Pillilpiv
Gevq-a nail gaq
Haoqgavq niil keiv iqmoeq ilmoeq bhai Gaqkhoel Paolluv aivq-i mail gevq-a nail ngaol dai, gevq-ai thaq nail ngaol. Al ovqtavq, milnee uqnee khe Khali yaq juq jemao iqsanl, Paolluv-i mail gevq-a nail ngaol dai, noeq nail ngaol.
Gevq-a nail aqyanq khi aqduq
Gevq-a nail aqyanq neq, A.D. 61 kovq niidai bhai gevq-a nail ngaol. Gaqkhoel Paolluv Lolmav nail thaonq bhai iqmoeq ilmoeq khe pov aol thailthaiq-u phao, gevq-a nail ngaol. Pillilpiv haoqgavq iqsanl, thaonq bhai aol khi gevq-a nail haoqgavq al juq nail lavqkhoel bhai aol nail ngaol.
Khaq sil gaq bhai gevq bhiq-a nail
Haoqgavq niil keiv neq, Pillilpiv meenq khe Khali yaq munl bhai gevq bhiq-a nail ngaol. Pillilpiv meenq khe jaol nail Yeiqsul Khali nail tsaol-aq juq bhai maqkhaiq, Khali yaq munl bhai heldaiq phail nail juq khi mail tsaojao-ai nail juq bhai maqkhaiq, haoqgavq niil gevq bhoel-aivq leevq-a nail ngaol. Pillilpiv meenq neq, hulmeeq hulbhao Lolmav nail meenq ngaol.
Pillilpiv meenq yaq juq, Lolmav nail tsaol-aq pevq nail neekhaol sil deedee nail khe-ai, gaqkhoel Paolluv “Ngadao neq, nqtavq bha tavq lai nail tsaol-aq ngaol” dai, gaq bivq-a nail ngaol. Pillilpiv meenq bhai Yuldav nail tsaol-aq maodai maq jaol nail ngel-i mail, Yuldav tsaol-aq nail uqhuq thaoq nail ilkhaol maq cov-ai thaq-al. Alheel ngel-i mail, Paolluv yaoq meenq yaoq bhai daoq cavq cavq ail-u khe-ai, uqhuq thaoq nail ilkhaol lavqkhoel bhai maq ngel nail, meenq meenq jail bhai jiav nail laoljaol daolbhaq bhai jaol khi cavq bhiq cov bhiq-a nail ngaol. Luldil dai mil nail yaqmai-aq teevq gaq khi mail thaonq bhai heldaiq phail nail aqivq teevq gaq nail ildaoq bhaqda nee, Khali yaq munl mao lal-a nail ngaol.
Paolluv Miqyail nail ganl nl-a nail bhala aqheeq aqphoiq maq oil-al. Miqyail nail ganl nl nail haqbhoil haqphal saiqgov guvq-a nail ngaol. Thailhai ngaol-aoq, Pillilpiv meenq khe jaol nail Khali yaq munl Paolluv Miqyail nail ganl nl nail bhai phul danq khi tsaojao-ai bhiq-a nail ngaol.
Khul bhai noeqthunq khi gevq-a nail
Paolluv Lolmav nail thaonq bhai aol thailthaiq-u phao, Pillilpiv meenq khe Khali yaq Ilbhaqphaoqdil bhai khoel khi aqyu juq-i mail danq-a nail phul Paolluv bhai bhi bivq lai-a nail ngaol. Alheel ngel-i mail, Paolluv geeqlaoq eeq naol dai, ge nail haqbhoil haoqgavq niil keiv gevq-a nail ngaol. Paolluv haoqgavq niil keiv gevq-u phao, Pillilpiv meenq khe Khali yaq munl tsel kovq bhee lal-aoq nail ngaol. Paolluv aqyu juq bhai haoqnao naosaq moel-a nail hail kovq bhee lal-a nail ngel-i mail, mee nia phaq nail ganl, lavqkhiq tsail nail ganl bhai daoqthaoq thaoq khi gaq bivq-a nail ngaol.
