PORI MA KARESIÁ NANIN BANTA UVAMAN AMEIN BOMPON MINO
(Karesia)
Karesia Vompon Ma Uvanteí Pákenai Afova Vaya Ino
Ma vompon ma uvantein banta ino.
Baya varen orin banta Pori ano ma ma vompon uvantein nan kan ineinen iyan mino.
(1) Karesiá barafin ma Pisidiá distrikifin ma sautí bain baru kayo Antiokí bá Aikoniamí bá Ristará bá inká Debé bápin ma esé araíen monó dorarí uren ma avían mantakhá eimpin minon ten iniyan maen inká
(2) Karesiá barafin ma notí bain baru kayofin ma kan dádasí en monó dorarí ukhá ein ne sen iniyan mino. Taréa ma Teki e siyain barafin mi Karesiá bara varen mino.
Uvarein orana ino.
(1) Karesiá barafin ma sautí bain kéká ma uvaman amikhanten maen mai AD foti-eiti (48) fin nafi áa foti-naini (49) fin nafin uvanten mino. Mai maen kanisori kayo ano ída Yerusaremí átaru ukhan mino.
(2) Inká Karesiá barafin ma notí bain kéká ma uvaman amikhanten maen mai AD fifti-siksi (56) fin nafi áa fifti-seveni (57) fin nafin uvanten mino. Mai maen Romú nanin banta ída vompon uvaman amikhen mino.
Ma vompon ma uvantein baru ino.
Kanisori átarufá Yerusaremí oriyáken nafi áa Masedonia safi áa Koriní barurá ma kanú manaú dádasí en ma monó doraríen noren ma e váken nafin ten iniyan mino.
Ma vompon ma uvaman amikhein kéká ino.
Pori ma Karesiá barafin esé araíen monó dorarí iyákan ma mumunan ukhá ein kékápin nafi áa kan dádasí ma en monó dorarí íkan ma mumunan ein kékápin nafi non ten iniyan mino.
Nái ana vará ma vompon uvanten nafino.
Monó nanin banta ma Pori afova amiyan ma Yisas Karaisintá ma mumunan esin maen mai avúavá anon auu ída manten ne sinten mino ma sikhá ein me ampiren man baya ánain bákuriyaimpin mino. Kampun banta kayo ano kampun afova amiren enará ukhein bayafó banasi aviren tavi aasá oriyan mifo Pori ano vei vaya varen orin doran nan pura sen ákona vain doran ne sen maman amá ukhen mino. Karesiá nanin banta ano ma Yutan kékái avúavá ánain ma yakha fono van ma auu khavin daná ma maman kainten maen mai vetimpin manan minó afova van mino. Mai man bayai karavusii sá inten nafi áa Yisasin pinté uaren ná auu ivan kékasí inten nafi mai vetíi anunu ino. Máan tukhen mifo mai ma monó nanin bantaí ukhen ma amusin dosiyá ein mai ída vetíi anunu ánain bákurinten mifo Tiyarafenun anunu ánain dakhafen ena nanin bantai yoraríen ná aya ino.
1
Porini Amusin Baya Ino
1 Téi vaya ma varen orin banta Pori uno. Baya ma varen orin dorarí ino van ma vara ráke vanta kayo ano fi áa mana vanta ano fi ída séin aní uren ákona simikhen mifo Yisas Karaisin má inká bein ma furin pintena avían mantakhein Afóe Tiyarafenu vá anon mai ákona simikhen mino.
2 Minó mumunan ayofi afá aváeyan manon ten má manafiní uven mi ma vompon uvaman Karesiá ma vain monó kayofin ma vaona nanin bantan amen mino.
3 Tifóe Tiyarafenu vá Bafan Yisas Karaisini sarisari vá ará kusin má ano vá tiretin má bano. 4 *Kar 2:20Yisas Karaisi anon teti Sifóe Tiyarafenui anunu ánain dakhafen mi saréa ma vain namu avúavá pintena setin tiya ono van e fúkaren mino. 5 Máan tukhein nará Tiyarafenu avisá ena ena yaní ó tifano. Pura ino.
