Lolmav
Gevq-a nail gaq
Haoqgavq niil keiv iqmoeq ilmoeq bhai, Gaqkhoel Paolluv aivq-i mail gevq-a nail ngaol dai, gevq-ai thaq nail ngaol. Milnee uqnee khe Khali yaq juq iqsanl, Paolluv-i mail gevq-a nail ngaol dai, noeq nail ngaol. Al ovqtavq, neema thaqtsaol nail ganl juq khi mail daoq yuq nail iqsanl, aivq-i mail yaoq dao yaoq bhai yuq-ai thaq nail khe-ai, dul lai nail ngaol.
Paolluv dai ge nail neq, Lolmav nail aqmil ngaol. Daoqceevq neq, Laiqyaq Maolyaq dai ge movq nail ngaol. Heiqbhail nail aqmil neq, Saolluv dai khul nail ngaol. Daoqceevq neq, Khoel nail dai ge movq nail ngaol. Iqmoeq-u phao neq, Saolluv dai yuq khi haoqnao phao neq, Paolluv dai taivq-ail yuq-a nail ngaol.
Gevq-a nail aqyanq khi aqduq
Gevq-a nail aqyanq neq, A.D. 57 kovq niidai bhai gevq-a nail ngaol. Paolluv milkhaoq doi dai, geeqlaoq daoq cavq cavq-ail tsao nail hail pov teevq pov tsao gaq-u phao, Gaolliqthu meenq bhai bhala hail heeq dai jaol-u phao, gevq-a nail ngaol dai, noeq nail ngaol. Yanq al yanq bhai, Yeiqlulsaqlaiq meenq bhai moevq nail sivq nail phaq kev lee-a nail ngel-i mail, Paolluv yaoq dao yaoq jaol nail Khali yaq juq-i mail, Yeiqlulsaqlaiq meenq bhai jaol nail Khali yaq juq bhai tsaojao-ai bhiq nail dai khi, bivq-a nail phul oil khi lai thailthaiq nail ngaol.
Khaq sil gaq bhai gevq bhiq-a nail
Haoqgavq niil keiv, Lolmav meenq khe Khali yaq munl bhai gevq bhiq-a nail ngaol. Aqyanq al yanq nail lavqkhoel, Lolmav meenq bhai Khali yaq maodai maq jaol-ai haq-al. Al ovqtavq, Paolluv Lolmav meenq bhai maq ail kev daiq haq-al. Lolmav haoqgavq gevq gaq khi pultavq, ail kev-a nail ngaol.
Khul bhai noeqthunq khi gevq-a nail
Lolmav meenq bhai neq, Khali yaq maodai maq jaol nail nee ovqtavq, gaqkhoel juq iqsanl, maq lai kev-al. Alheel ngel-i mail, Khali yaq juq-i mail neema thaqtsaol nail phaq bhai bhi ivq khi, hevqkovq nail phaq bhai maldil khalhai ya nail ganl bhi heeq nia nail haqbhoil gevq-a nail phaq pevq nail ngaol. Paolluv Lolmav meenq bhai jaol nail Khali yaq juq bhai aivq lee naol dai, bhi heeq nia nail haqbhoil iqsanl, gevq-a nail ngaol.
1
Iqmoeq ilmoeq khe daoq
1 Ngal neq, Yeiqsul Khali nail yaqkav Paolluv ngaol. Miqyail nail lavqkhiq tsail nail geeqlaoq daoq bhi cavq nail haqbhoil, Miqyail ngaq bhai tsel dov khi khul lavq-a nail gaqkhoel teevq gaq pevq nail ngaol. 2 Lavqkhiq tsail nail geeqlaoq daoq niil neq, “Ngal yaqhao bivq naol” dai, aq-u nee Miqyail-i mail ge-ai thaq nail ngaol. Aivq nail haqbhoil gedan nail juq bhai juq khi, meeq nail haol nail Jalliq bhai gevq-ai thaq nail ngaol. 3 Lavqkhiq tsail nail geeqlaoq daoq al daoq neq, aivq nail Yaqyov nail ganl ngaol. Yaqyov al gaq, aqsivq haqjoil phao nee ge haq neq, Daqbhil nail jeq-e jaq-a nee doevq lee-a nail ngaol. 4 Meeqnail Haolnail Aqhaqlal phao nee ge haq neq, Miqyail nail Yaqyov ngaol. Miqyail aivq bhai gaoq bhi doevq kovq lal-u phao, “Aivq neq, ngaq nail Yaqyov ngaol” dai, bhaqaoq eeq nail lavqkhoel nee phaodaiq lavq-a nail ngaol. Yaqyov al gaq neq, ngadao nail Heeqphaq Yeiqsul Khali ngaol. 5 Yeiqsul bhaqda nee, Miqyail nail geeqlaoq eeljaol maqkhaiq, gaqkhoel ya jiovq dai maqkhaiq, nvjuq ya-a nail ngaol. Nvjuq ganl niil nl nail neq, jeq-e jaq-a iqsanl mail neema thaqtsaol lal khi, daoq naldaiq lal dai, Khali nail haqbhoil nl nail ngaol. 6 Nuljuq iqsanl, Yeiqsul Khali-i mail khul-a nail tsaol-aq al juq nail lavqkhoel bhai aol nail ngaol.
