Maqthaiq
Gevq-a nail gaq
Haoqgavq niil keiv neq, aqduq aqtsil tsil dai khaq sil gaq-i mail gevq-a nail dai, aqmil maq gevq bhoel-ai thaq khi ngaol-aoq, milnee uqnee khe Khali yaq juq neq, Maqthaiq-i mail gevq-a nail ngaol dai, noeq nail ngaol. Maqthaiq neq, Heeqphaq Yeiqsul nail Gaqkhoel tsel-nvq gaq nail khe teevq gaq ngaol. Maqthaiq dai, ge nail daoq ceevq neq, Heeqphaq Miqyail nail kovpavq dai, ge movq nail ngaol. Aivq nail aqmil yaoq mil yaoq neq, Leiqbhil dai ngaol. Aivq nail aqbhu nail aqmil neq, Aqlaqphail dai khul nail ngaol.
Maqthaiq neq, Yeiqsul nail yaqlaol maq pevq lal-u phao, Ilsaqleiqlal tsaol-aq pevq khi ngaol-aoq, Lolmav tsaol-aq nail haqbhoil khaonq tavq nail teevq gaq ngaol. Ilsaqleiqlal tsaol-aq juq neq, khaonq tavq nail tsaol-aq bhai bhe khi yu-i mail heldaiq theq nail ganl teevq phaq pevq nail ngaol. Khul khi mail dai ngal-aq, ganl niil phaq nl nail tsaol-aq neq, phul heel bhai gaiq-a khi, yovqgavq nail jeq-e jaq-a bhai gaoq jaq nail gaq ngaol dai, aqyu juq saol-nvq-ai thaq nail ngaol.
Gevq-a nail aqyanq khi aqduq
Gevq-a nail aqyanq neq, A.D. 60-65 kovq bhai ngaol. A.D. dai, ge nail neq, ngadao nail Heeqphaq nail aqkovq dai, ge movq nail ngaol. Heeqphaq Yeiqsul doevq lee khi pultavq saol-nvq dal lavq-a nail ngaol. Gevq-a nail aqduq neq, Paqleiqtilna milkhaoq maq ngel haq neq, Sulliv milkhaoq bhai jiav nail Aqdil-aoq meenq bhai gevq-a nail ngaol, noeq nail ngaol.
Khaq sil gaq bhai gevq bhiq-a nail
Haoqgavq niil keiv neq, Yuldav (Heiqbhail, Ilsaqleiqlal) tsaol-aq bhai gevq bhiq-a nail ngaol. Khul khi mail, Yuldav tsaol-aq bhai gevq bhiq-a nail dai, heeq lal nail dai ngal-aq neq, aqceevq ge-u phao, Yeiqsul neq, Aqbhaqlaqhaq khi heeqphaq Daqbhil nail aqjievq lilheel ngaol dai, gevq-ai thaq nail ngaol. Aqbhaqlaqhaq neq, Ilsaqleiqlal jeq-e jaq-a nail daoqthaoq pevq nail ngaol. Heeqphaq Daqbhil neq, Yuldav tsaol-aq-i mail tsiqeeq jaiq nail Heeqphaq ngaol. Jalliq aqsivq bhai heldaiq-u phao, Jalliq aqlil bhai maodai ge kev-ai thaq nail neq, Maqthaiq nail phaldoiq ngaol. Maqthaiq neq, Yuldav tsaol-aq nail haqbhoil taivq-ail gevq-a nail maq ngel-ail dai, Maqthaiq 28.18,20 bhai heldaiq-u phao, heeq lal nail ngaol.
Khul bhai noeqthunq khi gevq-a nail
Haoqgavq niil keiv, Yeiqsul neq Meiqsilya (Khali) ngaol dai, Yuldav tsaol-aq-i mail yuq nail Jalliq aqlil bhai juq juq-ail khi Yuldav tsaol-aq bhai cavq navq bhiq-a nail ngaol. Meiqsilya dai, ge nail neq, Yuldav tsaol-aq-i mail ge nail Heiqbhail nail daoq ngaol. Khali dai, ge nail neq, aqyanq al yanq bhai jemao ge nail Heiqlaqsal nail daoq ngaol. Daoqceevq neq, tsel dov khi aqtseel leivq bhiq-a nail gaq ngaol dai, gevq movq nail ngaol.
