Pol Uqa Jaqec Je Oso
Kolosi Tamanec Jaqiaden
Aqunec Je
Kolosi eu taun oso Esia hatuna nijen. Eu Efesas taun cemenug nijen. Pol uqadodoc Krais tamanec Kolosi ono qee sanan mel. Euqa Pol uqa Efesas bilen saenna uqa dana oso, ijan Epafras, me je maadecnu suldocob Kolosi ono nuen. (Eu 1.7-8, Aposel 19.10 feiga.)
Pol uqa jaqec je i jaqen saenna uqa Rom ono uqana jona gihacdoc bilen. (Eu Aposel 28.16-31 feiga.) Uqa Rom ono bibilei Kolosi tamanecnu je eu don. Uqa dana leih age tamanec uhuli iwaladegina ec don. Dana eu age tamanec sab leih cain jowain ec maadegina, age deel leih eu gun bahic, odocob jagel haun eu gun bahic, odocob Juda agena cuha deel eu gun bahic ec maadegina. Age ceteteh leih cain hewowain, cain ji fowain, cain qududowain ec madegina. Age enselnu cuha fegina. Age Krais uqa ohis bahic qee ec madegina. Age dana uqa jahunec je dona eu uqa dana docca ec madegina. Age dana agena cisdoc toodogina. Uhulec iwaladec eu Filipai tamanec agena wawaga meleec me qee odona eunu Pol uqa tamanecna wawaga meleec tutuc mudecnu jaqec je i jaqiaden.
Pol uqa uhulec iwaladec eu mele qee ec madena. Eetanu eu mele qee? Krais uqa Anut. Ege Krais foqona eu odi ege Anut foqonawe (1.15). Krais uqa ceteteh cunug Anut ifanen eu agena matu bilia (1.15). Uqa ceteteh cunug qee calec ninijen uqa aquniadi bilen (1.17). Krais uqa uqana tamanecnaca, uqa ceteteh cunugca agena ilo bilina (1.18). Eu Krais himec uqana tamanec ceseli fajadi besaden (1.13). Jic oso cesulgecnu qee nijel. Krais uqa cal mecnadec ceseli cajec matu (1.18). Anut uqana cebac bilecca, uqana kobol cunugca eu Krais dewegna am bec bilina (1.19, 2.9). Krais uqa ceteteh cunug saona mahanaca bilegina eu Anutca tanawadena (1.20). Eunu dana cajaca age Kraisca gabandoc bilegina euna himec Anut uqa cahahaadecnu ihoc (1.21-22). Odimei Pol uqa dac 2 leceb 4na Krais uqana gug inu Kristen dana cajaca age adi biluqagannu maadena.
Pol uqa jaqec je i jaqimei dana lecis alen. Odocob dana lecis ale ehi li Kolosi tamanec aden. Dana i ale oso eu Tikikas. Oso eu Onisimas. Pol uqa Onisimasnu je mati jaqimei jaqec je i Failimon suldon.
Je Dunuhnu Dado Mec
1. Aqunec je (1.1-14)
A. Feele adec je (1.1-2)
B. Hetaga ec je (1.3-8)
C. Inondoc je (1.9-14)
2. Krais uqa ceteteh cunug agena ilo bilina (1.15-23)
3. Pol uqa Kraisna tamanecnu cabi ona (1.24-2.7)
A. Uqa Kolosi tamanec cesuladen (1.24-29)
B. Uqa Kolosi tamanec agena wawaga meleec eunu cisdona (2.1-7)
4. Ege Kraisca gabandoc cebac biluquna eunu ege dana agena uhulec je toodocnu qee nijel (2.8-15)
A. Age uhulec iwaladec dananu mecii cuhadoigale (2.8-15)
B. Uhulec iwaladec dana cain toodowain (2.16-19)
C. Pol uqa uhulec je uqana gug eu fena (2.20-23)
5. Tutuc cobocnu loo je (3.1-4.6)
A. Cebac bilec haun hilahca (3.1-17)
B. Kristen talnu loo je (3.18-4.1)
C. Ege gagadicca inondudu jic tutuc coboqale (4.2-6)
6. Feele adec cit qoc je (4.7-18)
1
1 Ija Pol, ija Krais Jisasna aposel. Ija Anut uqana cisdocna aposel calem. Ija ege wawige meleec cotige Timotica, 2 ele Anutna dana cajaca qagoc age Kolosi ono bilegina eu ele wawile meleec cotileil age Kraisca gabanadec bilegina eu jaqiadowona. Memige Anut uqana eelgec uum igec malol bilecca ageca biliale.
Kolosi tamanec age Jisasnu wawaga mele bahic meleena
3 Ele agenu Anut inondowona saenna ele Anut uqa egena Tibud Jisas Krais Memeg gaid helaga dowonanu. 4 Ge, ele age Krais Jisasnu wawaga meleena ec doh. Odocob age Anutna dana cajaca qagoc cunugnu nalunuga megina ec ha doh. 5 Mele je eu me je ageca hahawan hocob age Krais Jisasnu wawaga meleeceb age ceteh me Anut uqa agenu saona gun hewi cofdona eunu dah mein. Ceteh me eu age ocnu sumudi bilegina. Eunu agena wawaga meleecca agena nalunuga mecca alena gug eu ceteh me age ocnu sumudi bilegina. 6 Me je eu ageca hon. Dana cajaca ageha mahamaha cunug me je maadec cabi ogina. Odocob dana cajaca mati bahic age me je dah mimeig wawaga meleen. Me je eu dana cajaca mati bahic age gemona li hunawi ihoc lena. Kolosi ageha hahawannadec Anutna eelgec uum igec eu mele bahic ec dah mimeig me je eu age gemona li hunawi ihoc lenwe. 7 Age Anutna uum igec eu mele bahic eunu Epafras wele iwaladeceb oin, uqa ele cabi hijile bahic, uqa Kraisna cabi dana me, uqa ele cesullimei Kraisna cabi me cofdona. 8 Odocob uqa agena nalunuga mec kobol eu Kis Gun uqa aden ec malen.