Kama Vaya Mana Anan Ban Mino
6 Yisas Karaisini yoran táké uaren ma Tiyarafenu ano siretin kamaen tarisari uren arákaya ma veni vanasií ukharé eona kéká ano ma aine véin me oyan amire ma enará ukhein monó baya ánain ma yakhafiya ona van mi séi sinúdiyá uno. 7 *Apo 15:1, 24Ída ena kama vaya van mifo manáa kéká anon tiretin maman kufa uádaren mi Yisas Karaisini kama vayan do vaéádiyan mino.
8 *1Ko 16:22Máan tiyan mifo fefá ma siamékuya inikhá inona kama vaya vá ma ída manaí ukhan nain monó baya ma setí ankan pinte safu áa inaru fáke enisori ano fi ma me siamin nain mano vá ira khiyan ma uman baren berai siyan purin barufin ná típá o afeyorano. 9 Tetí ankan pefái siamikharéi saréa evaráné ákona iyá uno. Pefá ma inire afová ukhá inona monó baya vá ma ída manaí ukhan nain baya ma me siamin nain banta ano vá ira khiyan uman baren ma verai siyan purin barufin ná típá o afeyorano.
10 *1Te 2:4Banasi amusin uantano vara ma vaya siya raumpo Tiyarafenun mi amusin uantiyá uno. Banasi amusin uantano van ma iyanté maé mai séi ída Yisas Karaisini yoran banta uno.
Yisas Karaisin Pinté Erikhein Bayan Pori Siyan Mino
11 *Mat 16:17Mumunan tiyofi sifá tiváeyan noe, afovasá ono. Mai ma aya uren ma evaránen aviran baya ma siretin tiamikheruna mai ída mana vanta finté erikhen mino. 12 Mai vaya ída mana vanta finte varékun inká mana vanta ano ída afova simen ukhen mifo Yisas Karaisi anon aú páke vaya simikhen mino.
13 *Apo 8:3Pefá ma Yutan kayoi avúavá ánain ma ákonaé dakhafiyáké maé Tiyarafenui vanasi vá monó bá namuroí uré minó aruan kípano van iyákuya afová ukhare ono. 14 *Apo 22:3Téi Yutan kayoi avúavá ánain ákonaé dakhafiyá paséi sinafu siráoni avúavá ánain ma yakhafimpin te sivun kéká esantakharé uno.
15 *Ais 49:1; Kar 2:7Máan tukhé umpo sinóen amúpim ma vákun mi mai ma Tiyarafenu ano ma aní ein damúi vei sarisarifó téin tararen aní urá baréi e vantaí é uno. 16 Bantaí uvékun ena anan nanin bantafin be Anini kama vaya siamino van béin ten aníen mino. Aní ma urá maé mai vayai ana sisimino van ída manáa kayorá mo inaé uno. 17 Inká téi ída vákun ma vaya varen orin bantaí ukharé ein banta kayo onano siré ída ainé Yerusaremí ódé umpo Arebiá barafái o varé maé mai ráké evaráné Damaskasí oré uno.
18 *Apo 9:26-27O vákun kanú manaú orana orivíká Pitan onano van Yerusaremí ódé ben má un bákun fiftini (15) yamú oren mino. 19 Yerusaremí ma o váké maé baya ma varen orin banta kéká pintena ída mana oné umpo Bafan afá Yemisin manan oné uno. 20 Máan tukheruna van mi saréa ma uvaman amiyaruna vaya mai Tiyarafenu avorá ída kampun tiyá uno. 21 *Apo 9:30Máan turé mai oyampáké Siriá bá Sirisiá barafá bá oré uno. 22 Oré umpo Yisasini vanasi ma Yudiá barafin ma vain kayo ano ída sen toman afová ukharen mino. 23 Máan tukharen mifo vanasi ano ma máa siyain baya anan inikharen mino. “Mai ma setin tiriyáken ma inká tetí ma mumunan iyaruna yaná ma máden namu ono van iyaré ein banta ano saréa mairá mumunan iyáken mai ma fefá namu ono van iyaré ein mumunan nan mi sian banasi amiyan mino” sin baya ma iniren maen 24 mai van Tiyarafenu aví daní iyan mino.