PORI MA FIRIMONIN UVAMAN AMEIN BOMPON MINO
(Firimoni)
Firimoni Vompon Ma Uvanteí Pákenai Afova Vaya Ino
Ma vompon ma uvantein banta ino.
Baya varen orin banta Pori ino.
Uvarein orana ino.
AD sikisti-tu (62) fin mi uvanten mino. Korosíke vompon má Efesasíke vompon má ma Tikikasi varen orein pimpá ino.
Ma vompon ma uvantein baru ino.
Romú ma karavusií ukhen maen karavusi namumpin mi uvanten mino.
Ma vompon ma uvaman amikhein banta ino.
Korosí baru ráke vanta Firimonin mino.
Nái ana vará ma vompon uvanten nafino.
Firimonin ina urantin miyan ída van doran banta Onesimasi ma Karaisimpin mumunan afá aváení ukheini ume ampiantano van mino. Ma vompon mano ume ampiantan má avábá in mái sian amá ukhen mino.
1
Pori Ma Amusin Baya Ino
1 Téi Pori ano ma Yisas Karaisini Kama Vaya ma siamiyarunarái karavusifin báké erasan tifá Timotin mái ma vompon uvaman éi Firimoni ma verasanti mana yoran banta van ná ma moéké tinunu iyarunan amé uno.
2 *Kor 4:17; 2Ti 2:3Inká tetin tiyofin Afian má tetisi mana yoran banta Akipusin má inká mumunan nanin banta ano ma en amápin átaru uven monó tiyain kayo vái ma vompon uvaman amé uno.
3 Teti Sifóe Tiyarafenu vá Yisas Karaisin má ano vá tiretin tarisari uren ná ará kusin amino.
Pori Ma Tiyarafenun Tusu Sianten Amúkein Baya Ino
4 Téi ma éin nan timúkuantiyá maé Tiyarafenun ena ena susu siantiyá uno. 5 Mai fara vara seyo, ena kéká ano éi ma Yisas Karaisintá mumunan iyáke ma mumunan nanin banta van anunu ure ma aya iyaona van tisimí iniré uno. 6 Éi ma mumunan iyaonaíen ma mumunan iyain kéká bá ma monó tesin maen mai ma monó tin avúavápin ma éi ákona iyaonaíen mai kayo ano ákona iyantiyan mai ma Tiyarafenu ano ma kama yanasinta setin timiyain afová inono. Mai avúavá áesin afóka intin ná Karaisi kákan bí barano van mi ákonaé timúkuantiyá uno. 7 *2Ko 7:4Éi ma mumunan nanin banta anunu iyaona anon téin kákan timusin má tirá ákona usintan má timiyan mino. Mai fara vara seyo, éi sen tifá anon mumunan kékái ará kusiantiya nái ma vaya siyá uno.
Pori Ma Onesimasi Ano Aya Ino Van Ina Ein Baya Ino
8 Mai van mi Karaisin avíká kasaé éin duvun ékuya kama avúavasí inon naren mifo 9 se nan ma anunu iyaona van mi fara inaúan iniyá uno. Anon banta Pori ma Yisas Karaisini yorantá karavusifin bain mano ma inauádein bompon ná barano.
10 *1Ko 4:15; Kor 4:9Ma karavusi namumpin ma séi monó tiyákun ma Onesimasi ará baeren mumunan bantaí ein manon ten tanin uró an dakhái ei kama avúavá béin aní esin onano van mi séi inaé uno. 11 Pefá Onesimasi*Kiriki vaya finté ma Onesimasin ne ma siyain mai Kamaen Ayain Banta e sikhen mino. ano ída kamaen ayainton karan orikharen mifo saréa erasan kama uron mi en tiya inten mino.
12 Te súkákéi véin nan tinunu iyákéi e vaonafá evaráné tiantékun oriyan mino. 13 Banasi ma Kama Vaya siamiyarunará ma karavusií ukherunafin béin ayópá ékun eni varu varen téin tiya ino van inikharé uno. 14 Inikhé umpo éi ma eyo sesirá béin ayópá ono van mi iyá uno. Ída éin duvun onté umpo ei anunurá tiya ono van mi inikhé uno. 15 Éin má típá bano van mi sanáa afará éin me ampiren karan orikharen mifo mai van iniya vá evaráne avirano van mi inikhé uno. 16 *1Ti 6:2Béi ída miyan baran doran banta ana vanten mifo séin tiran nakhein tifá tiváeníi ukhen mino. Máan tukhein nan mi eni miyan ída van doran bantaíen maen inká eni mumunan afá aváení en intéíi véin nan moéke anunu inono sé inikhé uno.
17 Éi ma sen nan téi má mana yorarí iyain banta ino ma se ininte vá mai séi ma orékuya ma sivábá inona máan uron ná eya véin avábá ure vá amusin uantano. 18 Inká éin uman amen ná en nina yaná umoyan baren ná ukharé inten nafi mai yanasinta anona evaráné amenté uno. 19 Téi Pori anon te siyampóké ma vompon uvaré uno. Mai ma véi mantáin nain danasinta séi anon anona evaráné amenté umpo éin ma ayaékuya Yisas Karaisintá ma mumunan ukheona yina maen éimpin para van mifo mai van ída inantenté uno.
20 Tifa soe, erasan Yisas Karaisin ninan bá umpo Bafan avíkasá téi ma inaerunaí esin ná tirá kusi sintano. 21 Téi ma ma vompon uvádé inaeruna fákena éi moéke kama avúava suron mi varan nono sé iniyá uno.
22 *Fir 1:25; 2:24Téi ma iniyaruna mai Tiyarafenu ano siretí ankani amúkin eyo sintí maé tiretin má evaráné o vanté umpo mana karafaran ná ten tina funtáádano.
Pori Ma Kípan Amusin Baya Sein Mino
23 *Kor 1:7Yisas Karaisini yorantá ma sen má karavusií ukhein banta Epafrasi anon ma vompompin éin amusin baya amen mino. 24 *Kor 4:10-14Ten má ma mana yorarí iyain banta kéká mai Maki má Aristarkusi má Demasi má Ruku má ano yeren amusin baya amen mino.
25 Bafan Yisas Karaisini sarisari ano vá eni aunampin ná bano.