Yaolhaq
Gevq-a nail gaq
Haoqgavq niil keiv neq, khaq sil gaq-i mail gevq-a nail dai aqduq aqtsil tsil dai maq gevq bhoel-ai thaq khi ngaol-aoq, milnee uqnee khe Khali yaq, Gaqkhoel Yaolhaq-i mail gevq-a nail ngaol dai, noeq nail ngaol. Khul khi mail dai ngal-aq neq, haoqgavq niil haoqnao naosaq bhai Yaolhaq aivq nail aqmil maq gevq dai, yovqgavq bhai yovqgavq Yeiqsul mao-ail gaiq-a nail yaqlaol dai, khul nail ngaol. Jalliq lavqkhoel bhai Yeiqsul mao-ail gaiq-a nail dai, ge nail gaq neq, Yaolhaq ngaol dai, moel lal nail ngaol. Yeiqsul nail gaqkhoel maq jiovq lal-u phao, ulcuvq saol bhiq nail Yaolhaq nail yaqlaol jiovq daiq-a nail ngaol. Khaq mao iqsanl Yeiqsul nail aqjail bhai jaol nail al hail gaq neq, Yaqkov, Bheiqtuvluv, khi Yaolhaq ngaol. Yaolhaq dai ge nail daoqceevq neq, Miqyail-i mail gaoqhaq bhiq-a nail dai, ge movq nail ngaol. Aivq bhai, nqjaiq jaiq nail khe-ai dul nail yaq dai iqsanl, khul nail ngaol. Yaolhaq nail aqbhu neq, Seiqbheiqdail dai khul khi, Yaqkov neq, aivq nail mailnail ngaol. Saqloqmeiq neq, aivq nail aqma ngel nail jao-aq. Yaolhaq neq, Bheiqtuvluv khi Aqdaiqlaiq aqyu nvq mailnail khe-ai, delgil nieivq jaq nail ngaol. Yaolhaq Jalliq niil ngaq doiq gevq-a nail ngaol. Yaolhaq, 1, 2, 3 Yaolhaq khi Phaodaiq niil juq ngaol.
Gevq-a nail aqyanq khi aqduq
Gevq-a nail aqyanq neq, A.D. 85-95 kovq nail gaiqlaq bhai ngaol. Eilpheilsu nail meenq bhai jaol khi gevq-a nail ngaol dai, noeq nail ngaol.
Khaq sil gaq bhai gevq bhiq-a nail
Yaolhaq haoqgavq niil doiq gevq-u phao, Khali yaq munl eeq lal khi gaq kav lal-aoq nail ngaol. Alheel ngel-i mail, milkhaoq doi dai jaol nail Khali yaq bhai gevq bhiq-a nail haoqgavq ngaol. Teevq jeq-e bhai taivq-ail noeq kev khi gevq-a nail maq ngel-ail. Heiqlaqsal tsaol-aq iqsanl, Miqyail nail Yaqyov Yeiqsul Khali bhai bhi heeq nia lal, neema bhi thaqtsaol lal dai, gevq-ai thaq nail ngaol.
Khul bhai noeqthunq khi gevq-a nail
Haoqgavq niil keiv, Yeiqsul neq, aqdoevq doevq nail Miqyail nail Yaqyov ngaol dai, bhi heeq nia nail haqbhoil gevq-a nail ngaol. Al ovqtavq, Yeiqsul neq, Miqyail ngaol. Aivq bhai neema khal thaqtsaol nail juq nqmaq maqluv halyeel ya doevq nail ngaol dai, cavq naq lavq-a nail nee ovqtavq, Yaolhaq lavqkhiq tsail nail geeqlaoq daoq Khali yaq munl neema thaqtsaol nail phaq ivq lal dai iqsanl, gevq-a nail ngaol.
1
Miqyail nail daoq, tsaol-aq pevq lee khi, jaol lee-a nail ganl
Iqmoeq-u nee Daoq jiav nail ngaol. Daoq al neq, Miqyail nee mail jaol khi Daoq al neq, Miqyail ngaol. Daoq al neq, iqmoeq-u nee Miqyail nee mail jaol nail ngaol.
