1 Yeiqsul khi mail aivq nail yaqlaol juq Yeiqlulsaqlaiq meenq bha lai kev nail aqjail jail lal khi, Saqloq gaoqjaoq nail aqjail bhai jiav nail Bheilphaqjeiq julgu khi mail Bheiqtaqnil julgu bhai lai kev-u phao, Yeiqsul aivq nail yaqlaol nvq gaq bhai iqmoeq phao, khoel gai-aivq-a nail ngaol. 2 Aivq yaqlaol al nvq gaq bhai ge bhiq-a nail: “Nul-nq nvq gaq iqmoeq phao jiav nail julgu bhai lai yaoq. Nul-nq nvq gaq julgu bhai aol lai teevq thaiq tsaol-aq teevq gaq iqsanl maq jeeq daiq-a nail moeqphaq laljieiv maol yaq teevq maol pheethaiq-ai thaq khi jaol nail bhai, ya moel naol. Cevpheel khi niilniai tseel leevq yaoq. 3 ‘Khul khi mail thailhai nl nail-aiq’ dai, tsaol-aq teevq gaq ganav naldaiq lal haq neq, ‘Heeqphaq loq nail ngaol. Lavqtsail mail gaoq bhi tseel kol leevq naol’ dai, ge bhiq yaoq” dai, Yeiqsul aqyu nvq gaq bhai ge bhiq-a nail ngaol.

4 Aqyu nvq gaq lai thailthaiq-u phao, gailkhaol gailbhaq khe ilkhaol teevq il nail lolgov bhai pheethaiq-ai thaq nail moeqphaq laljieiv maol yaq teevq maol moel khi, neeqtsaq cevpheel-a nail ngaol. 5 Aq-u phao, a bhai thulphaol nail tsaol-aq juq: “Nul-nq nvq gaq moeqphaq laljieiv maol yaq nail neeqtsaq pheel khi, khul khi nail-aiq” dai, naldaiq bhiq-a nail ngaol. 6 Yeiqsul aqyu nvq gaq bhai ge bhiq-ai thaq nail khe-ai, aqyu nvq gaq ge kovq bhiq-u phao, aqyu juq maq lav tsoiq dai, bhi tseel laivq-a nail ngaol. 7 Moeqphaq laljieiv maol yaq al maol bhai Yeiqsul jaol nail bha tseel lavq khi, aqyu juq nail aqgaq aqdoi kheq dav bhiq khi, Yeiqsul bhai bhi jeeq-a nail ngaol. 8 Tsaol-aq maodai yovqgavq nail aqgaq aqdoi yovqgavq gailkhaol bhai kheq-a nail ngaol. Teevq pav ganav juq neq, yaljail bhai bhuq tsil khi, gailkhaol bhai kheq-a nail ngaol. 9 Aivq nail iqmoeq khi haoqnao tsaothe thailthaiq nail juq niailhai gul nail ngaol:

mailma-ail gul nail ngaol.

11 A bhai nee ngal-aq, Yeiqsul Yeiqlulsaqlaiq meenq bha aol lai khi, uqhuq thaoq nail ilkhaol il ma bhai lai-a nail ngaol. Aivq yaoq phaq yaoq-ao nee mail heldaiq doi gaq-u phao, nqkivq kivq lee-a nail ngel-i mail, gaqkhoel tsel-nvq gaq hevq khi, Bheiqtaqnil julgu bhai lai-a nail ngaol.

