1 Phaqliqsail juq khi mail Saqduqgail juq Yeiqsul bhai laonqdaiq nail dai khi, “Nqtavq kovtavq khe bhi heeq bhi moel nail phaq nl daiq lavq yaoq” dai, ge bhiq-a nail ngaol.

2 Thailhai ngaol-aoq, Yeiqsul aqyu juq bhai ge kovq bhiq-a nail: “Nqkivq kivq lee-u phao, nqtavq aqnel nel haq neq, niaohao nqtavq aqmeeq nial dai, nuljuq heeq nia nail ngaol. 3 Nqhao phao, nqtavq aqnel nel khi, nqtavq navtsee dai jiav haq neq, yanqgaol neq, nqjaiq lil pov pov lal khi, maoq-aol aol lee nail nial dai, nuljuq ge nail ngaol. Nuljuq nqtavq bha heldaiq khi maoq-aol aol lee nail, nltsal covq lal nail dai, heeq nia nail ngaol. Thailhai ngaol-aoq, yanq yaqlao bhai tavq nail bhi heeq bhi moel nail phaq bhai nuljuq maq tselpav nia maq heeq nia-il. 4 Mao-ail haqeiv nail bheeq nail leel nail yeel niil yeel khe tsaol-aq neq, bhi heeq bhi moel nail phaq hal daiq nail ngaol. Thailhai ngaol-aoq, Yaolnav nail bhi heeq bhi moel nail phaq*16.4 Lulkavq 11.29-30 heldaiq yaoq. maq ngel nail neq, yaoq phaq yaoq aqyu juq bhai maq bhi moel-ail” dai, ge bhiq-a nail ngaol. A bhai nee ngal-aq, Yeiqsul aqyu juq nee pav ail khi dov ail-a nail ngaol.

5 Yeiqsul yaqlaol juq nee mail ngaqkha a phao lelkhel bhai ail kev-u phao, khaqmul nioilpeivq-ail ceevq-a nail bhai yaqlaol juq noeq dov lal bhiq-a nail ngaol. 6 Aq-u phao, “Phaqliqsail juq khi mail Saqduqgail juq nail deqtsiq bhai yaolphaol yaoq” dai, Yeiqsul aqyu juq bhai ge bhiq-a nail ngaol.

7 Thailhai ngaol-aoq, yaqlaol juq neq, aqyu juq nail gaiqlaq bhai khaqmul maq oil leevq thaq nail ganl taivq-ail, ge nail ngaol.

8 Aqyu juq alhai ge thailthaiq nail bhai, Yeiqsul heeq nia khi, niailhai ge bhiq-a nail ngaol: “Neema thaqtsaol nail phao, gaq bhaq nail tsaol-aq juq-ol, khul khi mail khaqmul maq oil leevq thaq nail ganl nuljuq nail gaiqlaq bhai ge thailthaiq nail-aiq. 9 Niil aq-il kev dai nuljuq maq noeq dov haq-al laiq. Khaqmul ngaq heeq bhai tsaol-aq ngaq hinl gaq jaq bov khi, nuljuq jaiq lal-a nail pheeqdeel nee mail khadai deel gov bhee-a nail bhai nioilpeivq-ail lavq-ao nail laiq. 10 Al ovqtavq, khaqmul sivq heeq bhai tsaol-aq liq hinl gaq jaq bov khi, nuljuq jaiq lal-a nail pheeqdeel nee mail khadai deel gov bhee-a nail bhai iqsanl, nioilpeivq-ail lavq-ao nail laiq. 11 Ngal khaqmul nail ganl nuljuq bhai ge thailthaiq nail maq ngel-ail dai, khul khi mail nuljuq maq gov heeq kivq nail-aiq. Phaqliqsail juq khi mail Saqduqgail juq nail deqtsiq bhai yaolphaol yaoq” dai, ge bhiq-a nail ngaol. 12 Aq-u phao, khaqmul bhai goe nail deqtsiq bhai yaolphaol yaoq dai, Yeiqsul ge nail maq ngel-il. Phaqliqsail juq khi mail Saqduqgail juq cavq nail cov nail daoq bhai yaolphaol yaoq dai, ge nail niil dai, yaqlaol juq heeq nia lal-a nail ngaol.

13 Yeiqsul Pillilpuv-i†16.13 Pillilpuv niil gaq neq, Heiqlol Aqgilpav nail jaqbheq ngaol. mail cov-a nail Gailsaqlil meenq aqjail bhai ail kev-u phao, “Yu Tsaol-aq nail Yaqyov bhai khaq sil gaq niil dai, ge thailthaiq nail-aiq” dai, Yeiqsul aivq nail yaqlaol juq bhai naldaiq bhiq-a nail ngaol.

14 “Tsaol-aq teevq pav ganav juq neq, naoq bhai ulcuvq saol bhiq nail Yaolhaq niil dai ge nail ngaol. Teevq pav ganav juq neq, Eillilya niil dai ge khi, teevq pav ganav juq neq, Yeiqlaqmil, maq ngel haq neq, Miqyail nail haqbhoil gedan nail teevq gaq ganav niil dai, ge nail ngaol” dai, ge kovq bhiq-a nail ngaol.

15 “Nuljuq thoil, ngaq bhai khaq sil gaq niil dai, ge heeq” dai, Yeiqsul aqyu juq bhai naldaiq bhiq-a nail ngaol.

16 Aq-u phao, “Naol neq, Khali dai khul nail, doevq nail Miqyail nail Yaqyov ngaol” dai, Silmoq Bheiqtuvluv ge kovq bhiq-a nail ngaol.