Ilbhaqphaoqdil Pillilpiv meenq khe Khali yaq munl-i mail bivq-a nail phul oil khi, Paolluv bhai bivq lai-u phao, mailma-ail nal-a nail ngaol. Thailhai ngaol-aoq, nal nail al meeq lai-u phao, Paolluv-i mail gevq-a nail Pillilpiv haoqgavq niil keiv oil khi, bhi kovq lai-a nail ngaol.
1
Iqmoeq ilmoeq khe daoq
1 Yeiqsul Khali nail yaqkav pevq nail Paolluv khi Tilmolseiq nv-nvq gaq, Pillilpiv meenq bhai jaol nail Yeiqsul Khali bhai neema thaqtsaol nail Miqyail nail tsaol-aq juq bhai maqkhaiq, Khali yaq munl bhai heldaiq phail nail juq khi tsaojao-ai nail juq bhai maqkhaiq, haoqgavq niil gevq bhoel-ai leevq-a nail ngaol.
2 Ngadao nail Aqbhu Miqyail khi Heeqphaq Yeiqsul Khali nail geeqlaoq eeljaol khi neesal-ovq nail phaq nuljuq nail kovtavq bhai jiav dei-eiq.
Pillilpiv meenq bhai jaol nail Khali yaq juq nail haqbhoil geeqlaoq hal nail ganl
3 Ngal nuljuq bhai khal noeq dov lal-u phao, ngal ngaq nail Miqyail bhai tsiqeeq naol. 4 Nuljuq iqsanl nail haqbhoil ngal geeqlaoq hal-u phao, yaoq pov yaoq-ao nee lavqkhiq tsail lal nail ngaol. 5 Khul khi mail dai ngal-aq neq, lavqkhiq tsail nail geeqlaoq daoq nuljuq jaol nail bha iqmoeq ilmoeq cavq lavq-u n-gaol nee yanqgaol kev dai, nuljuq ngaq bhai tsaojao-ai lavq-a nail ngaol. 6 Nuljuq nail lavqkhoel iqmoeq ilmoeq aqmeeq phaq nl-a nail Miqyail neq, Yeiqsul Khali yavq kha lee nail aqn bhai kev dai ganl al juq nl gil nail ngaol dai, ngal maldil neema thaqtsaol nail ngaol.
7 Ngal nuljuq bhai khaq mao iqsanl gaiq-a nail ngel-i mail, nuljuq nail haqbhoil alhai noeq nail neq, tsaq nail ngaol. Ngal thaonq bhai aol-u phao maqkhaiq, lavqkhiq tsail nail geeqlaoq daoq ivqdao dai pevq lal dai maqkhaiq, yalkhaq dal nail juq nail sivtavq bhai geeqlaoq daoq al ge lai-u phao maqkhaiq, nuljuq Miqyail nail geeqlaoq eeljaol bhaqda nee, ngaq bhai tsaojao-ai lavq-a nail ngaol. 8 Yeiqsul Khali nail gaiq-a deedee nail phaq-i mail ngal nuljuq iqsanl bhai khadai noeq moel khi, khadai gaiq-a nail ngel-ail dai, Miqyail heeq nia nail ngaol.
9 Nuljuq nail lavqkhoel bhai goil nail gaiq-a nail phaq teevq pov nee teevq pov mao lal dai, ngal geeqlaoq hal nail ngaol. Goil nail gaiq-a nail al bhaqda nee nuljuq maodai phaq bhai aqduq aqtsil tsil dai heeq nia lal dai maqkhaiq, tselpav bhoilpav nia nail phaq nuljuq nail lavqkhoel bhai mao lal dai maqkhaiq, geeqlaoq hal nail ngaol. 10 Alhai pevq lal haq neq, iqsanl nail lavqkhoel-ai meeq jaiq nail phaq bhai nuljuq tselpav nia lal nail ngaol. Al ovqtavq, Khali yavq kha lee nail aqn bhai kev dai, nuljuq nail lavqkhoel bhai maq meeq nail phaq maq aol dai, oeqbal thaq duq maq jiav dai pevq lal nail ngaol. 11 Aq-u phao, Miqyail nail seiqleiq khaoqsail bhi dov lal khi, yu Miqyail bhai tsiqeeq lal dai, Yeiqsul Khali taivq-ail nl nia nail tsaq nail daol nail al phaq, nuljuq aqdoevq doevq nail lavqkhoel bhai bhee lal nail ngaol.
