Oso Jaqec Je i
Hibru Dana Jaqiaden
Aqunec Je
Jaqec je i Pol uqana jaqec kobol qee toodona eunu me je doc dana age Pol eu qee jaqel ec cisdogina. Dana uqa jaqec i jaqen uqa Juda agena ihanec kobolnu du cuhadon. Doc dana age Banabasfa, Apolosfa eu jaqen ec cisdogina. In oso jaqec je i jaqen uqa Kristen Juda dana cajaca age Juda agena kobol haun ceseli ocnu cisdogina eu agena Jisas Kraisnu wawaga meleec gagadic mudecnu jaqiaden. Odimei Anut uqa Jisas Kraisna cabi ben on eunu jaqen. Eu Jisas Krais himec uqa Anutca uqana eelgec uum igecca camasac ihacgena eunu jaqen.
Jaqec je i ceteh ben cijednu madena eu odi. 1. Jisas uqa Anut Melah bahic. Jisas mahana cobon saenna uqa culumen dainca ben gahidon. Odocob odon eunu Anut uqa Jisas odudeceb uqa dana cunug wooladec calen. Eunu Anut uqa Jisas Kraisnu dana cajaca cunug cahahaadecnu ihoc (eu 2.10 feiga). Odimei Jisas uqa je hahun madec dana wele bilein eu cunugca, ensel cunugca, Mosesha eu cunug wooladen. 2. Anut uqadodoc madeceb Jisas uqa nawel tawec ihanec dana bileceb catanena. Odimei uqa Juda agena ihanec dana cunug wooladena. 3. Jisas uqa nawel tawec ihanec dana ilo, uqa sao jobon bilina. Eunu uqa dana cajaca cunug age uqanu wawaga meleena eu cahahaadecnu ihoc. Cuha fec kobol eunu Mosesna loo je madena, eu Jisasna cabi oc ben uqana galolo je himec.
Jaqec je i dana cajaca agena wawaga meleec gagadic mudecnu gale dona. Eunu eu Isrel dana cajaca wele bilein agena wawaga meleec gagadic eunu je mati madena (dac 11). Age celcel culumen gulucadecebfi cain jaen aqeiaun. Age agena wawaga meleec hewi daugdu lili cal moqagan. Age Jisas fefeig uqana kobol toodu odoqagan. Odimeig age agena sogoi coboc hawadoqagan.
Je Dunuhnu Dado Mec
1. Aqunec je: Ceteh haun Anut camasac muden eu ceteh weledec wooldoc (1.1-4)
2. Krais uqa bal cehec je weledec uqana dana ben wooladec (1.5-7.28)
A. Krais uqa ensel cunug wooladec (1.5-2.18)
1. Anutna je eu Krais uqa ensel cunug wooladec bilia ec madena (1.5-14)
2. Krais uqa Anutna cahahagec Anut igen eunu ege cain ahawadoqaun (2.1-4)
3. Anutna je haun eu Krais uqa ensel cunug wooladec bilia ec madena (2.5-18)
B. Krais uqa Moses wooldoc (3.1-4.13)
1. Krais uqa adi Moses wooldoc bilia (3.1-6)
2. Ege Anutna cahahagec euna limeb jaen mudeqannu gagadic moqale (3.7-4.13)
C. Krais uqa Eron sihulna ihanec dana wooladec (4.14-7.28)
1. Ege wawige meleec qasali madoqona eu hewi daugdoqale (4.14-16)
2. Dana uqa adi nawel tawec ihanec dana ilo calena (5.1-10)
3. Ege mel sim agena kobol eu culimeb Kristen dana ben caloqale (5.11-6.12)
4. Anut wele mele je magen eunu wawige meleigian (6.13-20)
5. Krais uqana nawel tawec ihanec dana sihul eu ihanec dana sihunugail filfil wooladec (dac 7)
3. Kraisna ihanec cabi eu ihanec cabi weledec wooladec (dac 8-10)
A. Kraisna bal cehec je haun eu Mosesna bal cehec je weledec wooladec (dac 8)
B. Kraisna cuha jo gun hamol sao jobon bilia eu Mosesna talah jo gun weledec wooladec (9.1-12)
C. Kraisna ihanec eu Mosesna ihanec weledec wooladec (9.13-10.18)