Yeiqsul dai, ge nail daoq ceevq neq, Hevqkovq nail gaq dai, ge movq nail ngaol. Jalliq aqlil lavqkhoel bhai saljial jaq-ai thaq nail al, Yeiqsul nail yeel bhai bhee lal-a nail ngaol. Jalliq aqlil khi aqsivq oil cavq nail naq keev khe-ai, dul nail ngaol. Yeiqsul bhaqda nee, Nqtavq Milkhaoq kev lee-a nail ngaol dai, cavq naq bhiq nail ngaol. Nqtavq Milkhaoq dai ge nail neq, miltsaq niil heeq bhai ge nail maq ngel-ail. Tsaol-aq nail neema bhai uvthaiq nail phaq bhai, ge movq nail ngaol.
1
1 Niil neq, Aqbhaqlaqhaq khi mail Daqbhil nee mail ge khal leevq-a nail, Yeiqsul Khali nail aqceevq ngaol. 2 Aqbhaqlaqhaq nail yaq neq, Ilcav ngaol.
Ilcav nail yaq neq,
Yaqkov ngaol.
Yaqkov nail yaq neq,
Yuldav khi mail
aivq nail mailnail juq ngaol.
3 Yuldav nail yaq neq,
aivq nail ildaoq
Daqmaq ovq nee
doevq lee-a nail Phaqyail
khi mail Seiqlal ngaol.
Phaqyail nail yaq neq,
Heiqyaqloq ngaol.
Heiqyaqloq nail yaq neq,
Aqlaq ngaol.
4 Aqlaq nail yaq neq,
Aqmiqnaqdal ngaol.
Aqmiqnaqdal nail yaq neq,
Naqsoq ngaol.
Naqsoq nail yaq neq,
Saqlaqmaq ngaol.
5 Saqlaqmaq nail yaq neq,
aivq nail ildaoq Laqhal
ovq nee doevq lee-a nail
Bhaolyav ngaol.
Bhaolyav nail yaq neq,
aivq nail ildaoq Lultha
ovq nee doevq lee-a nail
Aolbhail ngaol.
Aolbhail nail yaq neq,
Yeiqsail ngaol.
6 Yeiqsail nail yaq neq,
heeqphaq Daqbhil ngaol.
Daqbhil nail yaq neq,
Saollavmoq ngaol.
Saollavmoq nail aqma neq,
Ullilya bhai teevq aol
hal ail-a nail ngaol.
7 Saollavmoq nail yaq neq,
Leiqhaolbhanq ngaol.
Leiqhaolbhanq nail yaq neq,
Aqbhilyav ngaol.
Aqbhilyav nail yaq neq,
Aqsaq ngaol.
8 Aqsaq nail yaq neq,
Yeiqhaolsaqphal ngaol.
Yeiqhaolsaqphal nail
yaq neq, Yaollanq ngaol.
Yaollanq nail yaq neq,
Aolsil ngaol.
9 Aolsil nail yaq neq,
Yaoldaq ngaol.
Yaoldaq nail yaq neq,
Aqgav ngaol.
Aqgav nail yaq neq,
Heiqsaqgil ngaol.
10 Heiqsaqgil nail yaq neq,
Maqnaqseiq ngaol.
Maqnaqseiq nail yaq neq,
Aqmoq ngaol.
Aqmoq nail yaq neq,
Yaolsiv ngaol.
11 Yaolsiv nail yaq neq,
Yeiqkhaolnil khi mail,
aivq nail mailnail juq ngaol.
Niil neq, Ilsaqleiqlal nail tsaol-aq juq Bhaqbhulloq milkhaoq bhai bhi nieil-aivq-a nail yanq bhai kev dai, ge khal leevq-a nail aqceevq ngaol.
12 Bhaqbhulloq milkhaoq bhai bhi nieil-aivq khi pultavq ge khal leevq-a nail aqceevq neq, niailhai ngaol.
Yeiqkhaolnil nail yaq neq,
Saqlaqdeiqlal ngaol.
Saqlaqdeiqlal nail yaq neq,
Seiqlulbheiqlal ngaol.
13 Seiqlulbheiqlal nail
yaq neq, Aqbhil-ov ngaol.
Aqbhil-ov nail yaq neq,
Illilyakhin ngaol.
Illilyakhin nail yaq neq,
Aqjaoq ngaol.
14 Aqjaoq nail yaq neq,
Saqdol ngaol.
Saqdol nail yaq neq,
Aqkhin ngaol.