12 Yaoq n yaoq, aqyu juq Bheiqtaqnil julgu nee mail dov ail-u phao, Yeiqsul aoq moevq lal bhiq-a nail ngaol. 13 Aivq eqyal bhai lee thailthaiq-u phao nee, aqpavq maodai covq nail heeqguq aqbhaol teevq bhaol ya moel-a nail ngaol. Aqbhaol al bhaol aqheeq heeq-ail laiq dai, heldaiq ail-a nail ngaol. Aivq aqjail bhai ail kev-u phao, heeqguq aqheeq heeq nail yanq maq tsaq nail ngel-i mail, aqpavq taivq-ail covq nail bhai ya moel-a nail ngaol. 14 “Yanqgaol nee ngal-aq, naoq nail aqheeq bhai tsaol-aq teevq gaq iqsanl thaq ya jaq dei-eiq” dai, Yeiqsul heeqguq aqbhaol al bhaol bhai ge bhiq-a nail ngaol. Aivq alhai ge nail bhai aivq nail yaqlaol juq gaiq-a nail ngaol.

15 Aqyu juq Yeiqlulsaqlaiq meenq bha lai kev-u phao, Yeiqsul uqhuq thaoq nail ilkhaol il ma nail khainl lavqkhoel bhai aol lai khi, a bhai yalkav gaoq yalkav ul nail tsaol-aq juq bhai the ha khi, phul dovq phal bhiq thailthaiq nail tsaol-aq juq nail kovqkhail khi mail, khaoqkhoiq gaoq thailthaiq nail juq nail doiqbev bhai maqkhaiq, ngaoq ha-a nail ngaol. 16 Yalkav teevq phaq ganav phi phi-ail, uqhuq thaoq nail ilkhaol il ma nail khainl lavqkhoel nee, maq ya ail pav ail dai, Yeiqsul aqyu juq bhai lav tsoiq-a nail ngaol.

gevq-ai thaq khi ngaol-aoq, nuljuq ilkhaol niil il bhai khoiqbhaoq tsaolpheel nail ilkhaol bhi pevq lal thaq nail niil” dai, Yeiqsul aqyu juq bhai cavq bhiq cov bhiq-a nail ngaol.

18 Philma juq khi mail aoldaoq kovqdaoq cavq nail cov nail juq daoq al daoq ya gaiq-u phao, Yeiqsul bhai heivq nail haqbhoil gailkhaol halpov-a nail ngaol. Khul khi mail dai ngal-aq neq, tsaol-aq munl juq iqsanl mail, aivq cavq bhiq cov bhiq nail bhai noeq-u maq dov dai, pevq ail-a nail ngel-i mail, Philma juq khi mail aoldaoq kovqdaoq cavq nail cov nail juq Yeiqsul bhai geesil nail ngaol.

19 Nqkivq kivq lee-u phao, Yeiqsul khi mail aivq nail yaqlaol juq meenq nee mail dov ail-a nail ngaol.

20 Yaoq n yaoq nqhao navqmav-ail, gailkhaol al khaol bhai aqyu juq gaoq lee-u phao, heeqguq aqbhaol al bhaol daoqtsail bhai kev dai, bhagul gul-ai thaq khi jiav nail bhai ya moel-a nail ngaol. 21 Aq-u phao, Bheiqtuvluv noeq dov lal khi, “Saqlaq-ol heldaiq. Naoq-i mail iqkhail yavq-a nail aqbhaol al bhaol, bhagul gul ail-aoq thaq nial” dai, Yeiqsul bhai ge bhiq-a nail ngaol.

