1 Yuldav milkhaoq bhai jaol nail tsaol-aq teevq pav ganav juq Aqdil-aoq meenq bhai lal khi, “Molseiq nail Aoldaoq kovqdaoq lavqkhoel bhai ge-ai thaq nail khe-ai, bavkov uqjaq maq oev haq neq, nuljuq hevqkovq nail phaq bhai maq ya nia-ail” dai, neema thaqtsaol nail tsaol-aq juq bhai cavq bhiq cov bhiq-a nail ngaol. 2 Ganl al nee tavq lai khi, Paolluv khi Bhaqnaqbhal aqyu nvq gaq, tsaol-aq al juq nee jil pheeljaq-a nail ngaol. Alheel ngel-i mail, ganl al ganl nee tavq lai khi, Paolluv khi Bhaqnaqbhal Aqdil-aoq meenq bhai jaol nail tsaol-aq teevq pav ganav juq nee mail, Yeiqlulsaqlaiq meenq bha bhi ail khi, gaqkhoel juq khi aqivq aqtsu juq bhai bhi ge tsao-ail nail dai, ge ceiv-a nail ngaol. 3 Aqyu juq bhai Khali yaq munl-i mail khoel khi bhi ail-a nail ngaol. Philnilsav milkhaoq khi mail Saqmaqliv milkhaoq juq bhai ail thailthaiq-u phao, yu nail jeq-e Miqyail jaol nail phao kovq lal-a nail ganl juq, ge bhiq-a nail ngaol. Ganl al khal ya gaiq-a nail neema thaqtsaol nail tsaol-aq iqsanl mail, lavqkhiq tsail deedee nail ngaol. 4 Aqyu juq Yeiqlulsaqlaiq meenq bha ail kev-u phao, Khali yaq munl juq maqkhaiq, gaqkhoel juq maqkhaiq, aqivq aqtsu juq maqkhaiq, aqyu juq bhai hav-a nail ngaol. Aq-u phao, aqyu nvq gaq bhai juq khi Miqyail-i mail khal nl khal hal-a nail phaq iqsanl mail, aqyu juq bhai ge daiq bhiq-a nail ngaol.

5 Thailhai ngaol-aoq, Phaqliqsail munl bhai aol nail, neema thaqtsaol nail tsaol-aq teevq pav ganav juq thul lal khi, “Yu nail jeq-e iqsanl, bavkov uqjaq ya bhi oev khi, Molseiq nail Aoldaoq kovqdaoq bhai ya bhi tsaothe nail ngaol” dai, ge nail ngaol.

6 Aq-u phao, gaqkhoel juq khi aqivq aqtsu juq jil lal khi, al nail ganl nee maoqbhaoq nl-a nail ngaol. 7 Ganl al ganl nee aqyu juq maodai maoqbhaoq nl kel lavq-u phao, Bheiqtuvluv thul lal khi, niailhai ge nail ngaol: “Aqivq jaqbheq juq-ol, yu nail jeq-e iqsanl lavqkhiq tsail nail geeqlaoq daoq niilniai ya gaiq khi neema thaqtsaol lal dai, daoq cavq cavq-ail nail haqbhoil, ngadao juq nail lavqkhoel bhai iqmoeq-u phao nee, Miqyail ngaq bhai tsel dov-ai thaq nail bhai nuljuq heeq nia nail ngaol. 8 Tsaol-aq nail neema bhai heeq nia nail Miqyail, ngadao bhai Meeqnail Haolnail Aqhaqlal bivq lavq-a nail khe-ai, yu nail jeq-e bhai iqsanl bivq-a nail lavqkhoel, aqyu juq bhai iqsanl, aivq hav-a nail ganl ngadao juq bhai bhaqlaoq kheq dai, bhi moel lavq-a nail ngaol. 9 Miqyail neq, ngadao juq khi aqyu juq dai, maq saol-nvq pav-ail. Aqyu juq neema thaqtsaol nail ngel-i mail, Miqyail aqyu juq bhai bhi haol lal-a nail ngaol. 10 Alheel ngel-i mail, ngadao juq nail aqphiq aqbhal juq maqkhaiq, ngadao juq maqkhaiq, maq phi tsaol nail kavbavq al bhai yaqlaol juq nail haoqnaol bhai tsiq phi bhiq nail lavqkhoel nee, khul khi mail nuljuq Miqyail bhai laonqdaiq nail-aiq. 11 Heeqphaq Yeiqsul nail geeqlaoq eeljaol bhaqda nee ngadao hevqkovq nail phaq ya nail ngaol dai, neema thaqtsaol nail ngaol. Alhai dul dai, aqyu juq iqsanl hevqkovq nail phaq bhai alhai ya-a nail ngaol” dai, ge bhiq-a nail ngaol.