Khal jaol, khal jiav nail iqsanl, aivq-i mail teivq-ai thaq nail ngaol. Khal teivq-ai thaq nail juq nail lavqkhoel, aivq-i mail maq teivq-ai thaq nail teevq phaq-ail, maq jiav-ail. Aivq nail lavqkhoel bhai doevq nail phaq aol nail ngaol. Doevq nail al neq, tsaol-aq yaq nail aqbhaq ngaol. Aqbhaq al neq, aqnav nail lavqkhoel bhai bhaq nail ngaol. Aqnav neq, aqbhaq al bhai maq gaq lai nia-ail.
Miqyail-i mail bhi lee-a nail Yaolhaq dai, mil-ai thaq nail teevq gaq jaol nail ngaol. Aivq neq, aqbhaq al nail ganl salkhil khanq lee-a nail ngaol. Aivq bhaqda nee tsaol-aq iqsanl mail, aqbhaq al bhai neema thaqtsaol lal dai, aivq salkhil khanq lee-a nail ngaol. Aivq neq, aqbhaq al maq ngel-ail. Aqbhaq al nail ganl salkhil khanq lee-a nail teevq-eel ngaol. Maldil pevq nail aqbhaq al neq, miltsaq kovtavq bhai lee khi, tsaol-aq yaq iqsanl bhai bhaq bhiq lee nail ngaol.
10 Aivq neq, miltsaq kovtavq bhai jaol nail ngaol. Miltsaq niil aivq-i mail teivq-ai thaq nail ngaol. Thailhai ngaol-aoq, miltsaq yaq juq aivq bhai maq heeq nia-ail. 11 Aivq nail jaol duq bhai, aivq lee khi ngaol-aoq, aivq nail jeq-e jaq-a juq aivq bhai maq hav-al. 12 Thailhai ngaol-aoq, aivq bhai khal hav bhoel nail tsaol-aq, aivq bhai neema khal thaqtsaol nail tsaol-aq iqsanl mail, Miqyail nail yaq pevq lal nail aqkhaoqanq ya-a nail ngaol. 13 Aqyu juq Miqyail nail yaq pevq lal-a nail neq, jeq-e jaq-a bhaqda nee maq ngel-ail. Aqsivq haqjoil nail neenoeq neekhaol bhaqda nee iqsanl, maq ngel-ail. Yaqyov-aq nail neenoeq neekhaol bhaqda nee iqsanl maq ngel-ail. Miqyail bhaqda nee aqyu juq Miqyail nail yaq pevq lal-a nail ngaol.
14 Daoq al neq, tsaol-aq pevq lee khi, ngadao nee mail jaol lee-a nail ngaol. Aivq nail seiqleiq khaoqsail bhai nvjuq ya moel-a nail ngaol. Seiqleiq khaoqsail al neq, Aqbhu Miqyail nee mail dov lee-a nail Yaqyov teevq gaq teevq-eel nail seiqleiq khaoqsail ngaol. Yaqyov al gaq neq, geeqlaoq eeljaol khi mail saljial ivq nail phaq teevq bhee aol nail ngaol.
15 Yaolhaq aivq nail ganl salkhil khanq khi niailhai gul nail ngaol: “Ngaq nail haoqnao lee nail gaq neq, ngaq-ai nee maqtsil eeq nail ngaol. Khul khi mail dai ngal-aq neq, ngal maq doevq lee-u nee mail, aivq doevq nail ngaol dai, ngaq-i mail ge nail al gaq neq, aivq ngaol” dai, Yaolhaq mailma-ail salkhil khanq nail ngaol. 16 Aivq nail lavqkhoel bhai geeqlaoq eeljaol teevq bhee aol nail ngaol. Geeqlaoq al juq teevq phaq khai-aq neq, teevq phaq ngadao ya nail ngaol. 17 Miqyail aoldaoq kovqdaoq bivq lavq-u phao, Molseiq bhai juq khi, bivq lavq-a nail ngaol. Thailhai ngaol-aoq, geeqlaoq eeljaol khi saljial ivq nail phaq neq, Yeiqsul Khali nee mail dov lee-a nail ngaol. 18 Tsaol-aq teevq gaq iqsanl, Miqyail bhai maq moeldaiq gaoq-aol. Aivq teevq gaq taivq-ail Miqyail pevq khi, Aqbhu nail jail-nq bhai jaoldeel-nvq thaq nail Yaqyov al gaq neq, Miqyail khaq sil gaq pevq nail ganl, phaodaiq lee-a nail ngaol.