7 Miqyail mailma-ail gaiq-a khi aivq nail tsaol-aq pevq lal dai, aivq-i mail khul-a nail Lolmav meenq bhai jaol nail nuljuq iqsanl bhai, ngal haoqgavq gevq bhoel-ai leevq-a nail ngaol. Ngadao nail Aqbhu Miqyail khi mail Heeqphaq Yeiqsul Khali nail geeqlaoq eeljaol khi neesal-ovq nail phaq nuljuq nail kovtavq bhai jiav dei-eiq.
Paolluv Lolmav meenq bhai lai movq-ai bhiq nail ganl
8 Iqmoeq khe phaq neq, nuljuq neema thaqtsaol nail ganl milkhaoq yaoq khaoq yaoq-ao nee gaiq doi ail-a nail ngel-i mail, ngal nuljuq iqsanl nail haqbhoil Yeiqsul Khali bhai juq juq-ail khi ngaq nail Miqyail bhai tsiqeeq nail ngaol. 9 Ngal neq, neema lavqkhoel bhai kev dai, Miqyail nail ganl nl khi, aivq nail Yaqyov nail ganl lavqkhiq tsail nail geeqlaoq daoq cavq nail ngaol. Al ovqtavq, ngal nuljuq nail haqbhoil khaq mao iqsanl noeq kev khi geeqlaoq hal nail bhai, Miqyail heeq nia nail ngaol. 10 Ngal geeqlaoq khal hal-u phao, nuljuq jaol nail bha lavqtsail mail lal kivq dai, naol neema tsaq haq neq, gailkhaol teevq khaol lav daol lavq yaoq dai iqsanl, Miqyail bhai hal nail ngaol.
11 Ngal nuljuq bhai moel movq deedee-ail nial. Ya moel haq neq, nuljuq neema ivq lal dai, aqhaqlal phao khe kovpavq teevq phaq ganav nuljuq bhai bivq movq-ail nial. 12 Ngal niailhai ge nail neq, ngal neema thaqtsaol nail ngel-i mail, nuljuq gaq kav lal nail nee ovqtavq, nuljuq neema thaqtsaol nail ngel-i mail, ngal iqsanl gaq kav lal dai, oil movq-ail nial. 13 Aqivq jaqbheq juq ol, ngal nuljuq bhai niailhai bhi heeq kivq movq-ail nial. Yu nail jeq-e jaq-a nail haqbhoil ngal ganl nl-u phao, aqheeq heeq dol leevq-a nail khe-ai, nuljuq nail lavqkhoel bhai iqsanl aqheeq heeq dol leevq dai, nuljuq jaol nail bha lal naol dai, ngal mee nia pov noeqceiv-a nail ngaol. Thailhai ngaol-aoq, niil aq-il kev dai, lav tsoiq nail phaq jiav nail ngaol.
14 Heiqlaqsal tsaol-aq bhai maqkhaiq, yu nail jeq-e jaq-a bhai maqkhaiq, neenoeq neekha aol nail tsaol-aq bhai maqkhaiq, neenoeq neekha maq aol nail tsaol-aq bhai maqkhaiq, jeq-e jaq-a niidai nail haqbhoil ganl nl bhiq heeq phaq-ail, ngaq nail kovtavq bhai gailjiov bavq nail khe-ai, dul nail ngaol. 15 Alheel ngel-i mail, nuljuq Lolmav meenq bhai jaol nail juq bhai iqsanl, ngal lavqkhiq tsail nail geeqlaoq daoq cavq bhiq movq deedee-ail nial.
