1 A bhai nee ngal-aq, Yeiqsul aivq nail yaqlaol tsel-nvq gaq bhai khul khi, neivq aqcavq juq bhai the dov nia dai maqkhaiq, nal nail goel nail yaoq phaq yaoq-ao nee mail lav meeq bhiq nia dai maqkhaiq, aqyu juq bhai bhaqaoq bivq-a nail ngaol.

2 Gaqkhoel tsel-nvq gaq nail aqmil neq, niailhai ngaol: Iqmoeq ilmoeq khe gaq neq, Bheiqtuvluv dai khul nail Silmoq khi mail, aivq nail jaqbheq Aqdaiqlaiq, Seiqbheiqdail nail yaqyov Yaqkov khi mail aivq nail jaqbheq Yaolhaq, 3 Pillilpuv khi mail Bhaqthaollaqmail, Tholmav khi mail khaon tavq nail Maqthaiq, Aqlaqphail nail yaqyov Yaqkov khi mail Taqdail, 4 Khaqnaqnil nail munl*10.4 Khaqnaqnil dai khul nail neq, Lolmav tsaol-aq uvthaiq nail kov-u neq, yovqgavq nail jeq-e jaq-a ya jel-ail nail haqbhoil, sil nail bhai kev dai, genl dev nail neema aol nail yuldav jeq-e jaq-a nail munl teevq mul pevq nail ngaol. bhai tavq nail Silmoq khi mail Yeiqsul bhai yu nail aqlavq lavqkhoel bhai av bhiq-a nail Yuldav Ilsaqgaqliqoq niil juq ngaol.

5 Yeiqsul gaqkhoel al tsel-nvq gaq bhai daoq niailhai bivq khi, khoel gai-aivq-a nail ngaol:

“Nuljuq yu nail jeq-e jaq-a jaol nail bha thaq ail. Saqmaqliv tsaol-aq nail meenq juq bhai iqsanl thaq ail. 6 Ilsaqleiqlal nail jeq-e jaq-a nail lavqkhoel khe peivq ail-a nail yaol juq jaol nail bha ail yaoq. 7 Nuljuq ail thailthaiq-u phao, ‘Nqtavq Milkhaoq kev lee-aiq nail ngaol’ dai, cavq bhiq yaoq. 8 Nal nail tsaol-aq bhai lav meeq bhiq yaoq. Sil-a nail tsaol-aq bhai gaoq bhi doevq kovq lal yaoq. Niaoqbhaoq daol nail tsaol-aq bhai, bhi meeq bhi haol lal yaoq. Neivq aol nail tsaol-aq juq bhai the dov bhiq yaoq. Nuljuq aqnieivq-ail ya-a nail khe-ai, yu bhai iqsanl aqnieivq-ail bivq yaoq.

9 Nuljuq nail jiovqpavq bhai, phul heel khi mail giqheel thaq oil bhoel-aivq. 10 Gailphail nail haqbhoil phalthaoq thaq hal-aivq. Phailkhaoq teevq keiv, saiqnaov teevq gu khi mail joiqniovq teevq khaoq taivq-ail bal-aivq yaoq. Khul khi mail dai ngal-aq, ganl nl nail tsaol-aq juq neq, jaqjaq daoldaol ya nail geel-nvq nail ngaol.

11 Nuljuq meenq teevq meenq ganav bhai ail kev-u phao maqkhaiq, julgu teevq gu ganav bhai ail kev-u phao maqkhaiq, nuljuq bhai hav bhoel movq nail tsaol-aq bhai halpov moel khi, a bhai khal jaol-u kev dai, tsaol-aq al gaq nail ilkhaol bhai jaol yaoq. 12 Ilkhaol teevq il bhai nuljuq aol lai-u phao, ‘Neesal-ovq dei-eiq’ dai, geeqlaoq bivq yaoq. 13 Ilkhaol al il geel-nvq haq neq, nuljuq nail neesal-ovq nail phaq a bhai bhi jiav-ail ceevq yaoq. Thailhai ngaol-aoq, maq geel-nvq haq neq, nuljuq nail neesal-ovq nail phaq, nuljuq jaol nail bha bhi kovq lee nail ngaol. 14 A bhai khe jaol nail tsaol-aq juq, nuljuq bhai maq hav-ail, nuljuq nail daoq maq naldaiq haq neq, ilkhaol al il nee maqkhaiq, meenq al meenq nail lavqkhoel nee maqkhaiq nuljuq dov ail-u phao, aqkhil pavq-uvq khe khaqlail naoq khal-ail ceevq yaoq. 15 Ngal nuljuq bhai maldil dai, ge lavq bhel. Yalkhaq dal-u n-gaol, meenq al meenq neq, Saoldoq meenq khi mail Gaolmaollav meenq nee maqtsil ya daq nail ngaol” dai, ge bhiq-a nail ngaol.

