Yamajam chicham Lucas agagbau
1
Nagkabau
Kuashat aents dekapsaje augmatbau jutiiní dekaskenum nagkaemakiuwa nuna pachisag betekmas agajagtatus, yama nagkamsag Jesusan wainkau aidau, chichaman etsejuidau jutiin jintinjamawajua dutiksanuk, wishakam kuitamsan ashí wají aidaush wajuk nagkamdauwaita nuna shiig inimsan dekaan, betekmasan aneetaiju Teofiloh agatjame, amina dekaskea nuna jintinjamawajua nu shiig dekau aminum tau asan.
Juan Yamijatin akiinatnuji etsegkamu
Herodes Judeanum rey wajas inamai, sacerdote Zacarías daagtin pujujakui Abías weantu, nuweg Aarón weantu Elisabet daagtin aajakui. Ditak Apajuí eemtinish pegkegnak takaidau, nunidau asag Apu Apajuí chicham umiktajum tibauwa nui awa nunashkam imatiksag betek umidau. Tujash uchijig atsujuidau Elisabet kaga asamtai, nuigtushkam ditak mai muuntuch wajasaju asag.
Nuniamunum makichik tsawantai Zacarías, ditajai ijunja takataijai antiamu asa, sacerdote Apajuí eemtin takau aina dutika takainamunum, sacerdote aidauk tuke dutikin asag, Apu Apajuí ememattai pegkegma nui wayash yaki inciensonash apeat tabaunum, niina kayají jiintukiuwai. 10 Nunikmatai incienso apetai hora jegamtai, ashí aents aidauk agaa ijunas Apajuin aujuidau. 11 Nuniai Apu Apajuí angelji Zacariasan wantintuk, altar incienso apetainum ayaumas untsugnumanini wajantau. 12 Nuna Zacarías wainak puyatkau, nunik senchi ishamau; 13 nunitai ángel chichajak:
—Zacariasah ishamkaipa, wagki ame Apajuí augbauk antuekae, nuniau asamtai nuwem Elisabet aishmagkun uchigmakmatai Juan adaikattame. 14 Nunikmatai shiig aneasam dakujustatme. Tuja kuashat aents aidaushkam shiig aneediagtatui nu uchi akiinamunum; 15 wagki nigka Apu Apajuí eme anentai atinai, uwagchatnai vinonash, umutai kajiau aidaunashkam nuigtushkam dukují wakeen nagkamsag Wakaní Pegkeji ajitnai; 16 kuashat Israelan uchijí aidaun ataktú ditá Apuji Apajuiya nui awakeagtatui; 17 niiyá eemak taa etsegkattawai Apu minitnujin Eliasa wakaní nuigtú senchijí ajujakua nunisag, dutikak muun aidaush anentain yapajiawag uchijijai iwajag pujustinme, aents intimkiu aidaushkam chichaman betek umiktinme, apu minitaish shiig anentus jukitag tuidau asag, tau.
18 Tama Zacarías angelan ayaak: ¿Nunash wajuk nuniktatuapi titajaki, wi mina duwagjai mai muuntuch wajasag juninnush?, tau.
19 Tutai ángel ayaak:
—Wika Gabrielaitjai, Apajuí inakegaitjai, ni awetime yamajam chicham pegkeja nuna amina ujaktí tusa; 20 tujash wi tajam nu dekaskeapi tatsum dui, yamaik chichachu wajastatme, nunikam chichatsuk pujusam, tsawan wi tajam nu ejetatme, tau.
21 Nuniai aents aidauk Zacariasan dakak ijunaidau, tesamu pegkegmanum wayá megkaekamtai, wagkag imanikash megkaekae tusag. 22 Nuninai jiinki chichamainchau dekapeau, nunitai tesamu pegkegmanum waya duwiyap wantintuke, tuidau. Nigka ayatak iwimas augmamu nuniak chichatsuk pujau.
23 Nunik Zacariasak tsawan ni takaamujinak ashí umik ukuak, ni jeen wakitkiu. 24 Nuna nunik dukap tsawan pujatsaig nuwe Elisabet ejapjuku, nunik wantintsuk jeenig pujus cinco nantun inagkeakiu. 25 Nunak: “Apu Apajuí wait anenjak jutijuae, wi datsaamá pujuweg nuna emegkatjuktatus”, taku nunikui.
