PITA MA KAN DÁDASÍEN UVANTEIN BOMPON MINO
(2 Pita)
Pita Ma Kan Dádasíen Bompon Uvanteí Pákenai Afova Vaya Ino
Ma vompon ma uvantein banta ino.
Baya varen orin banta Pita ino.
Uvarein orana ino.
Pitan aruan purin ádesí iyákan AD sikisti-faipi (65) fin nafi áa sikisti-sikisi (66) fin nafin uvanten mino.
Ma vompon ma uvantein baru ino.
Romú barurá ino.
Ma vompon ma uvaman amikhein kéká ino.
Mai ma esé uvantein bompompin ma sikhein barafin ma vain monó namun kayofin mino.
Nái ana vará ma vompon uvanten nafino.
Kampun doran banta kayo ano ma nóken Yisasin nan ída Tiyarafenu Anin báken inká ída ovaránen erinten ne ma siyain nan mi vanasi ano yafíben bano van áká ukhen mino.
1
Pita Ma Amusin Baya Sein Mino
1 Téi Saimon Pita ma Yisas Karaisini aposerí ukhé beni ída miyan ban dorarí iyaruna vanta anon ma vompon uvaré uno.
Yisas Karaisi ma setisi Tiyarafenu vá Tiyain Banta vá báken ma setin maman Tiyarafenu avorá puntákein nanin bantaí urá bátiféku ma setin má manaíe funtákein mumunan iyaona kéká baonafái ma vompon uvamádékun oren mino.
2 Yisas Karaisi ma setisi Bafan má Tiyarafenu vá bain ma afová ono van esin maen mai Tiyarafenu ano vá bei sarisari vá ará kusin má pókesá tiretin avu uantano.
Tiyarafenui Afova Vayafin Ma Kákaní In Baya Ino
3 Yisasin ma oné afová é tifékun maen beni moékakhein ákona ano mai ma funtákein avúaváká ma vano van iyá tiferuna yanasinta siminten mino. Bei khakhan má kama avúavá bá barano van mi setin tarakhen mino. 4 Bei kákan bí bá kama ukhein avúavá bá pinté uaren móeken ma kama ukhein avúavasí usintano van mi setin iyátintan baren mino. Mai ma namu avúavasí in tinunu ano ma setin eúkuádá bá tiferuna finte me ampiren beni kama avúava sinta variyan ben an dakhen bano van mi iyátintáken mino.
5 Máan tukhanti mai ma iyáantan bain danasinta ma varano vará ayampaí ureya vá tiretíi avúavápin maman kaono. Máan ma esin mi siretíi mumunampin kama avúavá asotú uanten inká kama avúavápin Tiyarafenu van ma anunu in afova asotú uantanten mino. 6 *Kar 5:22-23Inká mai afovafin e aurá ma kamaen dafisin avuává asotú uanten maen umampin ma mantaan ákona in avúavápó aurá ma yafisimpin asotú uantanten mino. Inká umampin ma mantaan ákona uven ma Tiyarafenui avúavá ánain bákurin má asotú uantanten mino. 7 Inká Tiyarafenui avúavá ánain ma vákurimpin afá aváen nan ma anunu in avúavá asotú uanten maen inká afá aváe ma anunuimpin minó nanin banta van ma anunu in avúavá bá asotú uantanten mino. 8 Mai avúava sinta ma moéke varesin maen mai anon tetisi Bafan Yisas Karaisin ma afová inonafin moéken aran iranten mino. 9 Máan tinten mifo mai avúavá ma ída afova variyain kékái auu yufúkein an dakhan ída kamaen oniyan mino. Ume avúavá pinte ma Tiyarafenu ano yo sesé uren avíkein mai me áunten mino.
10 Máan tukhein nará mumunan tiyofi sifá tiváeyan noe, siretí ankan ákona e yoresin ná tiretin nan pura sen Tiyarafenu ano ma araren bei naí ukhein kékápin ban mino sen ná afová ino. Mai fara vara seyo máan ma inteya ída kanaíeya erave ankamin nono. 11 Máan ma esin mi Tiyarafenu ano setin Tiyain Bafan Yisas Karaisini fara van oriyan ban dafisin barufin ma orin ona yiantanten mino.
Monó Dóki Finte Vaya Ma Avovéen Inin Baya Ino
12 Tiretí ankan pefái fura sikhein avúavá afová ureya mantaan ákona ukhe ompo me áuninona van pasé para e siamé oriyá bano van mi inikhé uno. 13 Téi ma ída furin ma ma vukhafa vá para vanté maé mai vaya kayo fara siretin e siamé oriyá bano van mi inikhé uno. 14 *Yon 21:18-19; 2Ko 5:1Máan tiyá umpo setisi Bafan Yisas Karaisi ano séi ma ma varará banuna yamú inka aní íká afová ukheruna ída ayáká bákéi furonté uno. 15 Máan tukhein nan mi séi ákona yorarí ékuya mai yanasinta afová ukhare ínaimpáké ma fúbéku mae mai yanasinta van para ineine eya oriya vano van muno.
16 *Mat 17:1-5Mai fara vara seyo, setisi Bafan Yisas Karaisini ákona vá beni ovaránen erí pákena vaya kayo ma siyaruna mai ída vantai inintá tiyá umpo seti suu fóké ma fura sé beni ákona onteruna van mi siyá tiféuno. 17 *Mat 17:5; Mak 9:7; Ruk 9:35Para vara seyo seti Sifóe Tiyarafenu ano ma inaru fáké ákona oovaraádan eriyan maen máa sikharen, “Ma sen sanin téi moeké tinunu ukheruna iyampon mi vakái, véin nan moeké timusin uantiyá uno.” Máa ma sein manon moékan ákona ma vain Tiyarafenun pinte kákan bí bá kakhan ákona vá baren mino. 18 Kantasí ukhein anu yontá ma véin má un bákéi setiyantá mai vaya inékun inaru fáké oovaraádan eren mino.
19 Mai van mi sakhanampa vanta kékái vaya kayo ano sian amá ukhái afová ukhé tifé umpo vetí ankan ma uvamádan bain baya kayo vasá avové ureya ineno. Mai fara vara seyo, vetíi vaya ano yunteimpin ma kakhaan teiníi iyantiya oriya varé esin mi ínaimpáké ma Yisas Karaisi afoká inain damú beni moékan kakhan manon aúpin kakhaan tanten mino. 20 Ma furan tiyá umpo sakhanampa vanta kayo ano sakhanampa vayaí ono vara vetíi inin pinté Tiyarafenui vompon dókifin o véden tiádan ban naino. Ída ino. 21 *2Ti 3:16; 1Pi 1:11-12Mai fara vara seyo, Kantá Aunan manon ákona amiyákan Tiyarafenu ano vetin pinté uaren baya sikhen mino.