Ngadao nail Miqyail khi Heeqphaq Yeiqsul Khali nail geeqlaoq eeljaol bhaqda nee, alhai pevq lal nail ngaol.