1 Mijan nagkamnamu makichik nantu takau ai, uwejush Sin tutainum Israel aents aidau jegawajui. Nunikag nuwi Cadesnum ujumak tsawan pujusajui. Nuwi batsatai María jakauwai, nunikmatai nuwig ukusajui.

2 Tuja nuwi yumi umumain atsau asamtai, Moisésan jiyakagtatus aents aidau ashí ijunjajui. 3 Nunik ijunag Moisésan Aarógjai chichajuinak:

“¡Tuke Pujuu tikich Israel aents aidaun ijinawabia nunú nugkanmak iinash ijipamainnas aikagmayatai! 4 ¿Wagka atumesh Tuke Pujuu aentsji aidautish imajuish uwegshunmash itajatuaugme? ¿Tagkuji aidaujaí ashí jinatnume tukagtatsjumek? 5 ¿Wagka Egipto nugkanmaya jiijatkigmesh, juju nugka shiig pegkegchauwa imagnumash itajatuaugme? Juju nugka juwig makichkish ajakmamaitsui. Tuja higuerakesh, uvakesh, munchigkesh juwig shiig atsawai. Nuigtush ¡yumi umumainush shiig atsawai!” wajaidau.

6 Imatiagtai Moisés Aarógjai aents aidaun ukukiag Apajuíjai chichatai aak aakmakbaunum nuna waitijin jegantag nuwi tsuntsumawag nijayin nugka antig pujusajui. Nunik pujuinai Tuke Pujuu niina imanjijai wantinkauwai. 7 Nunik Moisésan chichajak:

8 “Ushujutaijum jukim Aarón yaimpasmatai aents aidau ijumjata. Dutika ijumjam ditá emtin kaya chichagkum: Yumi sukagtusta tita. Tusa tamin nunú kayanmaya yumi jiinkittawai, nunikmatai dita umuinak tagkujinash agtinme”, tiuwai.

9 Tusa tima nuna betek umiak, Moisés niina ushujutaiji Tuke Pujuu emtin atatman jukiuwai. 10 Dutika juki Aarógjai aents aidaun kayanum ijumag chichajak: “Antuktajum, chichama intimkiu aidauwah: ¿Juju kaya juwiyan yumin jiikiag amasmatai, uwajagmi tusagmeka imatjum?”

11 Tusa Moisés niina ushujutaijin juki kayan jimajá awatiuwai. Dutikam kuashat yumi jiinkiuwai. Nunikmatai Israel aents aidauk nuna umuinak ditá tagkujinash aakajui.

12 Tujash Tuke Pujuu Moisésan Aarógjai chichajak: “Atumek minai kajintsa anentaimtsuk, tuja mina pegkegmajua dushakam Israel aents aidaunum iwainakchau asajum, wi nugka anagkuawaitjim nuwig juju aents aidau yajuakjumek wechattagme”, tiuwai.

13 Nuadui nunú nugka daajin Meribá*“Meribá” tawa duka hebreo chichamnumak “chichamjukbau” taku tawai. adaikajui. Nuwi Israel aents aidau Apajuín yumi sukagtusta tusa chichamjukaju asagmatai. Tusa segam Tuke Pujuu niina pegkegmajin ditan iwaintukui.

14 Cadesnum batsamas Moisés aents chichama etsejin aidaun Edoma apuji pujamunum ishimak, juna aatus akatmamtujui:

“Amina yatsum Israel aents aidau juna aatus tujamainawai: Amek shiig dekame ii utugchatnum batsatuti jiinja yujag duka. 15 Iina apachji aidau Egipto nugkanum shiyakag awi kuashat tsawan batsamsajui, tujash egiptunmaya aidau iina apachjin waitkasu aina dutiksag jutinashkam waitkagmayanume. 16 Imatijamainakui Tuke Pujuu yaimpakti tusa segabiaji. Dutika ajin ii sumamun antugtamak, niina aentsji nayaimpinmaya ángel makichik awetugmabi, dutikam nunú Egipto nugkanum batsatutin jiipaju asamtai, yamai juju amina nugkem nagkatkamunum yaakat Cadesnum kauna batsatji.

17 “Nuniau asa wait anenkagtugta, amina nugkemea nuni nagkaemakiagmi tusa taji. Nunika nagkaemakuish, ajak ajakmamunmak, tuja uva ayamunmash nagkaemakchattaji, tuja ame yumi umutaigmekesh uwagchattaji. Jinta wetaya duke yajash tsegketsuk amina nugkem nagkaikitasa wetatji tujamui”, tiajui.

18 Tusa ujaam Edoma apuji ditan ayaak:

“¡Mina nugkajua junig makichkish nagkaemakigpa, tuja antutsuk nagkaemakjuminig, mina suntajujai jiintuktatjime atumjai maaniatasan!” tiuwai.

19 Tusa tutai chichama etsejin aidau ataktu awena shiig ujainak:

“Jinta wetaya duke wetatji, untsu nuniamunum iikish atsa nuniashkush iina tagkujigkesh yumi amina umutaigmin umuinakuig nunak akiktajame. Iik ayatak nagkaemaktasa wakegaji”, tuidau.

20 Tusa tiagtai, Edoma apuji chichaak:

“¡Tujash junig nagkaemakchattagme!” tiuwai. Nuna tusa Israel aents aidaujai maaniatatus niina suntaji maanitan yacha aidaujai shiig uminas jiintukiuwai. 21 Dutika nagkaemamainchau emam, Israel aents aidauk pempeenag yaja tikich yantamnum shiyakajui.

22 Israel aents aidauk Cades batsatu ashí jiinag muja Hor tutainum shiyakajui. 23 Nunikag Edoma nugke nagkatkamunum jegawagmatai, nuwi Tuke Pujuu Moisésan Aarógjai chichajak:

24 “Aarógkak jakattawai, nuniktin asa wi Israel aents aidaun nugka anagkuawaitag nuwig wayashtatui, wagki atumek Meribánum yumi awa nuwi wi umikta tibau umikchau ainagme. 25 Tuja Moisésah, ame Aarón niina uchiji Eleazarjai jukim, muja Hornum nuna titijin wakata. 26 Nuwi wakam Aarón sacerdote nugkutaijin nugkuaja nunú awitka jukim niina uchiji Eleazar apegata. Nuwi Aarógkak jakattawai”, tiuwai.

27 Tusa tima Moisés Tuke Pujuu tibaunak imatiksag umikui. Nunak ashí Israel aents aidau wainbaunum muja Hornum weuwai. 28 Nunik waka nuwi Moisés Aarógka jáanchjin awituk jujuki Eleazaran apegauwai. Tuja Aarógkak nunú mujá titijiya nuwi jakauwai. Nunikmatai Moisés Eleazarjai mujanum batsatu waketug kaunauwai. 29 Tuja Aarón jakamun Israel aents aidau dekawag, treinta tsawantai buutiaju ainawai.