D. Age gagadic taweigale (10.19-39)
4. Age agena wawaga meleec euna gagadic tawoqagan (dac 11-12)
A. Anutna dana cajaca weledec age agena wawaga meleecna gagadic tawein (dac 11)
B. Anut uqa age melahulwe tutuc madenafi eu ceteh me bahic (12.1-11)
C. Age adi agena wawaga meleecna gagadic tawoqagan (12.12-17)
D. Age Saion Aluhna wele calein eunu agena wawaga meleecna gagadic taweigale (12.18-29)
5. Cit qoc je (dac 13)
A. Kristen cobocnu dado madec (13.1-17)
B. Inondoc je (13.18-19)
C. Eeladec je (13.20-21)
D. Dahiniga mec je (13.22-23)
E. Feele adec je (13.24-25)
1
Anut Melah uqa cona je magen
1 Wele bahic Anut uqa saen geh bahic jic filfilna uqana je hahun madec dana conogana ege jajanigeil je maaden. 2 Euqa deel hib cit qoc ina uqa Melah cona je magen. Anut uqa Melahna himec sao mahaca ifanen. Anut uqa Melahnu madi, hina ija huqani, don. Hibna hina ceteteh cunug ogan, don. 3 Melah uqa Anut meca bahic ihacgena. Uqa Anutca ale caca, uqa Anut cinigwe. Odimei uqa je gagadic odocca madeceb ceteteh cunug gaid gagadic tawena. Odimei uqa dana cajaca cunug agena silail cacuadi hedumei uqa sao jobon ono King Meca Bahic uqa eben meulana isec bilen.
Anut Melah uqa ensel cunug wooladec bilina
4 Anut uqa Melah u mudeceb uqa ensel cunug wooladen. Eu odiwe Anut uqa Melah ijan oso uten eu ensel ijanaga wooladec. 5 Ge, Anut uqa uqana ensel oso odi qee madol:
“Hina ija melami.
Qila ija hina memen caliga,” qee dol. (Buk Song 2.7)
Anut uqana ensel osonuha odi qee madel:
“Ija uqa memeg biligen.
Odocob uqa ija melami odi biligian,” qee el. (2 Samjuel 7.14; 1 Stori 17.13)
6 Odocob saen Anut uqana mel matu maha ina suldocob nigiannu ninijen uqa odi maden:
“Anutna ensel cunug age gob cehimeig uqanu cuha foqagan,” en. (Loo 32.43)
7 Anut uqana ensel agenu odi maden:
“Anut uqa uqana ensel fufu fuludocwe mudadena.
Odocob uqa uqana cewel utoc danaha ja belicancawe mudadena,” en. (Buk Song 104.4)
8 Euqa Anut uqa Melahnu maden:
“O Anut, hinana king bilec cabal eu bileceb catanigian!
Hina hinana king culna ititom biligina.
9 Hina ititom kobol gawem.
Hina loo je tefacdoc kobol sagagdom.
Eunu Anut, hinana Anut ehihimei ceelec dana binainca bahic odi mihen, eu hinana danah eundec wooladem,” en. (Buk Song 46.6-7)
10 Odocob Anut uqaha Melah odi madon:
“Tibud, hina gug qocna maha ifanem.
Odimeg hina ebengulna ceteteh cunug saona nijia eu mudem.
11 Eu cunug fadaloqagan qa hina odi gaid bilegan.
Ceteteh cunug lotoc cinigwe hilah moqagan.
12 Hina duan lotoc cecelac cinigwe qahadi helegan.
Odimeg hina lotoc hilahwe helimeg haun oso ogan.
Euqa hina biligina, eu odi gaid bilecem catanigian,” don. (Buk Song 102.25-27)
13 Anut uqa uqana ensel oso odi qee madol:
“Ene hina ebeni meulana isec biliga.
Ene bibilem hinana cad cilehadimig age cabal jaim bisalu isec madigen,” qee dol. (Buk Song 110.1)
14 Ensel age eeta? Eu age cunug eu kis himec, eu Anutna cewel utoc dana. Anut uqa dana cajaca cahahaadigian eu Anutna mugumuga mec oqagan eu cesuladecnu suladeceb ageca belegina.