15
Yisas Karaisi Ma Evaránen E Mantein Baya Ino
1 Mumunan tiyofi sifá tiváeyan noe, pefá ma Yisas Karaisini kama vaya siaméku ma inire mantaan ákona ukhaona van tian ákona uantano van mi ma vaya senté uno. Mai fara vara seyo, mai vaya ma ineonarái mantaan ákona ukha ono. 2 Mai ma siamenuna kama vayará ma ákona mumunan esin maen mairái Tiyarafenu ano aviranten mifo ena yanáká ma mumunan esin mai ída aviranten mino.
3 *Ais 53:5-12Mai fara vara seyo, inte vayá mantare rafu mai vaya máan tiretimpin tiamé uno. Tiyarafenui vompon dókifin ma sikhá eníen Yisas Karaisi ano setinti umerái e fúken mino. 4 *Mat 12:40; Apo 2:24-32Tiyarafenui vompon dóki ano ma sikharé einíen béin masí uran ma kanú manaú damú orivíkan masí pinté e manten mino. 5 *Mat 28:16-17; Ruk 24:34Masí pinté e mantakharé íkan Pita nare ódaran ínaimpáké eni eyo iyampon kayo ano onen mino. 6 Ódaran maí damú anan dan manápá antareti (500) nanin bantafin afoká íkan onen mino. Afoká íkan ma ontaré ein kéká pinté manáa ano furiyan maen kokhon mano fara van mino. 7 *Apo 1:3-4Mai oyampáké Yemisi ano véin ódaran ínaimpáké ena baya varen orin kéká onen mino. 8 *Apo 9:3-6Minó ano ontaréí ínaimpáké iyampon ma kain damú ma esantavin ma fasavi yamú ma mo afoká einíi en ten tivorá afokái oné uno.
9 *Efe 3:8; 1Ti 1:15Mai fara vara seyo, séi ma fefá Tiyarafenui vanasi aruan puriyaré eruna van téin nan ída aposeri oe sen tarantí eyo iyampon kayoi aránaó bano van muno. 10 *2Ko 11:23Máa siyá umpo sesi yoran tasa Tiyarafenu ano séin tarisari usintádá máan tukhe rauno. Ída ino. Mai fara vara seyo, ena aposeri kéká esantaré téi yóké umpo mai seyantasa yóke rauno. Ída ino. Tiyarafenu ano vei sarisari fókéi séin pinté uaren doren mino. 11 Máan tukhanti séi ma sian amiyaruna mai vaya ano fi ena eyo iyampon kayo ano ma siamin nain baya ano fi mai ída enará ukhantiya onan nono. Yisasi ma fúaren e mantakhein baya ma seti siaméku mairá ma mumunan iyaona anon kákan danasí ukhen mino.
Púká Inain Kéká Ma E Mantan Nain Baya Ino
12 Máan tukhen mifo Yisasi ma fúaren e mantakhein baya ma siamékuya inikha ompo mai faraé tireyá tiréti ankan pinté manáa ano mai ma fúkein nanin banta van ída orun mantanten mino siya rafono. 13 Mai fara vara seyo, fúkein nanin banta van ma ída orun mantanten ne sinte mai Yisas Karaisin nan ída evaránen e mantakhen nen tin nono. 14 Yisas Karaisi ma ída evaránen avían mantakhanti mae mai ma veni furin baya ma sian ameruna vá Tiyarafenurá ma ákona inin kaiyaona vá ano mo faen danasí anan inten mino. 15 Púkein kayo ano ída evaránen orun mantanten ne ma sé tifanté mai seti aposeri kéká ano Tiyarafenun kampun tiantá tifanté uno. Mai fara vara seyo, Tiyarafenu anon Yisas Karaisin masí pintena orun avían mantakhein bantí teti ma siyaruna vaya mai kampun mi siyanté uno. 16 Mai fara vara seyo, fúkein nanin banta ma ída e mantanté intin mai Yisas Karaisin má deren masí pinté ída e mantakhen mino. 17 Inká Yisas Karaisin ma ída masí pintena orun avián mantakhe ne ma sinteya mai siretíi mumunan mano mo faen danasí intiya siretí ankan umefin para van nono. 18 Máan tukhantin mi Karaisintá ma mumunan uven púkan nain kayo ano o afeyoranten mino. 19 Inká taréa ana Yisas Karaisin nan tiya ino van muno siré ma iniyaruna mai fura sé ma varará ma ída funtákein nanin banta ma vain esantaréi namu uron ukhé bá tifékun mi ena nanin banta ano setin nan arunan usintanten mino.
