2 Tilmolseiq
Gevq-a nail gaq
Haoqgavq niil keiv iqmoeq ilmoeq bhai Gaqkhoel Paolluv aivq-i mail gevq-a nail ngaol dai, gevq-ai thaq nail ngaol. Al ovqtavq, milnee uqnee khe Khali yaq juq jemao iqsanl, Paolluv-i mail gevq-a nail ngaol dai, noeq nail ngaol.
Gevq-a nail aqyanq khi aqduq
Gevq-a nail aqyanq neq, A.D. 66-67 kovq bhai ngaol. Gevq-a nail aqduq neq, Paolluv Lolmav meenq nail thaonq bhai nvq pov teevq pov bhiq nieivq bhoel-u phao, gevq-a nail ngaol. Paolluv Lolmav nail thaonq bhai iqmoeq-u khe pov aol-u phao neq, thoi dai dai-ail maq haq-al. Thailhai ngaol-aoq, niil thal khe pov neq, heeqphaq Neiqlol-i mail thaonq bhai bhi laol khi, haq deedee-a nail ngaol.
Khaq sil gaq bhai gevq bhiq-a nail
Haoqgavq niil keiv neq, Tilmolseiq bhai gevq bhiq-a nail ngaol. Tilmolseiq neq, Luldaqlal meenq yaq ngaol. Tilmolseiq dai ge nail daoqceevq neq, Miqyail bhai tsiqeeq tsiqheel nail dai, ge movq nail ngaol. Aivq nail aqma neq, Khali yaq pevq nail Yuldav tsaol-aq Ulnil dai mil khi, aivq nail aqbhu neq, Heiqlaqsal tsaol-aq ngaol. Aivq yaqnoil-ail jiav-u nee mail Jalliq aqlil heeq nia nail ngaol. Yuldav tsaol-aq nee mail ganl nl tavq nia dai Paolluv-i mail bavkov uqjaq oev bhiq-a nail ngaol. Tilmolseiq neq, gaqkhoel tsel nvq gaq nail lavqkhoel bhai maq aol-ail. Aivq neq, Khali yaq munl juq bhai heldaiq phail khi Paolluv bhai ganl nl tsao bhiq nail teevq gaq ngaol.
Khul bhai noeqthunq khi gevq-a nail
Haoqgavq niil keiv neq, Paolluv Tilmolseiq bhai aivq jaol nail bha bhi nalga lee movq-ai bhiq nail ngel-i mail, gevq-a nail ngaol. Khul khi mail dai ngal neq, Aqsil-aq milkhaoq bhai jaol nail tsaol-aq iqsanl mail aivq bhai khaonq ha-a nail ngaol. Deiqmav neq, miltsaq niilniai gaiq-a nail ngel-i mail, aivq bhai khaonq ha-ail ceevq khi Theilsaqlolni meenq bha ail-a nail ngaol. Gaqleiqgeiq neq, Gaqlaqtil milkhaoq bhai lai-a nail ngaol dai, ge nail ngaol. Tiltuv iqsanl, Daqlaqmaqdil milkhaoq bhai ail-a nail ngaol. Lulkavq taivq-ail, aivq nee mail jaol nail ngel-i mail, Tilmolseiq bhai iqsanl bhi lee movq-ai bhiq nail ngaol. Lavqtsail mail lee yaoq dai, nvq pov kev dai, ge bhiq-a ngaol.
Al ovqtavq, Heeqphaq Neiqlol khoeq dee jiovq deedee nail bhai ya daq thailthaiq-u phao, ivqdao dai, jaol yaoq. Lavqkhiq tsail nail geeqlaoq daoq aqmeeq-ai cavq yaoq dai iqsanl, gaq bhiq nail haqbhoil, gevq bhiq-a nail ngaol.
1
Iqmoeq ilmoeq khe daoq
1 Ngal neq, Yeiqsul Khali nail gaqkhoel Paolluv ngaol. Miqyail neema tsaq nail ngel-i mail, ngal gaqkhoel jiovq thailthaiq nail ngaol. “Yeiqsul Khali bhaqda nee aqdoevq ya doevq nail ngaol dai, jaq-ai thaq nail saljial al cavq bhiq yaoq” dai, Miqyail ngaq bhai khoel nail ngaol.
2 Ngal mao-ail gaiq-a nail ngaq nail yaqyov Tilmolseiq bhai haoqgavq niil gevq bhoel-ai lavq-a nail ngaol. Aqbhu Miqyail khi ngadao nail Heeqphaq Yeiqsul Khali nail geeqlaoq eeljaol, gaoqhaq gaiq-a nail phaq khi, neesal-ovq nail phaq naoq nail kovtavq bhai bhi jiav dei-eiq.
Yeiqsul nail haqbhoil salkhil khanq nail bhai thaq haqsil
3 Ngal geeqlaoq khal hal-u phao, nqkiv n-gaol maqkhaiq, khaq mao iqsanl naoq nail haqbhoil maq nioil peivq dai hal khi, Miqyail bhai tsiqeeq naol. Ngaq nail aqphiq aqbhal juq oeqbal thaq duq maq ya nail heeq nia nail neema aol aol-ail, aivq nail haqbhoil ganl nl nail khe-ai, ngal iqsanl ganl nl nail ngaol. 4 Naol ngaq bhai noeq moel nail bhaqda nee, maivbhil dov-a nail ngaol dai, ngal noeq dov lal-u phao, naoq bhai moel movq deedee-ail nial. Naoq bhai ya moel haq neq, ngal lavqkhiq tsail deedee lal nail ngaol. 5 Naol maldil neema thaqtsaol nail bhai, ngaq bhai noeq dov lal-ail nial. Naol neema thaqtsaol nail al neq, iqmoeq-u phao naoq nail aqphiq Laol-il khi naoq nail aqma Ulnil nail lavqkhoel bhai aol khi, niil aq-il naoq nail lavqkhoel bhai aol nail bhai, ngal heeq kivq nail ngaol. 6 Alheel ngel-i mail, ngal naoq bhai niailhai ge noeq bhiq movq nail ngaol. Ngaq-i mail naoq nail kovtavq bhai aqlavq bavq dav-u phao, naol Miqyail nail kovpavq ya-a nail ngaol. Miqjaq sivtovq nail khe-ai, kovpavq al bhai sivtovq yaoq. 7 Khul khi mail dai ngal-aq neq, Miqyail ngadao bhai geesil nail neema bhi aol lavq-a nail maq ngel-ail. Bhaqaoq aol nail neema, goil nail gaiq-a nail neema khi, yovqgavq nail aqmaol bhai gaq laiq nail neema bhi aol lavq-a nail ngaol.
