1 ¡Chah, Samariayah,

amina nugkemek pegkeg

shiig tsapau wajasuitam duwi,

Efraín aents nampen aina duka aminí ememainawai!

Untsu atumi apujig yagkug pegkejuch aidau

kagaka megkagama numamtuk megkagainawai.

Samarianmak ima aents nampen aina duke piyak awai.

2 Makichik aents senchigtin

Tuke Pujuu etegkamu pujawai,

niina senchijig bicha kakegak ishamain wajama imanai,

tuja dase senchi dasentak magkagtina iman,

yumi senchi yutug, nujag pimak ijijatna imanai.

Iman asa samarianmaya aents

aidaunak makichkia shitamuik ajuattawai.

3 Dutikak Efraín wegantu nampen wajasu aidau,

yaakat Samaria pegkeg asamtai,

emema batsata nunak nii tsaika ajapatnai.

4 Dutikamtai nunú nugka pegkegnum

yagkug kagaku ayá duka,

higo tsamajun aents ajantutsuk akaka yuwa

amuwama numamtuk awajam agtatui.

5 Untsu nunú tsawantin aents niina umijin aidau

iwaku juwagtina nuna atsejutaiji, dekas pegkeg atina duka,

Tuke Pujuu ashí senchigtina nunuwai.

6 Tuja apu chichama epegkin aidaunashkam

Apajuí shiig takau emaktinai,

tuja suntag yaaktan kuitamin aidaunash wajiumitkaktinai.

7 Tuja profeta aidaushkam sacerdote aidaujai,

senchi vinon umuidau asag,

nampejag winchainainak tukumak iyá yujawai;

imanik nampedau asag,

Apajuí chichamenak antukchamin batsatui.

8 Nuadui dita mesajinig

ayatak tsumain iyakbau ayawai,

makichkish iyaka tsuwapachbauk atsawai.

9 Tuja mina chichagtuinak:

“¡Taata nunikam aminash Apajuísh

wajina iwaintugmake, nunú uchi piipich

10 papii augchau unuimagti

tusa a, ba, cha, da, jintinmaina numamtuk

jintinkagtuata!” tusa dushiktuinawai.

11 Tuja atumek nampekjum

pegkegchau chichá batsatu asajum,

chicham antut dakitau asagmin,

aents tikich chichaman chichaaku aidau

amuktinme tusa Apajuí idaitamsattawai.

12 Yaunchuk Apajuí chichagtamainak:

“Juwig utugchatak atsawai, juwi ayamainaitjume,

aents pimpikiuk ayamsati”, tusa tujabiuwai.

Tujash atumek tusa tujamaig antugkachuitjume.

13 Nuadui Tuke Pujuu atumnak

uchi piipich papii augtan unuimagti tusa

chichagmaina numamtuk chichagtamkattawai.

Uchi piipich yama wekagama numamtin atatjume,

nunin asajum tuntupmin iyagjum,

najaimakjum nantakchamin dekaptatjume.

14 Atum datsantainchau aidau

Jerusalégnum apu wajasjum, inamak batsatu aidautijum

Tuke Pujuu tujama nunú antuktajum.

15 Atum chichaakjum:

“Ii aidautik jinau aidaujai chicham umikji”, tajume.

Tuja atumek asirianmaya suntag aidau ishamakjum

iwanchnum sujumankaugme, nii kuitamjamkati tusajum.

Nuniku asajum, chichakjum:

“Iinak makichkish mantamainchau ainawai,

wagki nunú iina shiwaaji aidaunak

tsanuja dushijattawai”, tajume.

16 Nuadui Tuke Pujuu chichaak:

“Siógnum makichik kaya etegkamu shiig pegkeg akikan apusattajai,

nunú atatui dekas ima eme anentsa diitai.

Nunú kayanum ekeni jegamnaktatui.

Nunú kayanum kajinas anentaimaidauk

shiig agkan batsamsagtinai.

17 Nunú jegamku, tunin ai tusa

plomo nená diitia numamtin

atatui shiig takamua nunú.

“Atumek egiptunmaya aidau

ayamjutpaktatui tajume,

tujash ditanak asirianmaya suntag senchigtin aidau

namak dujajak tajaka ajapama numamtuk ijinawagtinai.”