22 Yeiqsul aqyu juq bhai ge bhiq-a nail: “Miqyail bhai neema thaqtsaol yaoq. 23 Ngal nuljuq bhai maldil dai, ge lavq bhel. Tsaol-aq khul gaq maqkhaiq, neema pov pov lav lav dai maq pevq mail, yovqgavq-i mail khal ge-a nail khe-ai pevq lal naol dai, neema thaqtsaol nail lavqkhoel, gaoqjaoq niil jaoq bhai, ‘Naoq nail jaol duq nee dov ail khi, iqyaq iqma bhai ga puvq ail yaoq’ dai, ge bhiq-u phao, aivq-i mail khal ge nail khe-ai pevq lal nail ngaol. 24 Alheel ngel-i mail, ngal nuljuq bhai ge lavq bhel. Nuljuq teevq phaq ganav ya dai, geeqlaoq hal-u phao, ya naol dai, neema thaqtsaol khi hal haq neq, nuljuq-i mail khal hal nail phaq ya nail ngaol. 25 Nuljuq thul khi geeqlaoq hal-u phao, naol tsaol-aq teevq gaq ganav nail kovtavq bhai oeqbal thaq thailthaiq nail ngel haq neq, oeqbal al phaiq bhiq yaoq. Alhai nl haq neq, nqtavq kovtavq bhai jaol nail nuljuq nail Aqbhu iqsanl, nuljuq-i mail nl bheeq lav bheeq-a nail phaq bhai oeqbal phaiq lavq nail ngaol” dai, ge bhiq-a nail ngaol.

26 [Thailhai ngaol-aoq, nuljuq yu bhai oeqbal maq phaiq bhiq haq neq, nqtavq kovtavq khe jaol nail nuljuq nail Aqbhu iqsanl nuljuq-i mail nl bheeq lav bheeq-a nail phaq bhai oeqbal maq phaiq lavq-ail.]

27 Aqyu juq Yeiqlulsaqlaiq meenq bha teevq pov gaoq lai kev-a nail ngaol. Yeiqsul uqhuq thaoq nail ilkhaol il ma bhai tsao thailthaiq-u phao, Philma juq, aoldaoq kovqdaoq cavq nail cov nail juq khi mail, Yuldav tsaol-aq nail aqivq aqtsu juq aivq jaol nail bha lal khi ge nail: 28 “Naol khaq bha khe alyaq ya khi niil juq nl thailthaiq nail-aiq. Khaq sil gaq naoq bhai alyaq bivq lavq-a nail-aiq” dai, naldaiq bhiq-a nail ngaol.

29 Yeiqsul aqyu juq bhai ge kovq bhiq-a nail: “Ngal nuljuq bhai teevq daoq naldaiq la dei-eiq. Nuljuq ge kovq lavq haq neq, ngal khaq bha khe alyaq ya khi niil juq nl thailthaiq nail ganl, nuljuq bhai ge bhiq naol. 30 Yaolhaq ulcuvq saol bhiq-a nail al, Miqyail-i mail bhi nl thaq nail laiq. Maq ngel haq neq, tsaol-aq-i mail bhi nl thaq nail laiq. Ngaq bhai ge lavq yaoq” dai, aqyu juq bhai ge bhiq-a nail ngaol.

31 Aq-u phao, aqyu juq nail gaiqlaq bhai niailhai ge tsaoq pheeljaq-a nail ngaol: “Miqyail-i mail bhi nl thaq nail ngaol dai, ngadao ge haq neq, ‘Thailhai phal-iq neq, nuljuq khul khi mail Yaolhaq bhai neema maq thaqtsaol nail-aiq’ dai, Yeiqsul ge lal nail ngaol. 32 Tsaol-aq-i mail bhi nl thaq nail ngaol dai, ge heeq laiq” dai, aqyu juq nail gaiqlaq bhai maoqbhaoq nl pheeljaq-a nail ngaol. Yaolhaq neq, Miqyail nail haqbhoil gedan nail gaq ngaol dai, tsaol-aq iqsanl mail saol-nvq-ai thaq nail ngel-i mail, aqyu juq tsaol-aq munl al juq bhai geesil nail ngaol.

33 Alheel ngel-i mail, “Nvjuq maq heeq kivq” dai, aqyu juq Yeiqsul bhai ge kovq bhiq-a nail ngaol. Yeiqsul ge nail: “Alhai dul dai, khaq sil gaq-i mail ngaq bhai alyaq bivq lavq khi ganl niil juq nl thailthaiq nail bhai, nuljuq bhai maq ge bhiq-ail” dai, aqyu juq bhai ge bhiq-a nail ngaol.