1-2 Ngal neq, Miqyail neema tsaq nail ngel-i mail, Yeiqsul Khali nail yaqkav jiovq thailthaiq nail Paolluv ngaol. Jaqbheq Tilmolseiq nv-nvq gaq Gaollaolsail meenq bhai jaol nail Miqyail nail tsaol-aq juq bhai haoqgavq niil gevq bhoel-ai leevq-a nail ngaol. Nuljuq neq, Khali bhai saljial ivq nail aqivq jaqbheq juq ngaol. Ngadao nail Aqbhu Miqyail nail geeqlaoq eeljaol khi neesal-ovq nail phaq nuljuq nail kovtavq bhai jiav dei-eiq.

3 Nvjuq nuljuq nail haqbhoil geeqlaoq hal-u phao, ngadao nail Heeqphaq Yeiqsul Khali nail Aqbhu Miqyail bhai khaq mao iqsanl tsiqeeq nail ngaol. 4 Khul khi mail dai ngal-aq neq, nuljuq Yeiqsul Khali bhai neema thaqtsaol nail ganl maqkhaiq, nuljuq Miqyail nail tsaol-aq iqsanl bhai gaiq-a nail ganl maqkhaiq, nvjuq ya gaiq-a nail ngaol. 5 Nuljuq nqtavq kovtavq bhai jiav nail geeqlaoq bhai noeqthunq nail ngel-i mail, alhai neema thaqtsaol khi gaiq-a nail ngaol. Noeqthunq nail al phaq neq, maldil tsaq nail lavqkhiq tsail nail geeqlaoq daoq cavq nail bhai, nuljuq aq-u nee ya gaiq-a nail ngaol. 6 Lavqkhiq tsail nail geeqlaoq daoq niil neq, nuljuq jaol nail bha kev lee-a nail nee ovqtavq, miltsaq kovtavq bhai doi dai aqheeq heeq lee khi eeq lal nail khe-ai, nuljuq ya gaiq khi Miqyail nail geeqlaoq eeljaol maldil tsaq nail lavqkhoel bhai ya heeq nia-u n-gaol nee mail, nuljuq nail lavqkhoel bhai iqsanl aqheeq heeq lee khi eeq lal thailthaiq nail ngaol. 7 Nvjuq nee mail teevq gaq khe-ai ganl nl nail, nvjuq mao-ail gaiq-a nail Ilbhaqphaqlal bhaqda nee nuljuq lavqkhiq tsail nail geeqlaoq daoq al ya gaiq-a nail ngaol. Aivq neq, nvjuq nail haqbhoil saljial ivq nail lavqkhoel nee Khali nail ganl nl nail gaq ngaol. 8 Aqhaqlal Miqyail bhaqda nee nuljuq-i mail ya-a nail goil nail gaiq-a nail ganl al, niil aq-il, aivq nvjuq bhai ge lavq-a nail ngaol.

9 Alheel ngel-i mail, nuljuq nail ganl bhai nvjuq ya gaiq-u n-gaol nee, nvjuq nuljuq nail haqbhoil maq naq lai dai, geeqlaoq hal nail ngaol. Aqhaqlal Miqyail phao khe neenoeq neekha khi noeqheeq noeq dov nia nail iqsanl nail lavqkhoel nuljuq Miqyail neema tsaq nail phaq bhai teevq bhee teevq lovq heeq nia lal dai iqsanl, nvjuq geeqlaoq hal nail ngaol. 10 Nuljuq alhai heeq nia lal haq neq, Heeqphaq Yeiqsul bhai geel-nvq nail khe-ai, aqdoevq doevq khi, yaoq phaq yaoq-ao nee nail lavqkhoel aivq nuljuq bhai neekhaol sil nail ngaol. Al ovqtavq, nuljuq aqmeeq yaoq phaq yaoq-ao nee nl nail hal nail lavqkhoel nee aqheeq heeq lee khi Miqyail bhai teevq pov nee teevq pov heeq nia jaiq lal nail ngaol. 11 Bhaqaoq mao-ail eeq nail Miqyail nail seiqleiq khaoqsail bhaqda nee, nuljuq lavqkhiq teevq tsail neema ivq nail lavqkhoel yaoq phaq yaoq-ao nail lavqkhoel bhai ol nia dai, Miqyail nuljuq bhai bhaqaoq bivq yaoq dai iqsanl, nvjuq nuljuq nail haqbhoil geeqlaoq hal thailthaiq nail ngaol. 12 Aqbhaq nail milkhaoq lavqkhoel aivq nail tsaol-aq juq nail haqbhoil, lainq-ai thaq nail geeqlaoq bhai ya nail geel-nvq dai, nl lavq-a nail Aqbhu Miqyail bhai, nuljuq lavqkhiq teevq tsail tsiqeeq yaoq.