17 Yeiqsul aivq bhai ge bhiq-a nail: “Yaolnav nail yaqyov Silmoq-ol, naol geeqlaoq eeq nail ngaol. Khul khi mail dai ngal-aq, ganl niil tsaol-aq yaq naoq bhai phaodaiq bhiq-a nail maq ngel-ail. Nqtavq kovtavq bhai jaol nail ngaq nail Aqbhu naoq bhai phaodaiq bhiq-a nail ngaol. 18 Ngal naoq bhai ge lavq bhel. Bheiqtuvluv naol neq, lovmav ngaol. Lovmav niil nail kovtavq bhai ngaq nail munl ngal kaovq naol. Sil nail phaq nail bhaqaoq, munl niil munl bhai maq gaq lai nia-ail. 19 Nqtavq Milkhaoq khe lolgov nail taovq taovqphoil ngal naoq bhai bivq naol. Miltsaq kovtavq bhai naoq-i mail maq khal bhi nl nail juq bhai, nqtavq kovtavq bhai iqsanl maq bhi nl nail juq dai saol-nvq-ai thaq nail ngaol. Al ovqtavq, miltsaq kovtavq bhai naoq-i mail khal bhi nl nail juq bhai nqtavq kovtavq bhai iqsanl bhi nl nail juq ngaol dai, saol-nvq-ai thaq nail ngaol” dai, ge bhiq-a nail ngaol. 20 A bhai nee ngal-aq, “Ngal Khali pevq nail ganl teevq gaq bhai iqsanl thaq ge bhiq dei-eiq” dai, Yeiqsul aivq nail yaqlaol juq bhai daoq bivq-a nail ngaol.

21 Yeiqsul gaoq ge nail: “Ngal Yeiqlulsaqlaiq meenq bha ya lai khi, aqivq aqtsu juq, Philma juq, aoldaoq kovqdaoq cavq nail cov nail juq nail aqlavq lavqkhoel bhai maodai phaq ya daq deedee nail ngaol” dai, aq-u n-gaol nee dan khi, Yeiqsul aivq nail yaqlaol juq bhai ge bhiq-a nail ngaol. “Ngal ya bhi heivq nail ngaol. Thailhai ngaol-aoq, hail n bhee lal haq neq, gaoq doevq kovq lal naol” dai iqsanl, ge bhiq-a nail ngaol.

22 Aq-u phao, Bheiqtuvluv Yeiqsul bhai hevq dol-aivq khi, “Heeqphaq-ol, Miqyail alhai maq bhi pevq lal khaoq-ail. Alheel nail ganl naoq nail kovtavq bhai teevq thal-iq maq kev lee-ail” dai, Yeiqsul bhai khaq bhiq-a nail ngaol.

23 Thailhai ngaol-aoq, Yeiqsul haoqnaol naolkovq kovq daiq khi, Bheiqtuvluv bhai ge bhiq-a nail: “Neivq Saqdaq-ol, gailkhaol phaol yaoq. Naol neq, ngaq bhai phaqthiq bhi thiq nail gaq ngaol. Khul khi mail dai ngal-aq neq, naoq nail neenoeq neq, Miqyail nail neenoeq maq ngel-ail, Tsaol-aq yaq nail neenoeq teevq-eel ngaol” dai, ge bhiq-a nail ngaol.

24 A bhai nee ngal-aq, Yeiqsul aivq nail yaqlaol juq bhai ge bhiq-a nail: “Tsaol-aq teevq gaq ngaq nail haoqnao tsaothel lavq movq haq neq, yovqgavq nail neekhaol ya khaonq ha-ail ceevq khi, yovqgavq nail lavqyavq yovqgavq bavq khi mail ngaq nail haoqnao ya tsaothel lavq nail ngaol. 25 Khul gaq maqkhaiq, yovqgavq nail doevq nail phaq, yovqgavq bhi jel-ail movq haq neq, yovqgavq nail doevq nail phaq sunq-ail nail ngaol. Thailhai ngaol-aoq, khul gaq maqkhaiq, ngaq nail haqbhoil yovqgavq nail doevq nail phaq bhi sunq-ail haq neq, doevq nail phaq ya nail ngaol. 26 Tsaol-aq teevq gaq ganav, miltsaq niil teevq heeq heeq lao ya gil khi ngaol-aoq, aivq nail doevq nail phaq sunq-ail haq neq, aivq nail haqbhoil khul nail ganl tsoiq nail-aiq. Tsaol-aq teevq gaq aivq nail doevq nail phaq bhai khul nee mail ul kovq nia nail-aiq. 27 Khul khi mail dai ngal-aq, tsaol-aq nail Yaqyov neq, aivq nail Aqbhu nail seiqleiq khaoqsail lavqkhoel, aivq nail nqtavq gaqkhoel juq nee mail yavq kha lee nail ngaol. Aq-u phao, tsaol-aq yaq yaoq gaq yaoq-ao nee yovqgavq-i mail khal nl khal hal-ai thaq nail khe-ai, aivq yaoq gaq yaoq-ao nee bhai bivq nail ngaol. 28 Ngal nuljuq bhai maldil dai, ge lavq bhel. Niilniai thulphaol nail tsaol-aq teevq pav ganav juq, tsaol-aq nail Yaqyov Heeqphaq jiovq khi uvthaiq lee nail bhai maq ya moel-u kev dai, maq ya sil-ail” dai, ge bhiq-a nail ngaol.