12 A bhai nee ngal-aq, Bhaqnaqbhal khi Paolluv aqyu nvq gaq, Miqyail aqyu nvq gaq bhai juq khi yu nail jeq-e jaq-a nail sivtavq bhai nl daiq bhiq-a nail noeq-u maq dov nail phaq khi bhi heeq bhi moel nail phaq nail ganl ge daiq bhiq-u phao, jil lal-a nail tsaol-aq iqsanl, aqtsi tsu dai jaol khi naldaiq nail ngaol. 13 Aqyu nvq gaq ge bhiq gaq-u phao, Yaqkov niailhai ge nail ngaol: “Aqivq jaqbheq juq-ol, ngal ge nail bhai teevq pov naldaiq daiq. 14 Aivq nail aqmil bhi bavq nail khi yu nail jeq-e jaq-a nail lavqkhoel bhai Miqyail munl teevq munl tsel dov-ai thaq nail ngaol. Alhai tsel dov nail dai, iqmoeq-u nee mail Miqyail aqyu juq bhai heldaiq lee-a nail ganl, Silmiqoq ngadao bhai ge lavq-a nail ngaol. 15 Ganl niil juq Miqyail nail haqbhoil gedan nail juq-i mail ge-ai thaq nail daoq bhai tsaq deedee lai nail ngaol. Jalliq lavqkhoel bhai ge-ai thaq nail neq:

gevq-ai thaq nail ngaol.

19 Alheel ngel-i mail, Miqyail jaol nail phao kovq lal thailthaiq nail, yu nail jeq-e jaq-a bhai lav tsoiq nail, maq tsaq-ail dai, ngal niailhai noeq nail ngaol. 20 Thaoqphaoq aqma maolkhoel bhai tavq nail aqjiivq aqcavq phaq maqkhaiq, khaqmiq sev nail maqkhaiq, phee heivq nail haqjoil jaq nail maqkhaiq, aqsivq jaq nail maqkhaiq, niil juq bhai lao yaoq dai*15.20 Molseiq nail Aoldaoq kovqdaoq bhai gevq-ai thaq nail khe-ai, aqyu juq bhai haoqgavq gevq bhiq nail neq tsaq-ail jaol-aq. 21 Khul khi mail dai ngal-aq neq, jaol n yaoq jao yaoq-ao nee uqhuq thaoq nail ilkhaol lavqkhoel, Molseiq-i mail bivq-a nail aoldaoq kovqdaoq ge daiq bhiq nail ngaol. Milnee uqnee nee meenq yaoq meenq yaoq-ao nee nail lavqkhoel bhai daoq al juq cavq bhiq nail tsaol-aq jaol nail ngaol” dai, ge bhiq-a nail ngaol.

22 A bhai nee ngal-aq, “Ngadao juq nail munl lavqkhoel bhai jaol nail teevq pav ganav juq bhai tsel dov khi, Paolluv khi Bhaqnaqbhal nee mail Aqdil-aoq meenq bhai bhi ail nail tsaq nail ngaol” dai, gaqkhoel juq khi aqivq aqtsu juq iqsanl, Khali yaq munl munl lao-ail neema tsaq nail ngaol. Aqivq jaqbheq Khali yaq juq nail lavqkhoel khe, aqivq jiovq nail Bhaqsaqbhal dai khul nail Yuldav khi Siqlav bhai tsel dov khi, bhi ail-a nail ngaol. 23 Aqyu juq-i mail oil laivq-a nail haoqgavq al keiv nail lavqkhoel bhai niailhai gevq-ai thaq nail ngaol:

“Gaqkhoel juq khi aqivq aqtsu juq neq, Aqdil-aoq meenq, Sulliv milkhaoq khi Gillilciv milkhaoq bhai jaol nail, yu nail jeq-e jaq-a pevq nail aqivq jaqbheq Khali yaq juq bhai, goil nail gaiq-a nail daoq gevq bhoel-ai leevq-a nail ngaol. 24 Nvjuq nail lavqkhoel khe tsaol-aq teevq pav ganav juq neq, nvjuq maq bhi lee khi ngaol-aoq, nuljuq jaol nail bha lee lee-ail khi nuljuq bhai khaoq lav laol nail nee ovqtavq, nuljuq nail neema pov pov lav lav-ail pevq lal dai, cavq bhiq cov bhiq lee-a nail ngaol dai, nvjuq ya gaiq-a nail ngaol. 25-26 Alheel ngel-i mail, nvjuq maoqbhaoq nl khi neema teevq heeq taivq-ail tavq nail lavqkhoel nee, nuljuq jaol nail bha bhi lee nail dai, tsaol-aq niil nvq gaq bhai tsel dov-a nail ngaol. Ngadao nail Heeqphaq Yeiqsul Khali nail haqbhoil yovqgavq nail aqmaol danq bhiq-ai thaq nail, nvjuq mao-ail gaiq-a nail Bhaqnaqbhal khi Paolluv nee mail, aqyu nvq gaq bhai bhi lee-a nail ngaol. 27 Alheel ngel-i mail, Yuldav khi Siqlav bhai khoel khi, haoqgavq lavqkhoel bhai gevq-ai thaq nail ganl juq, nuljuq bhai bhi ge bhiq lee-a nail ngaol. 28 Lao heeq phaq-ail tsaq nail niil juq nee ovqtavq, yalkav aqliq yaoq phaq yaoq, nuljuq nail kovtavq bhai maq ya bavq dav dai, Meeqnail Haolnail Aqhaqlal iqsanl, nvjuq iqsanl neema tsaq nail ngaol. 29 Nuljuq lao heeq phaq-ail tsaq nail juq neq, niil juq ngaol. Thaoqphaoq aqma maolkhoel bhai laol bhiq thaq nail jaqjaq daoldaol jaq nail, aqsivq jaq nail, phee heivq thaq nail haqjoil jaq nail, khaqmiq sev nail, niil juq ngaol. Nuljuq niil juq bhai lao haq neq, meeq deedee nail ngaol. Nuljuq jaol hal dov dei-eiq” dai, gevq-ai thaq nail ngaol.