9 Gug inu ele deel hahawannadec agena kobol menu dah moh eu gaid li Anut agenu inondocnu qee culoloh. Ele Anut agenu odi inondowona, Anut uqa uqana cisdoc age wawagana meceb du cuhadoqagannuca, Anut uqana Kis uqaha Anutna cisdoc silec fogo adecca eu cunug adecnuca ec inondowona. 10 Odocob age Tibud gale dona eu odi cobocnu ihoc. Odocob ceteh uqa waug me nijigian eu gaid odoqagan. Agena cebac bilec eu cabi me hanoqagan. Odocob age Anutnu doc silecca eu ben dugian. 11 Anut uqana gagadic odoc fulacdoccanadec gagadic cunug eu odadeceb age gagadic meigale. Eunu age ceteh cunugna gagadicca tawimeig culumen gahidoqagan. Odocob age ceelecca 12 Memige Anut hegaga doqagan, uqa cesuladeceb Anutna mugumuga mec Anutna dana cajaca qagoc eu age cul fulacdocca euna bilegina eu oqagan age oqagannu eu ihoc odon. 13 Uqa tuna gagadic odocnadec besigi ehigimei uqa Melah uqa nalug mena eu uqana culna migen. 14 Ege Anut Melahca gabandu biluqunanu Anut Melah uqa ege fajigi besigen, odimei egena silail cagasigen.
Krais dumanca uqana cabica
15 Ege Anut fecwe qee euqa Anut Melah ege fecnu ihoc qa uqa Anut. Uqa ceteteh cunug Anut ifanen eu agena matu bilia. 16 Ge, Anut uqa ceteteh cunug Melah ebenna ifanen. Uqa ceteh saona nijiaca, ceteh mahana nijiaca, ceteh foqonaca, ceteh qee foqonaca, kisna gagadic odocca, tibud eundecca, king bilecca, gabman cofadecca, eu cunug Melah ebenna ifanen. Anut uqa ceteteh cunug Melahnuha ifanen. 17 Anut Melah uqa ceteteh cunug qee calec ninijen uqa aquniadi bilen. Odimei uqa ceteteh cunug heweceb bilegina. Uqa ceteteh cunug agena gug bahic, age uqanu agena cudun bahic oin. 18 Uqa tamanecna ilo, tamanec eu uqa deweg. Uqa gug qoc, uqa cal mecnadec ceseli cajec matu. Eunu Anut uqa ceteteh cunug agena aquniadec biligiannu muden. 19 Eetanu? Anut uqa uqana cebac bilecca, uqana kobol cunugca eu Melah am bigiannu gale don. Eunu uqa mitocob bilen. 20 Odocob Anut uqa Melahna uqa ceteteh cunug saona mahanaca bilegina eu Anut uqadodocca tanawoqagannu cisdon. Odocob uqa Krais golac na babalecna basecdon euna malol mudeceb ceteteh cunug saona mahanaca bilegina eu uqaca tanawaden.
21 Ageha age saen osona Anut cemenug qee bilelein. Age qisol mimi age cisdoc me qee cisdoloig eunu age uqana cad onoca bahic bilein. 22 Euqa qila uqa Melah deweg na babalecna cal men euna Anut uqa tanawadeceb uqaca osoben wawaga osol men. Melah uqa age ehadeceb Anutca loqagannu, odocob age gunca, tutuc odocca, cataniecca uqa amegna biluqagannu uqa eu odi odon. 23 Euqa age wawaga meleec gagadic hewimeig duuec taweiga. Odocob ceteh oso age diadeiaunnu age ceteh me ocnu sumudi bilegina eunu me je wele doin eu dahiniga cain celeiaun. Ija Pol, ija me je uqana cabi dana calem. Odocob me je eu, age dana cajaca cunug mahamaha bilegina eu qasali maadein.
Pol uqa Kolosi tamanec cesuladen
24 Qila ija agenu culumen gahidugina eunu ceeligina. Ija dewenina culumen gahidugina euna Kraisna culumen gahidoc leih nijia eu ihoc ligiannu odigina. Ija tamanec cesuldocnu odigina, tamanec eu Krais deweg. 25 Odocob Anut uqa ija tamanecna cabi dana miten. Uqa ija cesuladigennu cabi i iten. Cabi i ija Anutna je cunug dana cajaca maadecemin doqagannu iten. 26 Anutna je eu wele saen cunugna jahuni bilen, eu dana cajaca cunug qee doloin. Euqa qila Anut uqa je jahunec eu uqana dana cajaca qagoc eu ageca camasac meceb doin. 27 Anutna cisdoc eu odi, uqa uqana je jahunec eu odocob uqana dana cajaca doqagan. Je jahunec eu cehewanca, eu gagadic odoc fulacdocca eu dana cajaca mahamaha cunug bilegina agenu bilia. O Kolosi, je jahunec uqana gug eu odi, Krais uqa age wawagana bilina. Odocob age uqana gagadic odoc fulacdocca adigiannu sumudi bilegina. 28 Eunu ege Kraisna me je dana cajaca cunug qasali maadoqona. Ege cisdoc silecca cunug dana cajaca ulaulaadi iwaladoqona, ege dana cunug osolosol ehadocomun age wawaga meleec dana bahic Kraisca gabanadec bilegina eu odi bahic Anut cemenug caloqagannu. 29 Eunu ija cabi i odocnu gisi cagugina. Gagadic odoc Krais itina eu ija wawina cabi ona euna cabi ugina.