Ulcuvq saol bhiq nail Yaolhaq salkhil khanq nail ganl
19 Yeiqlulsaqlaiq meenq bha jaol nail Yuldav nail tsaol-aq juq neq, Philma juq khi mail Leiqbhil tsaol-aq juq bhai, Yaolhaq jaol nail bha khoel gai-aivq-a nail ngaol. “Naol khaq sil gaq” dai, aqyu juq Yaolhaq bhai naldaiq-u phao, Yaolhaq salkhil niailhai khanq-a nail ngaol: 20-21 Aivq maq jil mail, “Ngal neq, Khali maq ngel” dai, daolcoev dai, ge bhiq-a nail ngaol. A bhai nee ngal-aq, aqyu juq gaoq naldaiq nail: “Thailhai phal-iq neq, naol Eillilya laiq.” “Ngal Eillilya maq ngel” dai, aivq ge kovq bhiq-a nail ngaol. “Naol Miqyail nail haqbhoil gedan nail al gaq laiq” dai, gaoq naldaiq nail ngaol. “Maq ngel” dai, aivq gaoq ge kovq bhiq-a nail ngaol.
22 Tsaol-aq al juq ge nail: “Naol khaq sil gaq dai, nvjuq bhai khoel-ai leevq-a nail tsaol-aq juq bhai cavq lai kivq dai, naol yovqgavq bhai yovqgavq, khaq sil gaq dai, ge heeq” dai, gaoq naldaiq nail ngaol.
23 Yaolhaq ge nail: “Miqyail nail haqbhoil gedan nail Ilsaqyal-i mail ge-ai thaq nail khe-ai,
‘Heeqphaq lee nail haqbhoil
gailkhaol lav daol yaoq’ dai,
haqtsoiq haqyal bhai jaol khi gul nail al gaq, ngal ngaol” dai, ge kovq bhiq-a nail ngaol.
24 Naldaiq lee-a nail tsaol-aq al juq neq, Phaqliqsail juq-i mail khoel-ai leevq-a juq iqsanl, kheq nail ngaol. 25 Aqyu juq ge nail: “Naol neq, Khali iqsanl maq ngel. Eillilya iqsanl maq ngel. Miqyail nail haqbhoil gedan nail al gaq iqsanl maq ngel nail phal-iq neq, khul khi mail, naol yu bhai ulcuvq saol bhiq nail-aiq” dai, naldaiq-a nail ngaol.
26 Yaolhaq ge nail: “Ngal yu bhai ulcuvq lavqkhoel bhai, ulcuvq saol bhiq nail ngaol. Thailhai ngaol-aoq, nuljuq maq heeq nia nail tsaol-aq teevq gaq, nuljuq nee mail jaol nail ngaol. 27 Aivq neq, ngaq nail haoqnao lee nail gaq ngaol. Ngal neq, aivq nail saiqnaov neeqtsaq bhai iqsanl pheel nail maq geel-nvq-ail” dai, ge bhiq-a nail ngaol.
28 Yaolhaq Yaoldaq laoljaol a phao lelkhel bhai jiav nail Bheiqtaqnil nail julgu bhai jaol khi, ulcuvq saol bhiq-u phao, aqyu juq Yaolhaq bhai alhai naldaiq-a nail ngaol.