Ngal niil aq-il aqdoevq doevq nail neq, Khali ngaol
12 Aqivq jaqbheq juq-ol, ngal ya daq thailthaiq nail niil neq, lavqkhiq tsail nail geeqlaoq daoq bhi gaiq-ail nail ngel lao thaq nail niil dai, nuljuq bhai bhi heeq kivq movq nail ngaol. 13 Khali nail haqbhoil nee ngal thaonq bhai ya aol thailthaiq nail ngaol dai, heeqphaq nail ilkhaol bhai heldaiq phail nail genl dev nail juq khi yaoq juq yaoq iqsanl ya heeq nia-a nail ngaol. 14 Ngal thaonq bhai ya aol-a nail bhaqda nee, aqivq jaqbheq maodai teevq pav, Yeiqsul nail lavqkhoel neema ivq lal-a nail ngaol. Al ovqtavq, geesil nail neema maq aol dai, Miqyail nail daoq cavq bhiq tseq lal-a nail ngaol.
15 Tsaol-aq teevq pav ganav juq neq, neekhaol maq sil dai, jil pheeljaq movq nail lavqkhoel nee Khali nail ganl cavq bhiq nail ngaol, ngal heeq kivq nail ngaol. Thailhai ngaol-aoq, teevq pav ganav juq neq, aqmeeq phaq dov lal dai noeqthunq khi cavq bhiq nail ngaol. 16 Al juq neq, goil nail gaiq-a nail lavqkhoel nee nl nail ngaol. Khul khi mail dai ngal-aq neq, lavqkhiq tsail nail geeqlaoq daoq cavq nail bhai lovqphail nail haqbhoil, Miqyail ngaq bhai khoel-ai thaq nail ngaol dai, aqyu juq heeq nia nail ngaol. 17 Yaoq juq yaoq neq, neema daolcoev dai thaq khi, Khali nail ganl cavq nail maq ngel-ail. Yovqgavq nail haqbhoil saol-nvq khi nl-ail teevq-eel ngaol. Thaonq bhai aol nail ngaq bhai iqmoeq-u nee maqtsil bhi daq naol dai noeq khi, cavq bhiq-ail teevq-eel ngaol. 18 Thailhai ngaol-aoq, khul maq khi-ail. Neema daolcoev dai thaq khi, cavq nail maqkhaiq, neema maq daol mail cavq nail maqkhaiq, Khali nail ganl khal cavq kivq nail khe-ai cavq haq neq, ngal lavqkhiq tsail nail nee ovqtavq, iqmoeq phao iqsanl, lavqkhiq ya tsail nail ngaol. 19 Khul khi mail dai ngal neq, nuljuq geeqlaoq hal nail ngel-i mail maqkhaiq, Yeiqsul Khali nail Aqhaqlal tsaojao-ai lavq nail ngel-i mail maqkhaiq, ngaq-i mail ya daq thailthaiq nail niil nail lavqkhoel nee ngal ya jel-ail nail ngaol dai, heeq kivq naol. 20 Ngal noeqthunq khi oil movq deedee nail phaq neq, niailhai ngaol. Yaoq phaq yaoq-ao nee nail lavqkhoel bhai ngal maq ya haqsil dai, jel lal-u phao khe-ai niil aq-il iqsanl, ngal geesil nail neema maq aol dai, doevq nail maqkhaiq, sil nail maqkhaiq, ngal ngaq nail aqmaol lavqkhoel bhai Khali bhai thaqeeq thaqheel naol. 21 Ngal aqdoevq doevq nail neq, Khali ngaol. Ngal sil haq neq, ngaq nail haqbhoil jailjeq pevq nail ngaol. 