16 Yeiqsul gaoq ge nail: “Heldaiq dei-eiq. Oelnel nail munl lavqkhoel yaol bhai phaiq bhoel gai-aivq nail khe-ai, ngal nuljuq bhai miltsaq yaq nail lavqkhoel bhai khoel gai-aivq naol. Alheel ngel-i mail, eellel khe-ai aqgeel geel khi, khaoqkhoiq khe-ai, yu bhai maq thoiq maq tsi dai, jaol yaoq.

17 Aqmeeq-ai yaolphaol yaoq. Khul khi mail dai ngal-aq neq, nuljuq bhai pheethaiq khi, yalkhaq dal duq bhai hel-aivq lavq nail tsaol-aq jaol nail ngaol. Aqyu juq nail uqhuq thaoq nail ilkhaol juq nail lavqkhoel bhai nuljuq bhai deeq lavq nail ngaol. 18 Nuljuq ngal bhaqda nee, uvthaiq nail juq khi mail heeqphaq juq nail sivtavq bhai yu hel-aivq lavq nail ngaol. Aqyu juq nail sivtavq bhai khi yu nail jeq-e jaq-a nail sivtavq bhai nuljuq ngaq nail ganl salkhil ya khanq bhiq nail ngaol. 19 Yu nuljuq bhai yalkhaq bhi dal nail dai khi, av bhiq-u phao, nuljuq khalhai ya ge ya thail nail meeq dai, khaoq thaq laol. Yanq al yanq nail lavqkhoel bhai nuljuq khalhai ya ge ya thail nail dai, ge lavq nail ngaol. 20 Khul khi mail dai ngal-aq, nuljuq-i mail ya ge ya thail nail daoq juq neq, nuljuq nail daoq maq ngel-ail. Nuljuq nail Aqbhu nail Aqhaqlal nuljuq nail lavqkhoel bhai jaol khi, ge nail daoq pevq nail ngaol.

21 Aq-u phao, yovqgavq nail mailnail nail gaiqlaq bhai teevq gaq nee teevq gaq sil dai, av bhiq nail ngaol. Aqbhu juq iqsanl yovqgavq nail yaq sil dai, av bhiq nail ngaol. Yaqmiq yaqyov juq iqsanl yovqgavq nail aqbhu aqma bhai pheeq khi bhi deeq heivq nail ngaol. 22 Ngaq nail aqmil bhaqda nee, tsaol-aq iqsanl mail nuljuq bhai neejiav jiav lal nail ngaol. Thailhai ngaol-aoq, daoq loi loi lai-u kev dai, ivq nail tsaol-aq neq, hevqkovq nail phaq ya nail ngaol. 23 Meenq teevq meenq nail lavqkhoel yu nuljuq bhai khoeq lal jiovq lal haq neq, yaoq meenq yaoq bhai tsaol-aivq yaoq. Nuljuq Ilsaqleiqlal nail meenq bhai maq tsao doi-u nee mail, Tsaol-aq nail Yaqyov lee kev nail ngaol.

24 Yaqlaol neq, yovqgavq nail saqlaq nee maqtsil maq eeq ail. Yaqkav iqsanl, yovqgavq nail ilheel nee maqtsil maq eeq ail. 25 Alheel ngel-i mail, Yaqlaol neq, yovqgavq nail saqlaq khe-ai eeq kev lai nia haq neq, neekhaol sil nail tsaq nail ngaol. Yaqkav iqsanl yovqgavq nail ilheel khe-ai eeq kev lai haq neq, neekhaol sil nail, tsaq nail ngaol. Aqyu juq ilheel gaq bhai neivq heeqphaq Bheiqsaqbhullav dai khul haq neq, aivq nail miqsaol yaq juq bhai neq, a dai nee maqtsil gaoq khul nail ngaol” dai, ge bhiq-a nail ngaol.

26 Yeiqsul gaoq ge nail: “Alheel ngel-i mail, aqyu juq bhai thaq geesil. Khal deeq pheeq-ai thaq nail yaoq phaq yaoq-ao nee phaodaiq lavq nail ngaol. Khal oil-uvq-ai thaq nail yaoq phaq yaoq-ao nee bhai iqsanl heeq kivq duq lal nail ngaol. 27 Ngaq-i mail nuljuq bhai aqnav nail lavqkhoel bhai ge bhiq-a nail daoq juq, aqbhaq bhaq nail bhai ge bhiq yaoq. Ngaq-i mail nuljuq bhai khoiq thail bhiq-a nail daoq juq, khaolpoiv bha dav lai khi mailma-ail gul gaiq bhiq yaoq. 28 Aqmaol bhai heivq nia khi ngaol-aoq, aqhaqlal bhai maq heivq nia nail tsaol-aq juq bhai thaq geesil. Aqhaqlal bhai iqsanl aqmaol bhai iqsanl, daqovq laoma eeltsul nail lavqkhoel bhai lav cov nia nail Miqyail bhai geesil yaoq. 29 Jaltsil nvq maol bhai phul teevq bhaiq nee gaoq nail maq ngel laiq. Thailhai ngaol-aoq, nuljuq nail Aqbhu Miqyail neema maq tsaq haq neq, teevq maol iqsanl miltsaq bhai maq ga heivq lee-ail. 30 Aivq nuljuq nail uqhuq tsailkheel iqsanl bhai gedaiq gil-ai thaq nail ngaol. 31 Alheel ngel-i mail, thaq geesil. Nuljuq neq, jaltsil maodai mao nee maqtsil phoiq jaiq nail ngaol” dai, ge bhiq-a nail ngaol.