20 Máan tukhen mifo Yisas Karaisi ma fúbin masí pintena Tiyarafenu ano orun avían mantakhein mai fura yaná ino. Mai ma fúká intin evaránen orun avían mantan nain kékái véi ano aníen ifan dunan pinte ma araíen duyasein an mi yakhen mino. 21 *Rom 5:12Mai fara vara seyo, Adamun pinté uaren purin afoká ukháin mi inká Yisas Karaisin pintéi orun mantan afoká en mino. 22 Máan tukhein nan mi Adamuni kékasi ma in nain mano mai furiyan manan banten mifo Yisas Karaisini kékasi ma in nain kayoi fara van oriyan ban aunan aminten mino. 23 *1Te 4:16; Rev 20:5Aminten mifo evaránen ma e mantani aa mai máan mi ukhen mino. Yisas Karaisin naren púbin mi ifan dunan ma yuyaseiníen béin orun avían mantakhein pasen béi ma ovaránen erin nain damú beni vanasi ma fúkaren masí pinté orun mantanten mino. 24 Orun mantavintin maen namu aunan kayoi ara ara ákona vá inká namuro ano*Namuro maen mai namu aunan kayo vá Ban Anon má bei namu enisori kayo vá ino. ma yafisiyá ein má maman bararasí uren dafisin ákona maman Tifóe Tiyarafenun kaúdantin mi ínaimpáké bara ma kípan damú afoká inten mino.
25 *Mat 22:44Mai fara vara seyo, Yisas Karaisi ma kin karáká kumantantin maen béi anon beni namuro kayo maman bararasí urantin mi véi yafisinten mino. 26 *Rev 20:14Purin ma vain mai sipá kípan namuron bain mai maman bararasí uren beni ákona yo maman karúdanten mino. 27 Mai fara vara seyo, Tiyarafenui vompon dóki ano sikhen mino. “Tiyarafenu ano minó danáká ma yafisin ákona véin amikhen mino.” Íbo 8:6
(Amikhen mifo Tiyarafenu vasa mai ma ven amikhein ákona aránaó ban naino. Ída ino.) 28 Máan turen béi ma minó daná ákona maman barasí uren be Afóen avorá orintin maen mai ma esé arái en be Anin minó ákona amikhá ein Tiyarafenu ano minó danáká o ánoní inten mino.
29 Púká ein kayo ano ma ída e mantantin maen betin aya ono van ma monó non péantáká ein kéká ano náiesá tinten nafino. Ínká púká ein kayo ano ma ída orun mantanté intin mai nái ana vará purin nanin banta aya intó uno siren monó non maman tiyaren nafino. 30 *Rom 8:36Inká nái vará ena nanin banta aya ono van ena ena yamú tetiyantá uman bariyá bá tife rafuno. 31 Monó nanin banta oe, fura siré ma vaya siamiyá uno. Ena ena yamú maen purin mano sen má áde suron ban mifo Yisas Karaisi ma siretin má túpá ukhen ma siretimpin doriyain nan mi simusin iyá uno. 32 Nai yanasá barano vará Efesasí ma vain banta kayo vá ma siruviyaruna ano afá tafúna kayo vá ma aruvein an diyá tife rafuno. Ída ma fúkein nanin banta ma orun mantiyain ma vantí maé mai setí ankan ída kanaí é kama yanáká inin kaúdé ave ukhé bá tifanté uno. Mai fara vara seyo, sakhanampa vanta Aisaiya máa sikhen mino.
“Inuran puró tifanté umpo erí tifé omasí iyáké
óen non naré óen ó tifano.” Ais 22:13
33 Ída vá áesin ná mai ma furin pinté ída e mantanten ne ma siyain kéká ano éin máka sino. Mai fara vara seyo, “namu avúavá ma variyain kéká ano kama avúavá aruan puré iyan mino.” 34 Ída vá umeí iya váke ovare vá me ineno. Mai fara va máa siya rauno, manáa ano ma ída Tiyarafenun afová ukhanteya mai siretin ayave vá bano.
Evaránen Ma E Mantan Nain Bukhafai Vaya Ino
35 Banten mifo manáa vanta ano ina iyan ma “Intesá uren ná púkein nanin banta ano orun mantaven inté ukhein bukhafá mamaren ná erintéi vae” ma siyain, 36 *Yon 12:24mai faraé tiré óen banta ano ma inaeiní iya rafono. Danayun ma varafin pafasiren nan maen ída esé ana orun pótiyan mifo fúaren mi ínaimpá orun póté iyan mino. 37 Inká danayun ma varafin dóden nan baren ma e ampamé iyain mai esesa máan tukhein na yaruan mo yoré iya vaono. Ída ino. Titó asakhakhein ayun mi varafin pafasiren nan baren orun póté iyan mino. 38 Póté iyan mifo Tiyarafenu ano vei anunurái mai yanasinta auí uanté iyan mino. Ara ara ayun ma vain mai vei avúavákái sen orun ampamé iyan mino. 39 Mai ma ara ara yanayun kayo vá káta kayo vá ano ma e ampamiyain má minó danái au ano ída manaí ukhen mino. Banta au vá uraran au vá nun au vá inká noyana au kayo vá ano enarasí ukhé iyan mino.