Miqyail nail Yaolyaq bhai heldaiq
29 Yaoq n yaoq, aivq jaol nail bha Yeiqsul lee nail bhai, Yaolhaq ya moel-u phao, aivq ge nail: “Miltsaq yaq nail oeqbal bhai phi ha lee-a nail Miqyail nail Yaolyaq bhai heldaiq daiq. 30 ‘Ngaq nail haoqnao lee nail gaq, ngaq-ai nee maqtsil eeq nail ngaol. Khul khi mail dai ngal-aq neq, ngal maq doevq lee-u nee mail aivq doevq nail ngaol’ dai, ngaq-i mail ge nail al gaq neq, aivq ngaol. 31 Iqmoeq-u, ngal aivq bhai maq heeq kivq-al. Thailhai ngaol-aoq, Ilsaqleiqlal nail tsaol-aq aivq bhai aqmeeq-ai ya heeq ya moel dai, ngal lee khi, yu bhai ulcuvq lavqkhoel bhai ulcuvq saol bhiq lee-a nail ngaol” dai, ge bhiq-a nail ngaol.
32 Al ovqtavq, Yaolhaq salkhil khanq khanq-ail ge nail: “Meeqnail Haolnail Aqhaqlal khaoqkhoiq khe-ai nqtavq kovtavq nee yavq kha lee khi, aivq nail kovtavq-ai deivq lee-a nail bhai, ngal ya moel-a nail ngaol. 33 Iqmoeq-u ngal aivq bhai maq heeq kivq-al. Thailhai ngaol-aoq, ‘Ulcuvq lavqkhoel-ai yu bhai ulcuvq saol bhiq yaoq’ dai, ngaq bhai khoel nail gaq, ngaq bhai niailhai ge lavq-a nail ngaol: ‘Tsaol-aq teevq gaq nail kovtavq bhai Meeqnail Haolnail Aqhaqlal yavq kha lee khi jaol nail bhai, naol ya moel-u phao, Meeqnail Haolnail Aqhaqlal lavqkhoel ulcuvq saol bhiq nail gaq neq, aivq ngaol dai, naol ya heeq kivq naol. 34 Ngal alhai pevq lal-a nail bhai ya moel-a nail ngel-i mail, tsaol-aq al gaq neq, Miqyail nail Yaqyov ngaol dai, ngal salkhil khanq nail ngaol’ ” dai, Yaolhaq ge nail ngaol.
Yaqlaol iqmoeq ilmoeq pevq lal-a nail juq
35 Yaoq n yaoq, Yaolhaq aivq nail yaqlaol nvq gaq nee mail, a bhai gaoq thulphaol-nvq thaq nail ngaol. 36 Aq-u phao, aivq Yeiqsul lee nail bhai ya moel khi, “Miqyail nail Yaolyaq bhai heldaiq daiq” dai, ge bhiq-a nail ngaol.
37 Yaqlaol al nvq gaq, Yaolhaq ge nail daoq al daoq ya gaiq khi, Yeiqsul nail haoqnao tsaothel laivq-a nail ngaol. 38 Yeiqsul haoqnaol naolkovq kovq daiq khi, aqyu nvq gaq aivq nail haoqnao tsaothel lavq nail bhai, ya moel-u phao, “Nul-nq nvq gaq khul halpov lal-a nail-aiq” dai, naldaiq-a nail ngaol. Aq-u phao, aqyu nvq gaq: “Laqbhil-ol, naol khaq bha jaol nail-aiq” dai, aivq bhai naldaiq-a nail ngaol. Laqbhil dai ge nail neq, saqlaq bhai ge nail ngaol.
39 “Heldaiq lal yaoq” dai, Yeiqsul aqyu nvq gaq bhai ge bhiq-a nail ngaol. Alheel ngel-i mail, aqyu nvq gaq lai khi, aivq nail jaol duq bhai ya moel-a nail ngaol. Yanq al yanq neq, kivq hail lail ma phao naqli liq lavq niidai bhee lal-aoq nail ngel-i mail, aq-u n-gaol aqyu nvq gaq a bhai jaol-a nail ngaol.