8 Alheel ngel-i mail, ngadao nail Heeqphaq Yeiqsul nail haqbhoil salkhil khanq nail, thaq haqsil. Aivq nail haqbhoil nee ganl nl nail ngel-i mail, thaonq bhai ya aol thailthaiq nail ngal bhaqda nee iqsanl thaq haqsil. Miqyail-i mail naoq bhai gaq bivq-ai thaq nail khe-ai, ngaq-ai nee mail teevq gaq khe-ai, lavqkhiq tsail nail geeqlaoq daoq nail haqbhoil khoeq nail jiovq nail phaq bhai daq yaoq. 9 Miqyail neq, aivq-i mail noeqceiv-ai thaq nail khe-ai pevq lal dai, ngadao bhai hevqkovq lavq khi, aqmeeq aqhaol nail lavqkhoel bhai doevq yaoq dai, ngadao bhai khul-ai thaq nail ngaol. Ngadao teevq phaq ganav nl-ai hal-ai thaq nail ngel-i mail, aivq alhai nl lavq-a nail maq ngel-ail. Geeqlaoq eeljaol bivq lavq-a nail ngaol. Geeqlaoq eeljaol al neq, nqtavq miltsaq maq jiav lee-u nee mail, Yeiqsul Khali bhai juq khi, aivq ngadao bhai bivq lavq-a nail ngaol. 10 Ngadao nail Hevqkovq nail gaq Yeiqsul Khali dov lee-a nail ngel-i mail, niil aq-il geeqlaoq eeljaol al bhai ngadao bhaqlaoq kheq dai, ya moel-a nail ngaol. Aivq neq, sil nail phaq bhai lav cov khi, aqdoevq doevq nail phaq khi maq luq maq seil-ail nia nail phaq, lavqkhiq tsail nail geeqlaoq daoq lavqkhoel nee bhaqlaoq kheq dai, bhi dov lee-a nail ngaol. 11 “Lavqkhiq tsail nail geeqlaoq daoq niil nail haqbhoil daoq cavq cavq nail gaq jiovq yaoq. Al ovqtavq, gaqkhoel khi cavq bhiq cov bhiq nail saqlaq iqsanl jiovq yaoq” dai, Miqyail ngaq bhai tsel dov lavq-a nail ngaol. 12 Alhai tsel dov lavq-a nail bhaqda nee ngal niailhai ya daq thailthaiq nail ngaol. Thailhai ngaol-aoq, ngal maq haqsil. Khul khi mail dai ngal-aq neq, ngaq-i mail neema thaqtsaol nail gaq bhai ngal heeq kivq nail ngaol. Ngaq-i mail aivq bhai khal av bhiq-a nail juq, yalkhaq dal nail aqn bhai kev dai, aivq oiltsail-ai thaq nail ngaol dai, ngal heeq kivq nail ngaol.
13 Ngaq-i mail cavq bhiq cov bhiq-a nail maldil tsaq nail daoq bhai saol oil yaoq. Ngadao Yeiqsul Khali bhai tavq nail ngel-i mail, ya-ai thaq nail neema thaqtsaol nail phaq khi goil nail gaiq-a nail phaq nail haoqnao doel-aivq yaoq. 14 Naoq bhai av bhiq-a nail, meeq deedee nail juq bhai, ngadao nail lavqkhoel khe jaol nail Meeqnail Haolnail Aqhaqlal bhai juq khi aqmeeq-ai oil tsail-ai thaq yaoq.
Paolluv bhai khaonq ha nail juq khi maq khaonq ha nail juq nail ganl
15 Naol heeq nia nail khe-ai, Aqsil-aq milkhaoq bhai jaol nail tsaol-aq iqsanl mail ngaq bhai khaonq ha-a nail ngaol. Philgeiqlul khi Heiqlaqmoljeiq iqsanl, tsaol-aq al juq nail lavqkhoel bhai aol nail ngaol.
16 Aoqneiqsiqphaol aqyu phaqyaq mayaq nail kovtavq bhai Heeqphaq Yeiqsul nail gaoqhaq gaiq-a nail phaq bhi jiav dei-eiq. Aivq ngaq bhai mee nia pov aqsal bhi sal lal-a nail ngaol. Ngaq bhai hailcav pheethaiq-ai thaq nail bhai aivq maq haqsil-ail. 17 Aivq Lolmav meenq bhai lal kev-u phao, ngaq bhai moel-u phao kev dai, halpov deedee-a nail ngaol. 18 Aivq neq, yalkhaq dal nail aqn n-gaol, Heeqphaq Yeiqsul aivq bhai gaoqhaq gaiq-a bhiq dei-eiq. Ngal Eilpheilsu meenq bhai jaol-u phao, aivq ngaq bhai khadai tsaojao-ai lavq-a nail bhai naol heeq nia nail ngaol.