22 Ngaq nail aqmaol aqdoevq doevq haq neq, ngal Miqyail nail ganl nl nail haqbhoil ganl tsoiq nail ngaol. Alheel ngel-i mail, sil nail phaq khi doevq nail phaq, niil nvq phaq nail lavqkhoel ngal khul phaq bhai tsel heeq dai, maq heeq lal-il. 23 Ngal al nvq phaq nail gaiqlaq bhai thulphaol-nvq thaq nail ngel-i mail, noeq-u maq dov-il. Ngal oil movq nail phaq neq, kovq lai khi Khali nee mail jaol movq-ail nial. Niil neq, ngaq nail haqbhoil meeq jaiq nail ngaol. 24 Thailhai ngaol-aoq, ngal ngaq nail aqmaol lavqkhoel-ai aqdoevq doevq haq neq, nuljuq nail haqbhoil ganl tsoiq jaiq nail ngaol. 25 Ngal ya doevq nail ngaol dai, aqduq bhao nail ngaol. Nuljuq eeq lal heel lal khi neema thaqtsaol nail lavqkhoel lavqkhiq bhi tsail nail haqbhoil ngal nuljuq iqsanl nee mail jaol nail ngaol. 26 Alheel ngel-i mail, ngal nuljuq jaol nail bha gaoq kovq lee-u phao, ngal bhaqda nee nuljuq Yeiqsul Khali nail lavqkhoel bhai, iqmoeq-u nee maqtsil lavqkhiq tsail nia jaiq lal nail ngaol.
27 Khalhai pevq lal gaoq Khali nail lavqkhiq tsail nail geeqlaoq daoq bhai geel-nvq dai, aqdoevq doevq yaoq. Alhai doevq haq neq, ngal kev lee khi nuljuq bhai ya moel-u phao maqkhaiq, nuljuq nee mail maq jaol-u phao maqkhaiq, nuljuq neema teevq heeq taivq-ail tavq khi ivqdao dai jaol nail nee ovqtavq, neenoeq noeq nail phaq teevq phaq taivq-ail noeq nail lavqkhoel nee lavqkhiq tsail nail geeqlaoq daoq bhai tavq nail neema thaqtsaol nail phaq nail haqbhoil laijai deedee nail ganl ngal ya gaiq nail gal duq ngaol. 28 Nvjuq bhai neejiav jiav nail tsaol-aq bhai teevq peivq-ail thaq geesil. Maq geesil haq neq, aqyu juq bhai niil nvq phaq bhi moel nail ngaol. Aqyu juq neq, ya luq ya seil-ail khi, nuljuq neq, Miqyail nee mail dov lee-a nail hevqkovq nail phaq ya thaq nail nial dai, aqyu juq ya heeq ya moel nail ngaol. 29 Khul khi mail dai ngal-aq neq, Khali-i mail nuljuq bhai bivq-ai thaq nail meeq deedee nail geeqlaoq al neq, aivq bhai neema thaqtsaol nail phaq taivq-ail maq ngel-ail. Aivq nail haqbhoil khoeq nail jiovq nail bhai ya daq nail phaq iqsanl aol nail ngaol. 30 Nuljuq khi ngal neq, teevq phaq bhai taivq-ail dev pheeljaq thailthaiq nail ngaol. Genl dev pheeljaq nail niil phaq bhai jel lal-u phao iqsanl mail, ngal dev pheeljaq nail bhai nuljuq ya moel khi, niil aq-il iqsanl ngal dev pheeljaq thailthaiq nail ganl nuljuq ya gaiq thailthaiq nail ngaol.