Habacuc
1
Profeta Habacuc Tuke Pujuujai chichasbau
1 Profeta Habacuc aajakua nuna Apajuí nii aentsji aidaun chichama ujakti tusa iwaintukui.
2 “Tuke Pujuuwah, yainkata tusan senchi untsuagme,
tujash amek minak antugtatsme.
¿Wajutiya minash antugtuktatme?
Pempeentuniki waitkaniamu ayá nunú
suwimak susam emegkagta tusan segamjame,
tujash amek makichkish duka dutikatsme.
3 ¿Wagka minash ibau pegkegchau aidau
iwaintugkumesh waitkajame?
Pegkegchau takat aidau, utugchat aidau,
yaakat tsayamu, jiyaniamu,
maaniamu aina duka makichkish agkaatsui,
ashí yantamnum ayawai.
4 Amina chichamem umiktin agagbaunak
makichkish uminatsui,
ajantunisag shiig aneas betek yainidauk
makichkish atsawai.
Aents pegkegchau aidau aents pegkeg aidaun waitkainawai.
Tsanumat, kasamat aina duka
ashí yantamnum ayawai”, tiuwai Habacuc.
Apajuí suwimak sukagtustin etsegkamu
5 Tusa timatai Apajuí ayaak:
“Tikich aents aidau batsata nuwish
wajukeawa nunú shiig diistajum.
Aunak dukap tsawan atsuk wi dutikattag
nunú wainkajum anentai jegashtatjume.
Juna tikich ujapainakuig,
atumek dekaskeapi tumaitsugme.
6 Caldeo aents pegkegchau magkagtin aidau
ashí nugkanum yujasag,
tikichi nugken atankiagtatus wakeyin aina nuna
inajagtatjai jetepaktinme tusan.
7 Ditak pegkegchau takatnum eemkau ainawai,
nunin asag, dita wakegamun takau ainawai,
nuadui makichkish tumainchau ainawai.
8 Aents caballonum maanin aidauk shiig kuashat
caballonum entsatkau atushat minisag
tutugtuinawai.
Nunú caballo aidauk ikamyawan nagkaesau senchi tupikainawai,
tuja nuigtush uwegshunmaya lobo kajen ajankachua nuna nagkaesau ainawai.
Iman asag atushat minisag
dita shiwaajinak águila yutaijin wainak,
nanaak akaetuki achiyama iman ainawai.
9 Dita shimuinakug ashí ijina shimawai,
imaaninak senchi uwakmakag shimawai,
tuja aentsun achijag yajumaina duka,
nayantsanum kayam dekapamainchauwa iman weakui.
10 Iman asag apu aidaunak, tuja tikich aents
eme anentsa diitai aina nunashkam dushikinawai.
Yaakat peejamu aina nunak
wainkauch diinak dushikinawai,
nuninak kamatkanum batsamas yaaktanak utuinawai.
11 Dase senchi dasentak kedegtuk nagkaemama iman ainawai.
Iman ainakush dita senchijiya nuna
apajuímaidau asag tunamainawai”, tiuwai.
Profeta kajeka ataktu chichakbau
12 “Israel aents aidaun Apajuíjiyah,
amek pegkejam tuke pujuuwaitme;
jinatnume tusamek idaikagtusaipa.
Amek amina aentsjum aidau suwimak susam jintintuatag
tusam, caldeo aents aidau ishitkaume.
13 Amek pegkegmaitam iman asam,
pegkegchauwa duka atsane pujuchuitme,
tuja tudaushkam dakitnaitme.
Nuadui ayatkek dii pujuipa, tuja aents pegkegchau aidau
aents pegkeg aidaun maatnume tusamek
agkan idaisaipa.
14 ¿Wagka aents aidaush
nayantsanmaya namak aidaujai betekash,
tuja kuntin apugtuchu aina nujai betekash awajsaume?
15 Nuadui caldeo aents aidau,
aents namaka main agsean ajuntuk,
tuja retan nená yupichuch
kuashat namakan achiyama numamtuk
aents aidaun achija ijumainawai,
dutikawag nuna diisag shiig aneenawai.
16 Nuadui nunú aents namaka main aina duka
niina redjin, agseajijai emematuinak
kuntinun maa apeenak,
kugkuin inciensonashkam apeenawai,
wagki ditak duwi maawag
dita yuwatnujinak shiig kuashat ijumag batsatu asag,
shiig aneas batsatui.
17 Caldeo aents aidau wainak mau batsamtitnume
tusamek idaikagtusaipa”, tiabiajai.