40 Yaolhaq-i mail ge-a nail daoq al daoq ya gaiq khi, Yeiqsul nail haoqnao tsaothel laivq-a nail al nvq gaq nail lavqkhoel khe teevq gaq neq, Silmoq Bheiqtuvluv nail jaqbheq, Aqdaiqlaiq ngaol. 41 Aqdaiqlaiq iqmoeq ilmoeq nl-a nail neq, aivq nail aqivq Silmoq bhai halpov moel-ail khi, “Nv-nvq gaq Meiqsilya bhai moel-a nail ngaol” dai, ge bhiq-a nail ngaol. Meiqsilya dai ge nail neq, Khali bhai ge nail ngaol. 42 A bhai nee ngal-aq, Aqdaiqlaiq neq, Silmoq bhai Yeiqsul jaol nail bha hel-aivq-a nail ngaol. Yeiqsul Silmoq bhai heldaiq khi, “Naol neq, Yaolhaq nail yaqyov Silmoq nial. Yaqhao neq, naoq bhai Geiqphal dai, ya khul naol” dai, ge bhiq-a nail ngaol. Geiqphal dai ge nail neq, lovmav bhai ge nail ngaol.
Pillilpuv khi mail Naqdaqneiqlal bhai khul-a nail ganl
43 Niaohao Gaqliqlail milkhaoq bhai ail naol dai, Yeiqsul noeqceiv-ai thaq nail ngaol. Aq-u phao, aivq Pillilpuv bhai thaoqphuq khi, “Ngaq nail haoqnao tsaothel lavq yaoq” dai, ge bhiq-a nail ngaol.
44 Pillilpuv neq, Aqdaiqlaiq khi mail Bheiqtuvluv jaol nail Bheiqjeildaq meenq bhai jaol nail ngaol. 45 Pillilpuv neq, Naqdaqneiqlal bhai halpov moel-ail khi ge nail: “Molseiq-i mail gevq-ai thaq nail, aoldaoq kovqdaoq lavqkhoel khi mail, Miqyail nail haqbhoil gedan nail tsaol-aq juq-i mail gevq-ai thaq nail lavqkhoel, aqyu juq-i mail gevq-ai thaq nail tsaol-aq al gaq bhai, nvjuq ya moel-aoq nail ngaol. Aivq neq, Naqsaqlail meenq yaq, Yaolsai nail yaqyov Yeiqsul ngaol” dai, ge bhiq-a nail ngaol.
46 “Naqsaqlail meenq bhai aqmeeq phaq dov lal nia nail laiq” dai, Naqdaqneiqlal naldaiq-a nail ngaol. “Heldaiq lal yaoq thoil” dai, Pillilpuv ge bhiq-a nail ngaol.
47 Yeiqsul Naqdaqneiqlal lal thailthaiq nail bhai ya moel-u phao, Naqdaqneiqlal nail ganl niailhai ge-a nail ngaol: “Ilsaqleiqlal nail tsaol-aq maldil pevq nail gaq bhai heldaiq yaoq. Aivq neq, goiqbhaoq bhaoq nail neema maq aol-ail” dai, ge bhiq-a nail ngaol.
48 “Naol ngaq bhai khalhai khi heeq kivq-a nail-aiq” dai, Naqdaqneiqlal Yeiqsul bhai naldaiq-a nail ngaol. “Pillilpuv naoq bhai maq khul-u nee mail, naol heeqguq aqbhaol nail daoqthaoq bhai jaol-u phao nee, ngal naoq bhai moel-aoq nail ngaol” dai, ge kovq bhiq-a nail ngaol.
49 Naqdaqneiqlal ge nail: “Saqlaq-ol, naol neq, Miqyail nail Yaqyov nial. Ilsaqleiqlal nail Heeqphaq iqsanl ngel-ail nial” dai, Yeiqsul bhai ge bhiq-a nail ngaol.
50 Yeiqsul ge nail: “ ‘Naol heeqguq aqbhaol daoqthaoq bhai jaol-u nee mail, ngal naoq bhai moel-a nail ngaol’ dai, ge nail ngel-i mail, naol ngaq bhai neema thaqtsaol nail laiq. Niidai nee maqtsil eeq nail ganl juq bhai iqsanl, naol ya moel naol” dai, ge bhiq-a nail ngaol. 51 Yeiqsul gaoq ge nail: “Ngal nuljuq bhai maldil dai, ge lavq bhel. Nqtavq phao-ai thaq nail bhai nuljuq ya moel naol. Miqyail nail nqtavq gaqkhoel Tsaol-aq nail Yaqyov nail kovtavq bhai tsaoq thoiq tsaoq dav dai, tsao nail bhai ya moel naol” dai, ge bhiq-a nail ngaol.