Jesús akiinatin etsegkamu
26 Elisabet ejapjuk seis nantu pujai, Apajuí, ángel Gabrielan yaakat Nazaret tutai Galilea nugkanum awa nui awemauwai, 27 nuanui makichik nuwa María daagtin aentsú antishtai, Rey David wegantu José daagtin anagmamu pujau asamtai. 28 Nunik ángel María pujamunum wayaak:
—María pujamek, aminak Apu Apajuí wait anenjamag etegtamjae, dutijabau asa amijai awai, tau.
29 Tujash nigka nu aaja tama antuk puyatkau, wajina takug tuush kumpamjawa tusa. 30 Nunitai ángel chichajak:
—María ishamkaipa, aminak Apajuí wait anenjamjae, 31 nunin asamtai amek ejapjukam aishmag uchigmakam, Jesús adaikattame. 32 Duka eme anentai atatui, nuniau asa “Apajuí ashí tikich aidau nagkaesau muunta nuna Uchijí” tama atinai. Apu Apajuiya nu, niina apají David ekeemas inamajakua nui inamjati tusa susattawai, 33 dutikamu asa, Jacopa uchijí aidaunum tuke inamin atí tusa, ni inabaujiya duka ajumaish nagkankashtinai, tau.
34 Tama María angelan ayaak:
—¿Dusha wajuk nunimainaita wi makichik aishmagjaigkish pujatsugjama?, tau. 35 Tutai ángel ayaak:
—Wakaní Pegkeji aminí taattawai nunikmatai ashí tikich aidau nagkaesau muunta nuna senchijí ejapaktatui. Nunin asa uchi akiinatta dusha pegkejam “Apajuí Uchijí” tama atinai. 36 Tuja ame pataim Elisabetchakam muumpatnum ejapjuke, nunik seis nantu wegawai, kagae tinu agma nunú. 37 Apajuí tujinmainuk makichkish atsawai, tau.
38 Tutai María ayaak:
—Wika Apu Apajuí inakegaitjai, ame tujutam duka nunisag uminkati, tiu.
Timatai angelak weak ukukiuwai.
María Elisabet ijagsamu
39 Nunú tsawan wegamunum, María waujus jiinki weuwai, Judea nugka mujajin yaakat aunum, 40 nunik Zacariasa jeen wayá Elisabetan kumpamau. 41 Nunik Elisabet, María kumpamku chichaamun antaig uchi senchi kakaaju, nuniaig Elisabetan Wakaní Pegkeji egkemtujam, 42 senchi chichaak:
—Ashí nuwa aina nuiyan amina Apajuí pegkegnum chichagtai awatamsae, antsag uchigminash pegkegnum chichagtai awasae. 43 Wi imanchauwaitag nunin aish, ¿wagka mina Apujú dukujimesh ijagtustasamesh miname? 44 Wagki ame mina kumpamjakum chichaam nuna antaig, uchi senchi kakaaje, shiig aneak. 45 Shiig aneastinai dekaskeapi tiuwa duka, wagki Apu Apajuí tibauwa duka uminkatin asamtai.
46 Tutai Mariashkam:
“Wika Apunak mina anentaimtagjai emematjai.
47 Mina wakanjuk shiig aneawai Apajuí mina uwemtijina nui,
48 niina inake imanchauch aigkish mina etegtua dui.
Yamai nagkamsag ashí aents aidauk, shiig aneasui tujutiagtinai.
49 Wagki Senchigtina nu, wají shiig muuntan minai dutika duka daajig Pegkegmai.
50 Nuigtush ni wait anenkagtutaijiya duka, aents akiinak minidau niina ajantus emematiagtin aina nudauwai.
51 Nigka senchigtina ibau asa junak jutikae; dutikak emebau aidau dutikatasa anentaimtusbaujinash wainak emake.
52 Senchigtin aidau ekeemtaijinak atankine, dutika imanchauch aina nuna dekas iman awasae.
53 Yapajuau aidaunash wají pegkeg aidaun shiig kuashat susaje, dutikak wiyakuch aidaunak uwegmatak ishiake.
54 Ni inake Israelnak yaigké, ni wait anenkagtutaijiya nuna aneaku asa;
55 nuna pachisag jutii muunji aajakajua nuna tiu aajakui, Abrahaman
nuigtú ni weantunum akiinak wegagtina nunash tuke atina nuna”.
