1 Ngal niailhai ge movq-ail nial. Jaiqbhoil ovq nail gaq, jaiqbhoil iqsanl aivq nail pevq khi ngaol-aoq, aivq yaqnoil-ail jiav-u phao neq, yaqkav teevq gaq khe-ai ya jaol nail ngaol. 2 Aivq nail aqbhu-i mail ge ceiv-ai thaq nail al yanq maq kev lal-u phao kev dai, yaq al gaq aivq bhai heldaiq phail nail juq khi yalkav bhai heldaiq phail nail juq nail kov-uvq bhai jaol nail ngaol. 3 Alhai dul dai, ngadao yaqnoil-ail jiav-u phao neq, miltsaq bhai tavq nail aol juq nail kov-uvq bhai yaqkav ya jiovq-a nail ngaol. 4-5 Thailhai ngaol-aoq, aoldaoq kovqdaoq nail kov-uvq bhai laolthaiq-ai thaq nail ngadao bhai ul kovq khi, Miqyail nail yaq pevq lal dai, aqyanq kev lal-u phao, Miqyail aivq nail Yaqyov bhai khoel-ai leevq-a nail ngaol. Yaqyov al gaq, yaqmai-aq nee mail doevq lee-a nail ngaol. Aoldaoq kovqdaoq nail kov-uvq bhai doevq lee-a nail ngaol. 6 Nuljuq Miqyail nail yaq pevq nail ngel-i mail, “Aqbhu-ol, ngaq nail Aqbhu-ol” dai, bhiq gul nail dai khi, aivq nail Yaqyov nail Aqhaqlal, ngadao nail neema lavqkhoel bhai bhi jaol lee-a nail neq, Miqyail-i mail khoel-ai leevq-a nail ngaol. 7 Alheel ngel-i mail, naol miltsaq bhai tavq nail aol nail yaqkav maq ngel yaoq-aol. Naol Miqyail nail yaq ngaol. Miqyail nail yaq ngel-i mail, Miqyail bhaqda nee jaiqbhoil iqsanl ovq naol.

8 Jel lal-u, nuljuq Miqyail bhai maq heeq nia-u phao, miqyail maldil maq ngel nail juq nail kov-uvq bhai yaqkav jiovq-a nail ngaol. 9 Thailhai ngaol-aoq, niil aq-il neq, Miqyail bhai heeq nia nail nee ovqtavq, maldil dai, ge haq neq, Miqyail nuljuq bhai heeq nia nail ngaol. Khul khi mail, gaq bhaq deedee khi khul teevq phaq iqsanl, maq nl nia nail miltsaq bhai tavq nail aol juq, gaoq nl kovq ail nail-aiq. Nuljuq al juq nail yaqkav gaoq jiovq movq nail laiq. 10 Nuljuq neq, nv lao lao-ai haq nail ngaol. Lav lov lav ceiv iqsanl, aqkovq aqlav iqsanl lao-ai haq nail ngaol. 11 Ngaq-i mail nuljuq nail haqbhoil khal nl khal hal-a nail juq, aqnieivq-ail pevq-ail nail khul-il dai, ngaq bhai khaoqlaol-ail nial.

12 Aqivq jaqbheq juq-ol, ngal nuljuq khe-ai pevq lal-a nail ngel-i mail, nuljuq iqsanl, ngaq-ai khe-ai pevq lal yaoq dai, hal nail ngaol. Nuljuq-i mail ngaq bhai nl laiq lavq-a nail teevq phaq iqsanl, maq jiav-ail. 13 Ngal nal nail ngel-i mail, nuljuq bhai iqmoeq khe pov lavqkhiq tsail nail geeqlaoq daoq ya cavq bhiq-a nail ngaol dai, nuljuq heeq nia nail ngaol. 14 Ngal alhai nal kav khoeq-u phao, nuljuq nail haqbhoil haq khi ngaol-aoq, nuljuq ngaq bhai khal nl movq-ail maq nl lavq-al. Khaonq iqsanl, maq khaonq lavq-al. Nqtavq gaqkhoel bhai hav nail khe-ai, hav lavq khi, Yeiqsul Khali bhai hav nail khe-ai iqsanl, hav lavq-a nail ngaol. 15 Aq-u khe nuljuq nail lavqkhiq tsail nail al, niil aq-il khaq bha bhi peivq ail-aoq nail-aiq. Khul khi mail dai ngal-aq neq, nuljuq nail maivneev kevq dov khi ngaq bhai oil covq lavq nia nail kheel nul neq, oil covq lavq nail ngaol dai, nuljuq nail ganl ngal salkhil khanq kivq naol. 16 Niil aq-il ngal nuljuq bhai maldil tsaq nail phaq ge bhiq-a nail ngel-i mail, ngal nuljuq bhai neejiav jiav nail tsaol-aq pevq lal-a nail laiq.