Lavqkhiq tsail nail geeqlaoq daoq neq, bhaqaoq aol nail ngaol
16 Ngal lavqkhiq tsail nail geeqlaoq daoq cavq nail maq haqsil. Khul khi mail dai ngal-aq neq, neema thaqtsaol nail tsaol-aq, yaoq gaq yaoq-ao nee hevqkovq nail phaq ya dai, lavqkhiq tsail nail geeqlaoq daoq al daoq neq, Miqyail nail bhaqaoq pevq nail ngaol. Iqmoeq Yuldav nail tsaol-aq bhai hevqkovq khi haoqnao yu nail jeq-e jaq-a bhai hevqkovq nail ngaol. 17 Lavqkhiq tsail nail geeqlaoq al daoq nail lavqkhoel Miqyail nail tsaq nail daol nail phaq, bhaqlaoq kheq dai, dov lal-a nail ngaol. Tsaol-aq teevq gaq neema thaqtsaol nail ngel-i mail, Miqyail aivq bhai tsaq nail daol nail al phaq bhi moel-a nail ngaol. Jalliq lavqkhoel bhai gevq-ai thaq nail khe-ai,
“Tsaq nail daol nail
tsaol-aq
neema thaqtsaol nail
bhaqda nee,
aqdoevq
ya doevq nail ngaol” dai,
gevq-ai thaq nail ngaol.
Tsaol-aq iqsanl mail oeqbal yaq ngaol
18 Tsaol-aq yaq-i mail Miqyail bhai neema maq thaqtsaol dai, maq tsaq maq daol nail phaq khal nl-a nail kovtavq bhai, Miqyail neema phail nail phaq nqtavq nee mail bhaqlaoq kheq dai, dov lee nail ngaol. Tsaol-aq al juq neq, maq tsaq maq daol nail phaq nl khi, maldil tsaq nail phaq bhai yu maq bhi moel nia dai, lav tsoiq-ai thaq nail ngaol. 19 Aqyu juq Miqyail nail ganl heeq nia heeq phaq-ail tsaq nail phaq bhai, ya heeq ya moel-a nail ngaol. Khul khi mail dai ngal-aq neq, Miqyail-i mail bhaqlaoq kheq dai, phaodaiq bhiq-a nail ngaol. Thailhai ngaol-aoq, aqyu juq neema maq thaqtsaol-ail. 20 Miqyail nq teivq mil teivq teivq-u n-gaol nee mail, aivq nail lavqkhoel khe aol nail maq heldaiq moel nia nail phaq maqkhaiq, nqmaq maqluv halyeel bhaqaoq eeq nail phaq maqkhaiq, aivq nqmaq maqluv halyeel ivq nail Miqyail pevq nail ganl maqkhaiq, bhaqlaoq kheq dai, heeq duq moel duq lal-a nail ngaol. Aivq-i mail nl-ai thaq nail ganl bhai heldaiq khi alhai heeq lal nail ngaol. Alheel ngel-i mail, “Nvjuq maq heeq kivq-ail” dai, aqyu juq maq jil nia-ail.
21 Tsaol-aq al juq neq, Miqyail bhai heeq nia khi ngaol-aoq, aivq bhai tsiqeeq tsiqheel nail geel-nvq nail khe-ai, maq tsiqeeq maq tsiqheel-ail. Al ovqtavq, aivq bhai maq ev-ail. Aqyu juq-i mail khal noeq nail phaq neq, khul teevq phaq-ail ganl maq tsoiq dai, pevq-ail khi aqyu juq nail neema iqsanl, navtsee dai pevq ail-a nail ngaol. 22 Ngal neenoeq neekha aol naol dai, yovqgavq bhai yovqgavq ge khi ngaol-aoq, aqyu juq neq, yaqjaoq khaqlal miqthoi juq pevq lal-a nail ngaol. 23 Teevq thal-iq maq sil nail Miqyail nail seiqleiq khaoqsail bhai, aqyu juq maq hav bhoel-al. Sil nia nail tsaol-aq nail maolkhoel, keivq-avq, liq khil liq lavq covq nail jaiqyaq khi mail, soiq soiq-ail tsao nail jaiqyaq juq nail maolkhoel bhai hav bhoel-a nail ngaol.
