1 David nii jakatnuji tsawan jegamtai pujusa, uchijin Salomógkan akateak: 2 “Wi jakatnujuk tsawantak jegagtine. Nuadui ¡amek mijamtsuk wajiu wajasta! 3 Nuniakum Tuke Pujuu Apajuí amina ememattaigmea nunú chichagtamak, wi wakegamua duke umikta tujabiuwa nunú imatiksamek ashí umikta. Tuja Moisés chicham umiktinun agajua dushakam ashí umikta. Nunú betek umiakum ame takamugminig ashí pegkeg atatme. Tuja tuwi wekaetatme nuniakmeshkam ashí pegkegnum wekaetatme. 4 Nuigtushkam Tuke Pujuu mina anagtak: ‘Uchijum aidau pujutji pegkeg asag chichaman betek dita anentaijai, wakanijai mina umigtuinakuig, amina uchijum wegantu aidaunmayan tuke Israel aents aidau apuji ematnaitjai’, tujutiuwa nuna dutiksag umikti.

5 “Tuja Joab Seruiá uchiji takamsauwa nunú kajimatkipa. Niig jimag suntaja apuji Abner, Ner aajakua nuna uchijin, nuigtu Jétera uchijin Amasánashkam mauwai. Nunak maaniachbau aig, yaunchuk dita magkagtuawajua duwi iikmajai tusa wainak chicham atsamunmak mauwai. Dutikak mina utugchatan itagtuauwai. Nuadui ame duka nii takamsamujinish wajuk titatme nunú dutikattame. 6 Nuadui shiig anentaimsam dutikata. Tujash agkan pujus jakati tusamek idaisaipa.

7 “Untsu Barzilai galaadnumiaya nuna uchiji aina duka wait anenjam ame ekemsa yutaigmin ekentsam ayujatin ata, wagki wi amina yatsum Absalón aintakui tupikaki wekagai, dita kuitamjuku ainawai.

8 “Tuja aneaku ata, anui Benjamín wegantu Simí, yaakat Bahurimnumia puja nunú wi Mahanaim wegai shiig pegkegchaun chichagtukabi. Tujutiuwaitak Mahanaim pujaun waketai, mina igkunkatatus namak Jordán tajutuawabi. Nunikmatai dekas wi umiktinjun chichagkun: Maashtatjame tusan Tuke Pujuu daajin tiabiajai. 9 Tujash amek duka tsagkujaipa. Amek yachaitme, iman asam ame diista itugkattame. ¡Tujash waitus jakati tita!” tiuwai.

10 David jakamtai niina apachji aidau ukumasbaunum Jerusalén ukusajui. 11 Davitak Israel aents aidaun apuji wajasag cuarenta mijan inamjauwai. Yaakat Hebrógnum inamjauwai siete mijan, untsu Jerusalén inamjauwai treinta y tres mijan. 12 Salomón niina apaji David jakamtai, nii apu wajas shiig agkan pujus inamjauwai.