8
Yujág juuka
chagkinum aimkamu
chagkinum aimkamu
1 Makichik chagkinum yujág tsamaku juuka aimkam pujaun Tuke Pujuu iwaintugkabi. 2 Nuna iwaintujuk chichagtak:
“¿Jusha wajimpaya?” tujutmayi.
Tujutkui wi ayaakun:
“Yujag juuka chagkinnum aimkamu pujawai”, tibaijai.
Tusa tai, Tuke Pujuu chichagtak:
“Israel aents aidau suwimak jukitnujig yujág tsamaka uminas aama numamtuk tsawantak ashí jegae. Nuadui makichkiakesh tsagkujashtatjai. 3 Nunú tsawantin kuashat aents jinaamtai, apu pujusa inamtaijinig shiig aneasa kantabauk atsutnai, ayatak wake besemag atinai. Nunú aents jinau aidaun iyashinak takamtak yajuakag utsagkagtinai”, nunak Tuke Pujuu dekas uminkatnun tawai.
Israel aents aidaun pegkegchauji diigsa suwimak susatnuk tsawantak uminui
4 Juju nugkanmaya aents ujudauch aidaun kasajak waitkau aidautijum shiig antuktajum; 5 atum chichaakjum: “¿Trigo wamak sujukchamnush, wagka nantu yama takamunum jiistamtaya dusha tsawantash wamak nagkaematsua? Trigo sujaku kijinji imanchau aig, tsanumja kasamku kuashat kuichik jukichminush ¿wagka tsawan ayamtaish wamak nagkaematsua?” wajagme. 6 ¡Imatu asajum, trigok saepejai sujumain dekapeagme! Nunin asajum ujudauch aidauk inaku waitkatai ati tusajum kuichik piipich juwakjum sujuktag tajume, tuja nuigtush makichik sandaliayai yapajiatag tajume. 7 Nuadui Tuke Pujuu, Israel aents aidaun Apajuíji chichaak: “Atum dutikajum nunak makichkish kajimatkishtinaitjai”, tawai.
8 Imatika waitkajum duwi nugka senchi uugtinai,
imaniak namak Nilo dujajak ikaman utuja ataktu kuyua,
ataktu utug kuyua wajama imanittawai.
Imanitai aents aidauk ishamainak buutiagtinai.
9 “Nunú tsawantinig etsag etsanjashtinai,
tuja etsa tutupit wajas etsantu eketiatak kajinak suwe wajastinai,
nunitai ashí nugkanmak suwe wajastinai.
10 Atum jiistamkujum shiig aneenujum nunú
idaikujum, aents jinamunum wake besemag
batsamsajum ayatak buut batsamtatjume,
nuniakjum jáanch jakamunum nugkutai
nugkugjum yujastatjume.
Nuniakjum pinui awamagjum,
makichik aents uchiji makichkiuch ajamu jajukam
wake besemag dakapeak kajeka buutama imanittagme.
11 Yapajut tepeatin tsawan jegattawai,
tujash duka pag atsutaigkish yumi atsutaigkish nunikchattawai;
duka mina chichameg antuktasa yapajamujai betek wakegamu atinai.
Nunak Tuke Pujuu dekas uminkatnun tawai.
12 Tuke Pujuu chichamen antuktajai tusa
ashí yantamnum nayantsa amain yujatnai,
tujash imaaninakush mina chichamjun etsejuidaunak antukchagtinai.
13 Nunú tsawantinig,
nuwa muntsugtauch shigmauch aidaush,
tuja uchi datsa wajiu aidaushkam
pimpikiag weetuk wampainag iyainiagtinai.
14 Tuja nuigtushkam samarianmayan, Dagnumian,
bershebanmayan wainka apajuímtai aidaun emematiaju aidauk,
tuke jainak wampainag iyainiagtinai.
Nunú wainka apajuímtai aidaun jutsukaita
dekas Apajuík tusag, ame tuke umigtai atin ata tusag
tinu aidauk nantakchatnun tuke jak wampainag
iyainiagtinai”, tawai Apajuí, tiuwai Amós.