32 Yeiqsul gaoq ge nail: “ ‘Ngal Yeiqsul nail yaqlaol ngaol’ dai, tsaol-aq nail sivtavq bhai ge dov nail khul gaq bhai maqkhaiq, ‘Thoil gaq neq, ngaq nail yaqlaol ngaol’ dai, nqtavq kovtavq bhai jaol nail ngaq nail Aqbhu nail sivtavq bhai ngal ge dov naol. 33 Thailhai ngaol-aoq, ‘Ngal Yeiqsul nail yaqlaol maq ngel’ dai, tsaol-aq nail sivtavq bhai jil ha nail khul gaq maqkhaiq, ‘Thoil gaq ngaq nail yaqlaol maq ngel-ail’ dai, nqtavq kovtavq bhai jaol nail, ngaq nail Aqbhu nail sivtavq bhai, ngal jil ha naol” dai, ge bhiq-a nail ngaol.

34 Yeiqsul gaoq ge nail: “Ngal miltsaq kovtavq bhai bhi tsaq bhi jil lee thaq nail niil dai, thaq noeq. Bhi tsaq bhi jil lai nail dai khi, ngal lee-a nail maq ngel. Ngal thaoma bavq khi lee-a nail ngaol. 35 Aqbhu khi mail yaqyov, yaqmiq khi mail aqma, khiqma khi mail aqma, teevq gaq teevq dao bhi gaoq bhi gail nail dai khi, ngal lee-a nail ngaol. 36 Yovqgavq nail ildaoq lavqkhoel bhai jaol nail tsaol-aq juq, yovqgavq bhai neejiav jiav nail tsaol-aq pevq lal nail ngaol.

37 Ngaq bhai gaiq-a nail nee maqtsil yovqgavq nail aqbhu aqma bhai gaiq-a jaiq nail gaq neq, ngaq nail yaqlaol jiovq nail maq geel-nvq-ail. Ngaq bhai gaiq-a nail nee maqtsil yovqgavq nail yaqmiq yaqyov bhai gaiq-a jaiq nail gaq iqsanl, ngaq nail yaqlaol jiovq nail maq geel-nvq-ail. 38 Yovqgavq nail lavqyavq yovqgavq bavq khi ngaq nail haoqnao maq tsaothel lavq nail gaq neq, ngaq nail yaqlaol jiovq nail maq geel-nvq-ail. 39 Yovqgavq nail doevq nail phaq ya dai halpov nail gaq neq, doevq nail phaq sunq-ail nail ngaol. Thailhai ngaol-aoq, ngaq nail haqbhoil yovqgavq nail doevq nail phaq bhi sunq-ail nail gaq neq, doevq nail phaq ya nail ngaol” dai, ge bhiq-a nail ngaol.

40 Yeiqsul gaoq ge nail: “Nuljuq bhai khal hav nail tsaol-aq ngaq bhai hav-a nail ngaol. Ngaq bhai hav-a nail tsaol-aq, ngaq bhai khoel-ai leevq-a nail gaq bhai hav-a nail ngaol. 41 Tsaol-aq teevq gaq Miqyail nail haqbhoil gedan nail gaq pevq nail ngel-i mail, yu aivq bhai hav haq neq, hav-a nail gaq iqsanl, Miqyail nail haqbhoil gedan nail gaq khe-ai, geeqlaoq ya nail ngaol. Tsaol-aq teevq gaq tsaq nail daol nail ngel-i mail, yu aivq bhai hav haq neq, hav-a nail gaq iqsanl, tsaq nail daol nail al gaq khe-ai, geeqlaoq ya nail ngaol. 42 Yu nee maqtsil theq jaiq nail, ngaq nail yaqlaol bhai ulcuvq eelcoevq teevq khaoqanq taivq-ail bhi daol-a nail khul gaq maqkhaiq, tsaol-aq al gaq nail geeqlaoq teevq thal-iq maq peivq-ail nia ail dai, ngal nuljuq bhai maldil dai, ge nail ngaol” dai, Yeiqsul ge bhiq-a nail ngaol.