Aqkhin nail yaq neq,
Illiqov ngaol.
15 Illiqov nail yaq neq,
Illaqsaq ngaol.
Illaqsaq nail yaq neq,
Maqthaq ngaol.
Maqthaq nail yaq neq,
Yaqkov ngaol.
16 Yaqkov nail yaq neq,
Maqlil nail yovjil
Yaolsai ngaol.
Maqlil neq, Khali dai khul nail Yeiqsul bhai tsiq-a nail ngaol.
17 Alheel ngel-i mail, Aqbhaqlaqhaq nee mail Daqbhil bhai kev dai, tsel liq yeel ngaol. Daqbhil nail yeel nee mail Bhaqbhulloq milkhaoq bhai bhi nieil-aivq-u kev dai, tsel liq yeel ngaol. Bhaqbhulloq milkhaoq bhai bhi nieil-aivq-u nee mail Yeiqsul nail yeel bhai kev dai, tsel liq yeel ngaol.
Yeiqsul Khali doevq lee-a nail ganl
18 Yeiqsul Khali doevq lee-a nail neq, niailhai ngaol. Aivq nail aqma Maqlil neq, Yaolsai bhai maol ail nail dai, ge ceiv-ai thaq nail ngaol. Thailhai ngaol-aoq, aqyu nvq gaq maq hevq maq maol pheeljaq-u nee mail Meeqnail Haolnail Aqhaqlal bhaqda nee, Maqlil yaq ceiv lai-a nail ngaol. 19 Maqlil-i mail ge ceiv-ai thaq nail Yaolsai neq, tsaq nail daol nail tsaol-aq ngaol. Aivq Maqlil nail maivphaoq maq bhi cov-ail movq nail ngel-i mail, yu bhai maq bhi heeq nia dai, khaonq ha naol dai, noeq-ai thaq nail ngaol.
20 Yaolsai alhai noeq thailthaiq-u phao, aivq nvmav mav nail lavqkhoel Heeqphaq Miqyail nail nqtavq gaqkhoel teevq gaq dov lee khi ge nail: “Daqbhil nail yaq Yaolsai-ol, naoq-i mail hevq naol dai, ge ceiv-ai thaq nail Maqlil bhai hevq nail haqbhoil thaq geesil. Khul khi mail dai ngal-aq neq, Meeqnail Haolnail Aqhaqlal bhaqda nee, aivq yaq ceiv lai-a nail ngaol. 21 Aivq yaqyov teevq gaq tsiq nail ngaol. Naol yaqyov al gaq bhai Yeiqsul* 1.21 Yeiqsul dai ge nail neq, Heeqphaq Miqyail ngadao bhai hevqkovq nail ngaol dai, ge movq nail ngaol. dai, ya mil bhiq nail ngaol. Khul khi mail dai ngal-aq neq, aivq nail tsaol-aq juq bhai aivq oeqbal lavqkhoel nee hevqkovq bhiq nail ngaol” dai, ge bhiq-a nail ngaol.
22 Al juq iqsanl mail pevq lal-a nail neq, Heeqphaq Miqyail aivq nail haqbhoil gedan nail gaq bhai juq khi, ge-ai thaq nail daoq bhi bhee lal-a nail ngaol. 23 Aivq ge nail: “Heldaiq dei-eiq. Yaqmai-aq yaqnoil teevq gaq yaq ceiv lai khi, yaqyov teevq gaq ya tsiq nail ngaol. Yaqyov al gaq bhai Eilmaqnoeqlal dai, mil naol” dai, ge-ai thaq nail ngaol. Eilmaqnoeqlal dai ge nail neq, Miqyail ngadao nee mail jaol nail ngaol dai, ge movq nail ngaol.
24 A bhai nee ngal-aq, Yaolsai iqnoeq noeq lal khi, Heeqphaq Miqyail nail nqtavq gaqkhoel-i mail ge bhiq-a nail khe-ai, Maqlil bhai hevq-a nail ngaol. 25 Thailhai ngaol-aoq, yaqyov al gaq maq doevq lee-u kev dai, aivq Maqlil nee maq iqthaiq tavq-al. Yaqyov al gaq doevq lee khi, aivq bhai Yeiqsul dai, mil bhiq-a nail ngaol.
*1:21 1.21 Yeiqsul dai ge nail neq, Heeqphaq Miqyail ngadao bhai hevqkovq nail ngaol dai, ge movq nail ngaol.