16
Yisasi Ma Evaránen E Mantein Baya Ino
(Matiu 28:1-10; Ruku 24:1-12; Yoni 20:1-10)
Sabati yamú kípavíkan Makdaráke Maria má Yemisin anóe Maria má Saromin má kama aunka iyain uveri kayo vetí ankan Yisasin aufá mo féantano van miyaníen mino. Esé araí in damú pe ákura suron asaréa áau e unin betí ankan masíká oren mino. Oriyáken betiyan ten orera emí, “Iye anó masí oyi rákena onámaná do setin eka sintanten nafino.”
Máa siren onákan mai onámaná ída masí oyirá baren mino. Mai kákan onámaná ifo mana vanta ano fefá do avékakharen mino. Mai masí aimpin betí ankan ódiven onákan mana fumara ano ayan kurompáayá efanten au anamunuren kumantaré íkan betí ankan ódaren akhokho van en mino.
Akhokho van íkan béi vetí ankan tiamemí, “Tiretí ankan ída vá akhokho van ono. Nasaretíke Yisasin onano van ere ompo véin ma yaa unkamádantá ma antópó arukhá ein mai inka véi fe e mantakhen mifo onano véin ma kain báeimpin ída van mino. * Mat 26:32; Mak 14:28Tiretí ankan ore vá beni eyo iyampon kayo vá Pita má mo siameno, ‘Béi ma fefá tiretin tiamikhá einíen tiretin an uanten Karirifá orikhen mifo mai fákena vá tiretí ankan béin o onano.’ ”
Máa síkan mai nanin kayo masí ain pinté e khuven eravuaren anú duman duman en karan oriyáken péden ída mana vanta vá baya sen mino.* Pefa esé Makini vompompin ves 9-20 ída varéin ínaimpáke ena vanta ano mai vaya (ves 9-20) uvaman asotú en mino.
Yisasi Ma Mákdaráke Nanin Marian Avorá Dákó Ein Baya Ino
(Matiu 28:9-10; Yoni 20:11-18)
Esé araí in damú pe ákura suron Yisasi e mantáaren Makdaráke Marian avorá naren o afoká en mino. Yisasi mai nanin au fintena yan manápá ifo afápá kan un kádan namu aunan kayo yo siantein mino. 10 Maria orein minó Yisasi má ma nóein banta kayo mo siamemí. Mai minó banta kayo ano ará umandan ifí diyan baren mino. 11 Baré íkan Maria vetí ankan tiamemí, “Yisasi ída furin para vá téi oné uno.” Síkan betí ankan mai vaya iniren ída mumunan en mino.
Eyo Iyampon Kan Mano Ma Yisasin Ayana Fáke Onein Baya Ino
(Ruku 24:13-35)
12 Ínaimpáké bei eyo iyampon kanan mano mana aayana oriyaréin Yisasi enará uven békanan baintá o afoká en mino. 13 O afoká íkan ódaren békanan manáa eyo iyampon kayo mo siamíkan betí ankan ída vékanani vaya vá mumunan en mino.
Yisasi Ma Vei Eyo Iyampon Kayo Avorá Ma Afoká Ein Baya Ino
(Matiu 28:16-20; Ruku 24:36‑49; Yoni 20:19-23)
14  * 1Ko 15:5Ínaimpáké tiyan míkan mifo sirantan mana orun kádan (11) eyo iyampon máa ano kumanten duna niyaréin Yisasi vetí ankan baintá afoká uven betí ankampin mamumunan ída vákan ma véi ma e mantein ma onein nanin banta ano ma siamin ma vetí ankan ará uman daren ída mumunan iyain nan béi vetin asen mino.
15  * Apo 1:8Máa siren béi vetí ankan tiamemí, “Tiretí ankan ore vá barará minó akhempasá kama vaya mo vanasi siameno. 16  * Apo 2:38Banta ano ma mumunan uven ma non baran nain mai Tiyarafenu ano evaránen avirantin ben ninaí inten mino. Máan tinten mifo vanta ano ma ída mumunan inain mai ano kópin afeyoranten mino. 17  * Apo 2:4; 8:7Tiyarafenu ano mumunan ma inain banta kayo ayantá máan avúavá daná afoká inten mino. Téin tivíká betí ankan namu aunan do siantiyáken auyen baya sinten mino. 18  * Ruk 10:19; Apo 28:3-6Betí ankan ayampó osafáe fákarantin ída untaranten mino. Betí ankan beyantá uvá naren ída furinten mino. Betí ankan banta aurá ma ayan kaintin mai aí bantan ano e asefa inten mino.”
Yisasi Má Inarufá Ódein Baya Ino
(Ruku 24:50-53; Aposeri 1:9-11)
19  * Apo 1:9-11; 2:33-34Bafan Yisasi ano vetí ankan baya siamirákan Tiyarafenu ano aviran inarufá óden Tiyarafenui ayan kurompá un kumanten mino. 20  * Apo 14:3; Ibu 2:3-4Minó eyo iyampon kayo ano minó akhempá oreraen beni kama vaya mo siamen mino. Bafan mano vetí ankan má manafin doriyáken betíi vayafin ákona amíkan manáa avúavasí ma íkan mai afoká iyaren mino.

*16:7: Mat 26:32; Mak 14:28

*16:8: Pefa esé Makini vompompin ves 9-20 ída varéin ínaimpáke ena vanta ano mai vaya (ves 9-20) uvaman asotú en mino.

*16:14: 1Ko 15:5

*16:15: Apo 1:8

*16:16: Apo 2:38

*16:17: Apo 2:4; 8:7

*16:18: Ruk 10:19; Apo 28:3-6

*16:19: Apo 1:9-11; 2:33-34

*16:20: Apo 14:3; Ibu 2:3-4