32
1 “¡Nayaimpih, nugkah, wi chichaktatag
nunú shiig antuktajum!
2 Wi jintinkagtamua duka yumijai betek yutugtatui,
Mina chichamjuk yumi sajatama nujai betek atatui.
Yumi ujumak yutug chijichin uchupiama
nujai betek atatui.
Yumi senchi yutak dupan uchupiama nujai betekai.
3 Tuke Pujuu daaji pachisan nigka pegkejai,
múuntai tusan etsegkatjai.
¡Atumshakam, iina Apajuíjiya duka
dekas múuntai titajum!
4 Niyai iina kuitamjamnuk.
Nii takamujiya duka betek uminnai.
Niig Apajuí dekaskenum chichauwai.
Niig pegkegchaunak takachui.
¡Niig pegkegmai,
tuja nuigtush waitjuchui!
5 “Israel aents aidauwah,
atumek pegkegchau ainagme.
Pegkegchau takakjum Apajuí ikajin ainagme.
Nunin asajum Apajuí uchijig amaitsugme.
6 Tuke Pujuu atumin kuitamjama duwika ¿aan iikuajum?
Atumek yachachu,
anentainkachu ainagme.
¿Apajuíchukai atumi apa
najapauwa nunú?
¡Apajuíyai amina najapa uyujtamak
senchimtijamauwa duka!
7 Ataktu awagkijum anentaimsatajum,
nuniakjum adeagtajum
yaunchuk aajakua nunú.
Tuja atumi apaji aidau, tikich múun aidaujai
yaunchkesh pujutash wajuku ayi tusajum iniastajum.
8 Apajuí aents aidaunak akanag
maki makichik chichamtin,
nugkentin emak batsasui;
tujash atum Israel aents aidautigminak Apajuí
makichik nugkanmak ijupag kuitamjamui.
9 Apajuík Jacopa uchiji wegantunmaya aidautin
etegtamjauwai niinu agtinun.
10 “Nuadui, uwejush nugka buku, yumi atsau,
dase umputainum
batsatjin, nii kuitamjamak jintinjamauwai.
Dutijamak makichik aents niina jiin shiig kuitamama imatikas kuitamjamkauwai.
11 Apajuík ukukui niina
nanapen uchijin dukuka
kuitamama numamtuk iinak kuitamjamnai.
Apajuík, ukukui niina uchijin kuitamak
niina nanapen pataja juwama numamtuk
kuitamjamak ishamainnumian uwemtijamjauwai.
12 “Tuke Pujuuwa nunuwai
iina uyuntamsauwa duka, tikichik atsawai.
¡Tikich wainka apajuímtai
aina duka makichkish yaimpakchauwai!
13 Apajuí depetmitkagmak
jujamki nugka pegkeg ajak shiig tsapau,
nain aidaun sujamsaje.
Nuwiya dapa yumiji buchignum ayaun
amasaje uwagtinme tusa.
Nuwiya ajak aina nunashkam
amasaje yuwatnume tusa.
Tuja nugka kuashat kayagkamunum
olivo ayá nuna aceitejinchakam amasaje.
14 Tuja baka aidau muntsuji
ijugbau kantemtikamu aidau,
tuja uwija muntsuji ijugbau aidau
kuashat ajutjamiugme.
Tuja uwig duwejam aidau,
uwig tsakat duwejam aidau,
nuigtu cabra shiig kuashat Basán nugkanum
aijakua nuna neje yuuyugme.
Nuigtushkam trigo shiig pegkeg yuuyugme,
niniakjum uva yumiji ijugbau
kapantu umuyugme.
15 “Tujash Jesurún*“Jesurún” tawa nunak “Israel aents aidaun shiig anentus adayak” tuu adaikau ainawai. aidautigmek kuashat tagkugtin,
kuashat ajakjintin wajasjum nunú yuwakjum duwekugme.
Imanika duweku asajum,
kuntin uduejam niina ujen winchamtin wajas pempeentuki
niina kuitamnun tukumama numamtuk
Apajuí shiwagmauwaitjume.
Apajuíyai atumi najapauwa duka.
Nunin aig atum dakitakjum idaisauwaitjume.
Apajuíyai atumin kuitamjamak uwemtijamjauwa duka.
Nunin aig atumek kajegkauwaitjume.
16 Atumek dakumka najanamu
aidaun Apajuí dakita nunú
emematkujum, Apajuí senchi
ikajkauwaitjume.