24 Alheel ngel-i mail, aqyu juq nail neema lavqkhoel bhai khal nl movq nail khe-ai aqjiivq aqcavq phaq nl dai, Miqyail aqyu juq bhai phaiq ha-u phao, aqyu juq teevq gaq nee teevq gaq haqsil deedee lal nail phaq nl-a nail ngaol. 25 Khul khi mail alhai phaiq ha bhiq-a nail dai ngal-aq neq, aqyu juq Miqyail nail maldil tsaq nail phaq bhai maq hav bhoel dai, goiqbhaoq bhaoq nail phaq bhai hav bhoel-a nail ngel-i mail ngaol. Aqyu juq neq, iqsanl mail teivq-ai thaq nail Miqyail bhai khaonq ha khi, aivq-i mail teivq-a nail phaq bhai uqhuq thaoq thaoq-ail, al juq nail haqbhoil ganl nl nail ngaol. Iqsanl mail teivq-a nail Miqyail bhai, nqmaq maqluv halyeel tsiqeeq bhel.
26 Alhai nl-a nail ngel-i mail, aqyu juq haqeiv nail phaq nl movq nail neema aol nail khe-ai nl dai, Miqyail aqyu juq bhai phaiq bhiq-a nail ngaol. Aqyu juq yaqmai-aq juq neq, nl heeq phaq-ail tsaq nail aolsaolkovq bhai khaonq ha-ail ceevq khi, yaqmai-aq aqtsaoq maq nl khaoq nail phaq nl thailthaiq nail ngaol. 27 Yaqyov-aq juq iqsanl alhai nl thailthaiq nail ngaol. Yaqmai-aq juq nee mail maq iqthaiq tavq movq dai, yaqyov-aq aqtsaoq khaqmiq sev movq deedee nail neema aol nail ngaol. Aqyu juq teevq gaq nee teevq gaq haqsil deedee heeq phaq-ail tsaq nail phaq nl-a nail ngel-i mail, aqyu juq-i mail nl bheeq-a nail khe-ai geel-nvq dai, aqyu juq nail aqmaol lavqkhoel bhai ya daq nail ngaol.
28 Aqyu juq Miqyail bhai noeq cov-ai thaq nail neema maq aol-ail. Alheel ngel-i mail, aqyu juq-i mail noeq nail phaq neq, khul nail ganl maq tsoiq-ail, maq tsaq maq geel-nvq nail phaq nl dai, Miqyail aqyu juq bhai phaiq bhiq-a nail ngaol. 29 Aqyu juq nail lavqkhoel bhai, maq tsaq maq daol nail phaq, haqeiv nail phaq, yu nail nlmaoq bhai maivjeel jeel nail phaq, yu bhai khoeq lai dai nl movq nail phaq, teevq bhee aol nail ngaol. Yu bhai maivjeel jeel nail, lav heivq nail, khaq pheeljaq nail, goiqbhaoq bhaoq nail, maq heldaiq nul nail, yu nail haoqnaol phao nee ge doil nail, niil juq iqsanl teevq bhee aol nail ngaol. 30 Aqyu juq neq, khal ge movq-ail ge doil nail, Miqyail bhai neejiav jiav nail, yu bhai deeq nail, neema eeq nail, yovqgavq nail aqmaol bhai yovqgavq thaqeeq nail, maq meeq nail phaq nl nail, aqbhu aqma nail daoq maq naldaiq nail, niil juq iqsanl teevq bhee aol nail ngaol. 31 Aqyu juq neq, khul teevq phaq-ail maq noeq heeq nia-ail. Saljial maq ivq-ail. Yu bhai maq gaiq-a-ail. Gaoqhaq gaiq-a nail neema iqsanl maq aol-ail. 32 Alhai khal nl nail tsaol-aq juq neq, sil nail geel-nvq nail ngaol dai, Miqyail nail aoldaoq kovqdaoq lavqkhoel bhai ge ceiv-ai thaq nail bhai aqyu juq heeq nia nail ngaol. Heeq nia khi ngaol-aoq, aqyu juq nl thailthaiq nail nee ovqtavq, alhai khal nl nail tsaol-aq juq bhai neema tsaq nail ngaol.