56 María nuna tii, Elisabetan jeenig kampatum nantu tumain pujusui, nunik wakitkiuwai niina jeen.
Juan Yamijatin akiinamu
57 Elisabet tsawanji jegajim, aishmagkun uchigmakui. 58 Nunikmatai nui ijutkau batsataidau, niina patayí aidaushkam Apu Apajuí wait anenjam uchigmakbaun antukaju asag Elisabetjai shiig aneasajui. 59 Uchi akiina ocho tsawan wetai, uchí pakaji ajapjuatasag* “Pakaji ajapjuatasag” tawa nunak, judío aidauk uchi aishmag akiinamtaig, Apajuí dutikata tibau asag uchí katiuchiji chuchuken tsupigkag ajapjujakú asamtai tawai. Diistá Gn. 17.10-12; Lv. 12.3. kautuawajui, nuninak apají daaji Zacariasa nunak adaikatag tuidau. 60 Tujash uchí dukují chichaak:
—Atsa, uchik Juan atatui, tau.
61 Tutai: —Ame pataim aina nuiyag tu daagtinuk atsajamah, tuidau.
62 Tutai uchí apajin iwiyas inidau, daajish ya atí tawaki tusag. 63 Nuniagtai tapna sujustá tusa inakmatai susam: Daajig Juagkai tusa agaju. Dutikamtai ashí anentai jegagchaju. 64 Nuna dutikamuik ataktú chichakú. Nunik Apajuin emematiu. 65 Nunikmatai nui ijutkau batsamin aidauk senchi puyatkaju; nunisag ashí Judea mujajin batsamin aidaushkam, nu nunikbauwa nunak ashí dekaawaju. 66 Ashí aents nuna antuidauk: “¿Jusha uchish wajukuk atinaita?” tuidau, Apu Apajuí niina senchijin kuitabaun dekaidau asag.
Zacarías Apajuí emematbau
67 Zacarías, uchí apajiya nu, Wakaní Pegkeji chichamtikam, nuniktinun pachis chichaak:
68 “Emematiagmi Apu, Israelan Apajuijiya nu,
ni aentsjin agkanmitkatatus taa nunú.
69 Awetugmaji makichik senchigtin Uwemtikagtinun, ni inake David aajakua nunú wegantun.
70 Yaunchuk nagkamas niina profetaji
pegkejam aajakajua nu etsejuinak:
71 iina shiwaji aidaun
nuigtú ashí tikich aents kajegtamin aina nunash depetuk uwemtijamjatna nuna;
72 iina muunji aajakajua nunash wait anenjatnaitjame tusa chicham apakbau pegkegma nuna aneaku asa.
73 Iina apají Abrahaman dekas umiktatjai tiuwa duka juuwai:
74 Ishamkas pujuinaku, iina shiwajinish agkanmagawaja, ni umijuinaku,
75 pegkeniaja nuigtú pegkeja nu takainaku niijaig
ashí tsawantai pujusagtasa”, tiuwai.
76 Nuna tii uchijinashkam:
“Amek uchijuh, ashí tikich aidau nagkaesau muunta nuna profetaji tama atatme;
wagki amek eemkam wetatme Apú jinti umigkatasam,
77 ni aentsjish uwemat dekamtikatasam;
tudau aidau tsagkugnamushkam.
78 Iina Apajuijiya nu shiig senchi wait anenjamu asa, nayaimpinmaya etsa puwau jiinama nuniktinun awetugmae,
79 suwenum batsataina nuna tsaapmitka;
jinta agkan pujutnum ekagtina nui jutiinash awekapasti tau asa”, tiuwai.
80 Uchishkam tsakau, nuniak wakaninchakam nuní senchi ichichmamu, nuniak uwegshunum pujusui, Israelnum chicham etsegkatin tsawan jegatai wantinkatatus.

*1:59 “Pakaji ajapjuatasag” tawa nunak, judío aidauk uchi aishmag akiinamtaig, Apajuí dutikata tibau asag uchí katiuchiji chuchuken tsupigkag ajapjujakú asamtai tawai. Diistá Gn. 17.10-12; Lv. 12.3.