17 Tsaol-aq al juq nuljuq nail haqbhoil neema kev deedee nail khe-ai, dul nail ngaol. Thailhai ngaol-aoq, aqmeeq phaq noeq khi neema kev nail maq ngel-ail. Nuljuq khi aqyu juq teevq dao bhai tavq lai nia dai, nuljuq ngaq-ai nee pav-ail nail bhai, aqyu juq oil movq nail ngaol. 18 Aqyu juq aqmeeq phaq noeq khi neema kev nail neq, aqmeeq ngaol. Ngal nuljuq nee mail jaol-u phao taivq-ail maq ngel nail, khaq mao iqsanl alhai nl nail neq, aqmeeq ngaol. 19 Ngaq nail yaq juq-ol, nuljuq Khali nail lavqkhoel bhai eeq lal heel lal-u kev dai, yaq tsiq-u phao nal nail khe-ai, ngal nuljuq nail haqbhoil teevq pov gaoq nal thailthaiq nail ngaol. 20 Ngal nuljuq bhai noeq-u maq dov-il. Alheel ngel-i mail, niil aq-il nuljuq nee mail jaol khi, aqthel lav phal khi mail cavq bhiq movq-ail nial.

21 Aoldaoq kovqdaoq nail pul-nvq bhai jaol movq nail juq-ol, nuljuq aoldaoq kovqdaoq ge nail bhai gaiq lal-ail laiq. Ngaq bhai ge daiq lavq yaoq. 22 Jalliq lavqkhoel bhai niailhai gevq-ai thaq nail ngaol: Aqbhaqlaqhaq nail yaqyov nvq gaq jaol nail ngaol. Teevq gaq neq, yaqkav jiovq nail yaqmai-aq gaq nail ovq nee doevq lee-a nail ngaol. Teevq gaq neq, jel ail-a nail yaqmai-aq gaq nail ovq nee doevq lee-a nail ngaol. 23 Yaqkav jiovq thailthaiq nail yaqmai-aq gaq nail ovq nee doevq lee-a nail gaq neq, aqsivq haqjoil nail neenoeq bhaqda nee doevq lee-a nail ngaol. Bhuq-ail laoq ail-a nail yaqmai-aq gaq nail ovq nee doevq lee-a nail gaq neq, Miqyail-i mail saljial jaq-ai thaq nail khe-ai, doevq lee-a nail ngaol.

24 Ganl niil ganl nee tsiqceiv daiq haq neq, saol oil nail phaq aol nail ngaol. Yaqmai-aq al nvq gaq neq, daoqma saljial nvq phaq ngaol. Teevq gaq neq, Silnaq gaoqjaoq khe daoqma saljial bhai tavq nail Haqgaqlal ngaol. Aivq yaq tsiq-a nail neq, aoldaoq kovqdaoq nail yaqkav bhi jiovq nail dai khi, tsiq-a nail ngaol. 25 Haqgaqlal neq, Aqlal milkhaoq bhai jiav nail Silnaq gaoqjaoq ngaol. Niil aq-il jiav nail Yeiqlulsaqlaiq meenq bha ge movq nail ngaol. Khul khi mail dai ngal-aq neq, aivq iqsanl, aivq nail yaq juq iqsanl, aoldaoq kovqdaoq nail yaqkav jiovq nail ngaol. 26 Thailhai ngaol-aoq, nqtavq kovtavq bhai jiav nail Yeiqlulsaqlaiq meenq neq, jel ail-a nail yaqmai-aq gaq pevq nail ngaol. Aivq neq, ngadao nail aqma ngaol. 27 Jalliq lavqkhoel bhai niailhai gevq-ai thaq nail ngaol:

gevq-ai thaq nail ngaol.

28 Aqivq jaqbheq juq-ol, Ilcav neq, Miqyail-i mail saljial jaq-ai thaq nail khe-ai doevq lee-a nail ngaol. Ngadao iqsanl alhai doevq lee-a nail ngaol. 29 Aqsivq haqjoil nail neenoeq bhaqda nee doevq lee-a nail yaqyov al gaq, Aqhaqlal Miqyail bhaqda nee doevq lee-a nail yaqyov al gaq bhai khoeq bhiq jiovq bhiq nail khe-ai, niil aq-il iqsanl, khoeq bhiq jiovq bhiq nail ngaol.

30 Jalliq lavqkhoel bhai khalhai gevq-ai thaq nail-aiq.

“Yaqkav jiovq nail aqyu nvq mayaq bhai the ha yaoq. Khul khi mail dai ngal-aq neq, yaqkav jiovq nail yaqmai-aq al gaq nail yaqyov neq, bhuq-ail lao ail-a nail yaqmai-aq al gaq nail yaqyov nee mail jaiqbhoil teevq peivq-ail maq ya-ail” dai,

gevq-ai thaq nail ngaol.

31 Aqivq jaqbheq juq-ol, ngadao neq, yaqkav jiovq nail yaqmai-aq al gaq nail yaq maq ngel. Jel ail-a nail yaqmai-aq al gaq nail yaq ngaol.