2
Jonás Apajuín ausamu
1 Nunik Jonásak namaka ampujin egkemas Tuke Pujuu niina Apajuíjin aujak, 2 aatus tiuwai:
“Tuke Pujuuwah, namaka initken tepeakun jajapi tibaijai.
Ashí jakan amina untsukmaijame,
dutika ai ame minak yainkabiume.
3 Dekas nayantsa kunajin ajunkabiume,
ayatak yuminum egkemkan wekaebaijai.
Wainchi ishamain ame awemamu
tuku tukuji nagkaetibi.
4 Minak dekas ajapjuaumeapi tibaijai,
tuja amina jem pegkegma nunak
ataktu awagkinuk wainkashtinapitja tibaijai.
5 Shiig initak tepeabiajai,
nayants ijitua emegkatkabi,
initkanmaya dupa aidau buukjun pempenjibi.
6 Shiig initak tepean nugkanum jegabiajai,
tuke jiinkishtinapitja tibaijai.
Tujash Tuke Pujuuwah, mina Apajuíjuh, ame minak uwemtijugmayume.
7 Tikima jakun aminí anentaimjan,
untsukmaijame. Tusa untsumai
ame amina jem pegkegma nuwi pujusam antugtukmayume.
8 Wainka apajuímtai aidaun emematuinak
ima aminak umigtamainun idayinawai.
9 Tujash wika kuntinun maa apeakun amina ememattatjame,
nuniakun wi amina ememattatjame tusan
tiuwaitjam nunak imatiksanuk umiktatjai.
¡Wagki ameketme uwemtikagtinmek!” tiuwai.
10 Tusa aatus timatai, Tuke Pujuu nunú namak Jonásan kukag iyakti tiuwai. Tusa tima Jonásan kukag iyakui.