10 Nuwa shiig anentaimkauk

kakajus igkumaitsui,

¡kaya pegkejuch akik aina

nuna nagkaesauwai!

11 Niina aishig shiig kajitus diyawai,

tuja kuichkinash atsumchagtinai.

12 Niina aishig, nuwe utugchatan apujtus

waitkachbau asa,

tuké shiig aneas pujawai.

13 Lanan ujuchjai egaka sumak,

nuna wakejus shiig aneas jáanchi apijug najanak pujawai.

14 Lancha wajiin atushtanmayan ikaunmama numamtuk,

nunú nuwa dita yuwatnujinak atushtanmayan ikaunmawai.

15 Dutika eke tsawatsaig nantaki,

yutain inajuk uchiji aidaun

inake aidaujai ayujuk,

inake aidaunak takatnum ishimui.

16 Tuja nugka pegkejan diisa,

nuna akikenak nii takasa jukimui

betek akikmak sumawai.

Dutika nuwi uvan ajakmawai.

17 Aatus kakaag senchi takau asa,

shiig aneas kashikmas nagkama taka takakua etsa akapak ukuawai.

18 Wajiji kuashat kawegti tau asa nii kuitamui,

tuja kashish takau asamtai, jii tuké keeka awai.

19 Tuja niina jáanchjinash

nigki apaja nugkuawai.

20 Tuja ujudauch aidau

atsumiagtaish, yayawai.

21 Tsetsek tepetaish,

niina uchiji aidaunak puyatjatsui,

wagki ditak jáanchin shiig nugkujag yujaidau asagmatai.

22 Colchajinash nigki najanui,

tuja niig jáanch shiig pegkeg

apagbau aidaun nugkuawai.

23 Tuja niina aishinashkam

yaaktanmaya aidauk ashí wainainawai,

wagki apu eme anentsa diitai aina nuwi niishkam

pachitkau asamtai.

24 Nunú nuwak jáanch aidaun

akachumtai aidaujai najanak,

waji sujin aidaunum sujawai.

25 Eme anentsa diitai asa,

nuna megkaekaig tusa kuitamamui.

Tuja atakea duish wajukatnukitja

tusagkesh puyatmamtsui.

26 Chichaakush shiig anentaimas chichawai,

tuja niina uchijinash shiig anentus jintintui.

27 Niina jeen utugchat ai tusa aneaku pujawai,

tuja nii takasa jukichbaujinianak yuwatsui.

28 Nuadui niina uchiji aidau

niina aishijai emematus chichajuinak:

29 “¡Nuwa pegkeg aidauk kuashat ayawai,

tujash ametme ashí tikich nuwa aina

nuna nagkaesaumek!” tuinawai.

30 Nuwa shigmaji diisa wakejamua duka wainkayai,

tuja shiig awajkagtamujia

dushakam wainkayai,

dekas nuwa Tuke Pujuun umigna

nunuwai ememattsa diyam auwa duka.

31 ¡Niina takatji pegkeja nunú anentaimtusjum,

ashí aents aidau emtin eme anentsajum

pegkegnum chichagtajum!