17 Nuadui Apajuí emematmaina nunú
idaikujum, wainka apajuímtai aina nunú
ememattag tusajum
kuntin maajum apejakuitjume.
Atumi apachjum aajaku aina dukesh
wainajakchamu, tuja ememattanakesh
emematchaju aina nunú,
atumek yama wainmawaik emematjume.
18 Israel aents aidauwah,
atumek atumi Apajuíjum kuitamjamna
duka kajimatkiugme.
Apajuí pujutan amasua nunú kajimatkiugme.
19 Nuadui Tuke Pujuu atumnak,
niina uchiji nawanji ajuminig idaitamsaje.”
20 Nuadui Apajuí chichaak:
“Atumek aents pegkegchau ainagme.
Atumnak kajittsa diimainchau dekapeajime.
Nunin asagmin atumnak nuigtuk yaigchattajime.
Wajukatagmek nuna dakastajime.
21 “Atum aidautijum wainka apajuímtai
kakakchau, dekachu aina nunú emematkujum
mina kajemtijakjum akasmau etagme.
Nuadui Israel aentschau aidau
chichagmash makichkish antakchau aina
nuna wi yayaakui, atumek
kajeakjum waittsattagme.
22 Mina kajetjua duka jiijai betek kegawai.
Iman asa ashí nugka najatamunum kegak
nugkanak ajak aidaujai apea emegkaktatui.
Nuniak muja aidaunmashkam keettawai.
23 Wi atum aidautigminak ashí pegkegchau aina
nuna ishitkattajime waittsatnume tusan.
24 Dutika ai nujantai, nuigtu tsuweakjum jinattagme.
Tuja jata ishamain iyanjamag ijipattawai.
Nuigtushkam kuntin kajen aidaun,
dapi aidaun ishitkattajime.
25 Atumi uchijum aidauk jintá
maa aepeam agtinai.
Tuja atumi jeminia aidaushkam
senchi sapigmagtinai.
Imaaninak uchi tsakat aidau,
nuwauch tsakat aidau, múuntuch aidau,
uchi muntsu muntsuaku aidaush jinawagtinai.
26 “Tuja wi anentaimsan, tikich nugkanum
dapampaakan utsagtajai, dutika ai
dita wegantu aidau megkaejamtai,
pachisaish augmatchatai juwaktin ati tusan anentaimsabiajai.
27 Tujash nuna dutika ai shiwag aidau
mina pegkegchau chichagtuinakui,
antutan dakitakun dutikachmaijai.
Wi dutika ai mina shiwag aidau
ememas chichainak: ‘Tuke Pujuu
Israel aents aidaunak jiijag utsagchabi,
jutii aidauti iina senchijijai jiija utsagmaiji’,
tumain asagmatai idaisabiajai.
28 Israel aents aidauk pegkegchau
shiig anentainkachu ainawai.
29 Atumesh shiig anentaimkau ainakjumek,
wi suwimkan amastinaitjime
tusan tiuwaitjim nunú shiig dekau amainaitjume.
30 Atumesh anentaimsagmesh diyagmek,
¿atumi shiwaajum aina nuwiya suntag
ima makichkitak mil suntag
Israel aents aidaun ipisig ishiakua dusha?
¿Tuja atumi shiwaajum jimagchik suntajaitak,
diez mil suntag Israel aents aidaun
ipisjauwa dusha?
Nunak Tuke Pujuu atumi kuitamjamna nunú,
shiwag aidau depetuk amuktinme tusa
tiu asamtai dutijamau ainawai”, tiuwai.
31 Iina shiwaaji aina nuna apajuímtaiji aina duka
iina Apajuíjiya nujaig betekchauwa nunak
ditak shiig dekainawai.
32 Dita aidauk sodomanmaya aents,
gomorranmaya aents aajaku aina
nujai betek ainawai, nuadui dita aidauk
uva pegkegchau yapau yuwa jamainun
nejemaina nujai betek ainawai.
33 Nunú vino dita umutaiji aina dushakam
dapi tsagke magkagtina nujai betek ainawai.
34 Tuja Apajuí chichaak:
“Wi Israel aents aidaun ayamjakun
dita shiwaaji aidaun tsaiktinaitag nunak
etsegkashtatjai.
Duka makichik waji akik uukam
egkemama numamtinai.