40 Máan manan en mi ayompin ma vain danasinta vá barará ma vain danasinta vá ban mino. Ayompin ma auí ukhein danasinta vá barará ma auí ukhein danasinta vá ano ída manaí ukhen mino. 41 Áau ano veyan enará ukhein daná bákan mi inká biyon má ofu kayo vá ano enará ukhen mino. Máan tukhan ofu kayo mai veyan mana mana ano ena avúaváká panu sirú é iyan mino.
42 Evaránen e mantan nain bukhufa ano máan manan ukhen mino. Mai ma masí ukhá ein bukhafa ano fútaen namu ukhá intin maen evaránen ma orun mantan nain bukhafa ano ída fútaen namu inten mino. 43 *Fir 3:20-21Tetisi furin bukhafa ma onékun maen tivesara iyan mifo fúká intin ma ínaimpáké orun avían manten orera uvintin maen kama vukhafa vái vanten mino. Inká taréa ída ákona vákan ban mifo ínaimpáké ma evaránen orun avían mantarantin maen kákan ákona vái vanten mino. 44 Betí ankan mai yan bukhafa vái saréa van mifo fúkaré intin ma ínaimpáké orun avían mantaren maen Kantá Aunan mano ma aunan amin nain bukhafa vái vanten mino. Mai fara vara seyo, ma varará ma ainen purin bukhafa ano ma vainíen inarurá deren mai ma Kantá Aunan mano aunan amin nain bukhafa vái van mino.
45 Máan tukhan Tiyarafenui vompon dóki ano máa sikhen mino. “Esé araíintá Adamu ne ma siyain banta ano aun mantaren mino.” Esé 2:7
Mantein mifo ínaimpá ma Adamun an dakhein banta Yisas Karaisi ma erein manon ayun para van oriyan ban Aunan amin bantaíen mino. 46 Barará bukhafa naren erivin maen ínaimpái Kantá Aunan mano ma aunan amin bukhafa eren mino. 47 Esé ma erin banta Adamu maen bara ráke kayó pákaren uvantáin mi ínaimpá ma erin banta Yisas Karaisi mai inarufákéi erikhen mino. 48 Minó barará nanin banta ano Adamun an den barará bukhafa vái van mifo inaru vukhafa ma vará tifanuna ano mai Yisas Karaisin au vukhafa an mi yanten mino. 49 Adamu ma ma varará banta vain an mi yakhé tiferuna maná damusí ma intí maé inaru fáke vanta Yisas Karaisin an dá tifanté uno.
50 Mumunan tiyofi sifá tiváeyan noe, séi máan mi siyá uno. Dan bukhafa vá nare vá ano ída kanaíen Tiyarafenui yafisin aúpin orinten mino. Ma ma setinti ainen pútain bukhafa ano ída kanaíen ayáká para oriyan banten mino.
51 *Mat 24:31; 1Te 4:15-17Máan tukhen mifo inikhesirá taréa Tiyarafenui aúpá baya ma setí ankampin afoká ukhein tiaméku vá ineno. Ída minó ano fura sé puró tifanté umpo maman ena vukhafaíi ó tifanté uno. 52 Tipá kípan ufen ma asinti mai ma auu makhí diyaona an den mi mai avúavá afoká inten mino. Mai fara vara seyo, ufen ma asintin mai ma mumunan uven púká in nain kéká ano auyen bukhafa vái orun mantanten mino. Inká mai ma ída fúká ótifanuna nanin banta ano maman auyení é ída furin para oriyá bá tifanté uno. 53 *2Ko 5:4Mai fara vara seyo, ma varará ma ainen puren púta iyain bukhafa ano maman inaru rákena ída ma furin para van oriyan ban bukhafaisá ino.
54 Mai ma ma varará ainen puren púta iyain bukhafa ma maman ída ainen pútain inaru vukhafaí urantin maen mai ma Tiyarafenui vompon dóki ano sikhá ein mi mo kanaí inten mino. Mai máan mi sikhan mino.
“Aunan mano furin inka aruan kípen mino. Ais 25:8
55 Purin noe, intesí eni ákona van nafino.
Purin noe, inté ureyá tirinte fono.” Ose 13:14
56 *Rom 7:13Mai fara vara seyo, ume anon aruan puriyákan inká ume ano man baya finten ákona variyan mino. 57 Máan tiyan mifo Tiyarafenu ano ma setisi Bafan Yisas Karaisin pinté uaren tiyaí ma furin má ume vá ma esantakhé tiferuna vará béin moékantá aví daní iyá tusu siantano.
58 Máan tukhein nan mi séi ma moéké tinunu iyaruna mumunan tiyofi sifá tiváeyan noe, Tiyarafenui yorantá mantaan ákona uveya vá moékan dorarí ono. Mai fara vara seyo, siretí ankan ma Bafani yorarí iyaona mai ída fa savifá o afeyorantéi afová ukha rono.