30 Khoel gai-aivq-a nail aqyu juq dov ail khi, Aqdil-aoq meenq bhai ail kev-u phao, Khali yaq munl munl lao-ail khul jil khi, aqyu juq bhai haoqgavq al bivq-a nail ngaol. 31 Aqyu juq haoqgavq al keiv bhai ge daiq-u phao, aqyu juq bhai gaq bivq nail ganl gevq-ai thaq nail ngel-i mail, lavqkhiq tsail deedee nail ngaol. 32 Yuldav khi Siqlav iqsanl, Miqyail nail haqbhoil gedan nail tsaol-aq ngel-i mail, aqivq jaqbheq Khali yaq juq bhai aqmeeq-ai cavq bhiq cov bhiq gaq bivq khi, bhi ivq lal-a nail ngaol. 33 Aqyu nvq gaq a bhai micil tsaq dai jaol-a nail ngaol. A bhai nee ngal-aq, aqyu nvq gaq bhai khoel-ai leevq-a nail juq jaol nail bha kovq lai nail khi-u phao, “Nul-nq nvq gaq neesal-ovq dei-eiq” dai, aqivq jaqbheq Khali yaq al juq alhai ge bhiq khi, bhi kovq lai-a nail ngaol.

34 [Aq-u phao, “Ngal neq, niai jaol nail tsaq-ail nia” dai, Siqlav noeq nail ngaol.]

35 Thailhai ngaol-aoq, Paolluv khi Bhaqnaqbhal neq, Aqdil-aoq meenq bhai jaol ail ceevq-a nail ngaol. Aqyu nvq gaq neq, yu mee nia gaq nee mail Miqyail nail daoq cavq bhiq cov bhiq khi, daoq cavq cavq bhiq-a nail ngaol.

36 Aqn aqyanq micil maoq lal-u phao, Paolluv Bhaqnaqbhal bhai ge bhiq-a nail: “Ngadao nvq gaq-i mail Miqyail nail daoq khal cavq-ail ceevq-a nail meenq yaoq meenq yaoq-ao nee bhai nalga ail khi, neema thaqtsaol nail tsaol-aq pevq nail aqivq jaqbheq al juq, khalhai jaol nail ngel-ail dai, heldaiq ail bhel” dai, ge bhiq-a nail ngaol. 37 Bhaqnaqbhal neq, Maqkul dai khul nail Yaolhaq bhai iqsanl, hel-aivq movq nail ngaol. 38 Thailhai ngaol-aoq, “Aivq bhai hel-aivq nail maq tsaq-ail” dai, Paolluv noeq nail ngaol. Khul khi mail dai ngal-aq neq, iqmoeq-u phao, Miqyail nail daoq cavq cavq cavq-ail tsao ail-u phao, ganl maq nl gil dai, Paqbhullil milkhaoq bhai ail kev-u phao, aqyu nvq gaq bhai khaonq-ail ceevq-a nail ngaol. 39 Aqyu nvq gaq nail gaiqlaq bhai ganl al bhaqda nee mail jil pheeljaq khi, pav ail-a nail ngaol. Bhaqnaqbhal gaq neq, Yaolhaq Maqkul bhai hevq khi, Gulbhaqlul milkhaoq bha laovq jeeq khi ail-a nail ngaol. 40 Paolluv gaq neq, aqivq jaqbheq Khali yaq nee mail, aivq bhai Miqyail nail geeqlaoq eeljaol nail lavqkhoel bhai av bhiq gaq khi pultavq, Siqlav bhai tsel dov khi hel-aivq-a nail ngaol. 41 Sulliv milkhaoq khi Gillilciv milkhaoq bhai ail pav khi, Khali yaq munl juq ivq lal dai, gaq bivq-a nail ngaol.