16
Agar niina uchiji Ismaeljai
1 Sarai kaga asa niina aishi Abragkan uchijin ejapjumainchau aajakui, untsu niina jeen inake Egipto nugkanmaya nuwa Agar daagtin pujujakui. 2 Nunik pujai Sarai Abraman chichajak:
“Nijah, amek Apajuí mina uchigmachu ati tusa tujutiuwa duka shiig dekame. Nuadui wait aneasam mina inakeg Agar puja au jukita. Nunikamin nuwi uchi akiinamtai, wi nuna jukin uchijimachainjash”, tiuwai. Tusa tama Abram niina nuwe tabaun antujus, ayu, tiuwai.
3 Nunik pujus Sarai Agaran juki Abragkai sujukui. Nunak Canaán nugkanum jegawag diez mijan pujusua duwi dutikauwai. 4 Abram Agaran juki pujus ejapmitkakui, dutikam pujus, Sarai ejapjuchu asamtai, dushikiak chichaman umigchau. 5 Nunitai, Sarai Abragkan chichajak:
“¡Mina inakeg Agar dushiktak chichaman umigtatsu duka utugchatak aminui! Wi amina nuwem ati tusan amasbaijame, dutikamaitak, yamai amina uchigmin ejapjuk mina nagkaetasu ememawai. Tujash ima Apajuíya duke tujamti, yakita juna utugchatan apujush wiyashitag, atsa ameashitam”, tiuwai.
6 Tusa tama Abram ayaak:
“Yamai nagkamsanuk amina inakminak amina idaitajame, ame itugkatag tame, dutikata”, tiuwai.
Tusa tima Sarai Agaran shiig senchi inak waitkau, imatika waitkam Agar tupikakiuwai. 7 Nunik tupikaki Shur nugkanum wetainum uwegshunum jintá yumi pukuni jiinbaunum ayaumas pujuttaman, Apajuí ángela nunin wajas wantintukui. 8 Dutika iniak:
“Agar Sarain inakegah, ¿amesh tuwiyamea miname? ¿Tuu weakmea aniame?” tau. Tama nii ayaak:
“Sarain wi takagnaitag nunú dakitjugmatai tupikajai”, tiuwai. 9 Tusa tutai, Apajuí ángel tumain chichajak:
“Wakitkita amina takagtaigmin, nunika jegaam Saraiyai sumimkata”, tiuwai.
10 Nuna tusa nuigtushkam chichajak:
“Amina uchijum wegantunash shiig kuashat
ikauntuktinaitjame, dutika ai makichkish dekapamainchau atinai.
11 Nijah, juju uchi ejapjukum nunú uchigmakam,
adaikattame Ismael,*“Ismael” tawa nunak “Apajuí antugtamkae” taku tawai. wagki ame
wekaesa waitiakum wake besemag anentaima
wekaegam nuna wi antugkajam duwi.
12 Tuja niig kakajus yunumtukchamin,
caballo unuinakchamua iman atinai,
iman asa ashí aentsjai maanitnai, nunitai
niina shiwaaji aidauk ima niijaig maaniagtinai.
Niina yachi aidaujaishkam shiwag atinai,
nuniau asa ima niina nugkenig pujustinai”, tiuwai.
13 Tusa tima, Apajuíjai chichasu asa, dekas amek “Apajuí wainbauwaitme” tusa puyatuk nigki anentaimas: “¡Apajuínap wainkaja, imanun wainkanush jakachjapi, iwaakjapi!” tiuwai. 14 Nuadui nuwi yumi piyag aajakua nuna “Iwaku pujuuwa nunú mina waita nunuwai” tuu adaikauwai. Nunú yumi piyajua duka yaakat Cades Béredjai niniaku awa nuna ejapeen awai.
15 Agar tsawanji jegajim uchi aishmagkun Abragka uchijin uchigmakui, nunikmatai Abram uchi daajin Ismael adaikauwai. 16 Agar niina uchiji Ismaelan uchigmakua nunak Abragnak ochenta y siete mijan ajujakui.