35 Witjai suwimka sukagtinnuk,
nuniau asan tsawan jegakui,
wi suwimkanak susatnaitjai,
wagki nii waittsatna duka tsawantak jegawai.
Tuja nii suwimak jukitnuji umigkamua duka
tsawantak uminui”, tiuwai Apajuí.
36 Tuke Pujuu niina aentsji aidau kakaag
ayamjumamainchaun wainu asa ayamjuktatui.
Ditan ashí amuinak aents inaku waitkatai,
tuja agkan batsamin aina nujai
amukam kakaumainchau dekapeagtai,
Apajuí wait anentug,
37 chichajak: “¿Ii apajuímtaiji aina juju
ayamjutpaktatui tusajum,
38 nunú emematkujum
kuntin maa apeamua nuna wiyaji yuwakjum,
umutai vino nii anagkuamu umuyujum dusha tuwi batsatua?
¡Nunú nantajag atum waitiajum nuna ayamjutpaktinme!
¡Nunú kaunawag kuitamjamkatnume!
39 Ima Wikitjai Apajuínuk.
Tikich Apajuík makichkish atsawai.
Witjai pujuta sukagtinnuk,
tuja wikitjai pujuta ataínnuk.
Witjai suwimka sukagtinnuk, tuja wikitjai tsagkugkagtinnuk.
¡Mina suwimkajua nuna uwemtumainuk
makichkish atsawai!
40 Mina uwejun nayaimpinum takuajai,
nunikan wika Tuke Pujuu asan,
wi dutikatnujun pachisan tajai.
41 Mina puyagjun winchamtinun etsaka jukin,
ya aidauwa pegkegchaun takainak
mina shiwagmatuinak kajegtuinawa nuna
ijinatasan nagkamattajai.
42 Dutikan kuashat aentsun ijinkun
mina puyagjunak numpeagtatjai.
¡Makichkish uwemjachagtatui!
¡Shiwag ijinku nuna apuji aidau achija yajuakbau aina nunashkam ashí ijinattajai!
43 “Nuadui ashí tikich aents
judíochu aidautigmesh Apajuí aentsji aina
nujai ijunjajum dakujustajum.
Apajuí niina takajin aidau ijituamunum
atumi shiwaajum aidaunak ijinattawai.
Dutikak niina aentsji aidaunak wait anentug
ditá tudaujinak tsagkujattawai”, tiuwai.
Moisés inagnaku jintinkagtuamu
44 Moisés Josuéjai Israel aents aidau batsatbaunum jeganta dita antuinamunum yama nagkamchak agagbaunum nagkama kantama amukui.
45 Nuna ashí kantama inagnak, 46 nuadui Israel aents aidaun chichajak:
“Wi atumin jintintuajim nunú shiig antuka jukitajum. Nunikjum atumi uchijum aidau jintintuatajum, dutikawajam ditashkam chicham umiktin agagbauwa nuna ashí betek umiktinme. 47 Tuja juju chicham umiktin agagbauwa nunú wainkaya nunin diyakjum umitsuk idaisaigpajum. Juju chicham umiktina nunú atumnak pujutan amawai. Nuniau asamtai, Apajuí nugka anagtamauwa nunú namak Jordágka amain awa nuwi jegagmesh, nunú umiakjum kuashat tsawan pujustinaitjume”, tiuwai.
Apajuí Moisésan Canaán nugkan wainkati tusa iwaintukbau
48 Nunú tsawantin Tuke Pujuu Moisésan wantintuk chichajak: 49 “Muja Abarim tutaya nuwi wetá, nunikam muja Nebo tutai Moab aents aidau nugken yaakat Jericójai niinis awa nuwi wakata. Nunikam, nuwi wajasam Canaán nugkan wi Israel aents aidaun susattag nunú diista.
50 “Nunú mujanum wakattam nuwi amek amina yatsum Aarón Hor nugkanum jakauwa nunismek jakattame. 51 Atumek yumi pukuni jiinbau Meribá-cades tutaya nuwi Israel aents aidau yumi umumain atsutai chichamjuinakui, wi nunú dutikatajum tusan uwejush Sin tutainum tiuwaitjim nunú umikchauwaitjume. Nunú nugkanum Israel aents aidau yumin sumainakui atum mina eme anenjamu ditá emtin iwainakchau ainagme. 52 Nuadui wi Israel aents aidaun nugka susattag duka amek ayatak ikaa wajasam wainkattame. Tujash amek nuwig wayashtatme”, tiuwai Apajuí.