13 Aqbhu Miqyail neq, aqnav nail bhaqaoq lavqkhoel nee ngadao bhai bhi jel-ail lavq khi, aivq mao-ail gaiq-a nail aivq nail Yaqyov nail milkhaoq lavqkhoel bhai bhi aol lai lavq-a nail ngaol. 14 Yaqyov al gaq ngadao bhai hevqkovq lavq khi, oeqbal iqsanl mail phaiq lavq-a nail ngaol.

15 Tsaol-aq yaq Miqyail bhai maq moel nia-ail. Yeiqsul bhai moel haq neq, Miqyail bhai moel-a nail khe-ai dul nail ngaol. Khal teivq-ai thaq nail yaoq phaq yaoq-ao nee nail kovtavq bhai Yeiqsul neq, aqivq ivqsaq gaq ngaol. 16 Nqtavq kovtavq khi mail miltsaq kovtavq bhai khal jaol khal jiav nail juq maqkhaiq, moel lal nail juq khi maq moel lal nail juq maqkhaiq, nqtavq khi miltsaq nail gaiqlaq bhai uvthaiq nail juq maqkhaiq, bhaqaoq eeq nail juq maqkhaiq, eeq nail heel nail juq maqkhaiq, heeqphaq juq iqsanl bhai maqkhaiq, Yeiqsul bhai juq khi Miqyail-i mail teivq-ai thaq nail ngaol. Yaoq phaq yaoq-ao nee aivq nail lavqkhoel-ai teivq-ai thaq nail ngaol. Yaoq phaq yaoq-ao nee aivq nail haqbhoil teivq-ai thaq nail ngaol. 17 Khul teevq phaq iqsanl maq doevq maq jaol lal-u nee mail, Yeiqsul aqdoevq doevq khi jaol thailthaiq nail ngaol. Yaoq phaq yaoq-ao nee aivq nail lavqkhoel bhai ivq khi doevq thailthaiq nail ngaol. 18 Aivq neq, Khali yaq munl nail uqhuq ngaol. Khali yaq munl neq, aivq nail aqmaol ngaol. Aivq neq, iqmoeq ilmoeq khe gaq ngaol. Aivq neq, yaoq phaq yaoq-ao nee nail lavqkhoel meeq jaiq bhee jaiq nail iqmoeq khe gaq pevq lal dai, iqmoeq ilmoeq doevq kovq lal-a nail gaq ngaol. 19-20 Miqyail nail bhee lovq nail phaq iqsanl mail Yeiqsul nail lavqkhoel-ai aol lal khi, lavqyavq kovtavq bhai il lee-a nail aivq nail aqsivq bhaqda nee, miltsaq kovtavq-ai khal jaol khal jiav nail juq maqkhaiq, nqtavq kovtavq bhai khal jaol khal jiav nail juq maqkhaiq, yaoq phaq yaoq-ao nee Miqyail bhai tsaq lal jil lal dai, Miqyail neekhaol sil nail ngaol.

21 Jel lal-u phao, nuljuq Miqyail nee gaoqceiv ceiv ail-a nail ngaol. Nuljuq haqeiv nail phaq nl-a nail ngel-i mail, nuljuq nail neema lavqkhoel nee aivq bhai neejiav jiav nail ngaol. 22 Thailhai ngaol-aoq, aqsivq haqjoil bhao nail Yeiqsul nail aqmaol khanq sil-a nail ngel-i mail, niil aq-il nuljuq Miqyail bhai bhi tsaq bhi jil lal dai, Miqyail nl-a nail ngaol. Aivq alhai nl nail neq, nuljuq bhai tsaolmeeq tsaolhaol, oeqbal thaq duq maq jiav nail tsaol-aq khi, yu khul dai ge duq maq jiav nail tsaol-aq bhi pevq lal khi, aivq nail sivtavq bhai ya aol kev lai nail dai khi, nl lavq-a nail ngaol. 23 Alhai pevq lal dai, nuljuq-i mail neema thaqtsaol-a nail phaq ivqdao dai, nieivq thaiq dal laivq yaoq. Nuljuq-i mail ya gaiq-a nail lavqkhiq tsail nail geeqlaoq daoq bhai tavq nail noeqthunq nail phaq bhai thaq khaonq ha. Nqtavq nail kov-uvq bhai khal teivq-ai thaq nail yaoq phaq yaoq-ao nee bhai, lavqkhiq tsail nail geeqlaoq daoq al yu cavq bhiq nail ngaol. Ngal iqsanl, geeqlaoq daoq al cavq bhiq thailthaiq nail gaq pevq lal-a nail ngaol.

24 Niil aq-il, ngal nuljuq nail haqbhoil haq dee aoq deedee nail bhai ya daq nail neq, ngaq-ai lavqkhiq tsail-ail nial. Khali-i mail maq ya daq gil-a nail haq dee aoq deedee nail juq bhee lal dai, aivq nail aqmaol nail haqbhoil ngaq nail aqmaol lavqkhoel bhai ngal daq thailthaiq nail ngaol. Aivq nail aqmaol dai ge nail neq, Khali yaq munl bhai ge nail ngaol. 25 Miqyail nail daoq teevq bhee bhi heeq bhi gaiq-ail nia dai, Miqyail ngaq bhai tsel dov-ai thaq nail khe-ai, ngal neq, nuljuq nail haqbhoil ganl niil nl yaoq dai, aivq ngaq bhai khoel-ai thaq nail ngaol. 26 Milnee uqnee Miqyail-i mail teevq yeel nee teevq yeel oiltsail-ai thaq nail aivq nail daoq al, niil aq-il, aivq aivq nail tsaol-aq juq bhai phaodaiq bhiq nail ngaol. 27 Yu nail jeq-e jaq-a nail haqbhoil Miqyail-i mail oiltsail-ai thaq nail daoq al neq, seiqleiq khaoqsail khadai eeq khadai meeq nail ganl, aivq aivq nail tsaol-aq bhai bhi heeq nia movq nail ngaol. Nuljuq iqsanl yu nail jeq-e jaq-a nail lavqkhoel bhai aol nail ngaol. Oiltsail-ai thaq nail daoq al neq, Khali nuljuq nail lavqkhoel bhai jaol nail ngel-i mail, nuljuq seiqleiq khaoqsail al bhai ya dai, noeqthunq nail phaq jiav nail ngaol.

28 Nvjuq aivq nail ganl daoq cavq cavq nail ngaol. Khalhai khi ngaol-aoq, tsaol-aq yaoq gaq yaoq-ao nee Khali nail lavqkhoel bhai bhee lal khi, nvjuq aqyu juq bhai Miqyail nail sivtavq-ai av bhiq kivq dai, “Yaolphaol yaoq dei-eiq” dai, nvjuq tsaol-aq yaoq gaq yaoq-ao nee bhai ge bhi nail nee ovqtavq, neenoeq neekha iqsanl mail yuq yuq-ail, cavq bhiq cov bhiq thailthaiq nail ngaol. 29 Al nail haqbhoil ngal laijai deedee nail ngaol. Khali ngaq bhai bhaqaoq bivq lavq khi, aivq ngaq nail lavqkhoel bhai ganl nl thailthaiq nail khe-ai, ngal iqsanl laijai deedee nail ngaol.