1 Tuke Pujuuwai mina tsaaptinjuk,

Tuke Pujuuwai mina uwemtaijuk,

Tuke Pujuuwai mina pujutjun kuitamjutuk,

nunin aish ¿yanak wisha ishamkainja?

2 Aents pegkegchau

mina shiwag aina nunú,

ijunainawai mina mantuawagtatus,

tujash ditak tukumak iyajag jinuinawai.

3 Kuashat suntag mina tententuinakuish,

wika ishamkashtatjai,

tuja mina jetetkagtatus uminainakuish,

wika puyattsuk pujuttajai.

4 Ima makichkia nunak

Tuke Pujuun segabiajai,

tuja wika ima makichkia nunak wakegajai:

Wika iwaku pujag duikik

kashi kashinig Tuke Pujuun emematkun

niina jee pegkegma nuwi

pujustatajai, niina pegkegmajiya

nuna wainkatasan.

5 Tsawan utugchat ajuttaish,

Apajuí niina jee pegkegma nuwi uugkattawai,

Tuja kaya muunnum waka

uwemaina numamtuk uwemtijugtatui.

6 Nuadui mina shiwag aidau

tententuinakuish, ishamkashtatjai

Apajuí depetmikaju asamtai.

Nuadui kuntinu maan

Apajuí jee pegkegma nuwi

apeakun niina ememattatjai;

shiig aneasan senchi kantamkun

Tuke Pujuun ememattatjai.

7 ¡Tuke Pujuuwah,

amina segajame, antugtukta!

¡Minash wait anenjujam, aigkata!

8 Mina anentaig chichagtak:

“Apajuí egakta”, tujutui.

Nuadui amina wainkatasan egagme.

9 ¡Wait aneasam uumjutkaipa!

¡Kajegtukam aigtsuk idaitusaipa!

¡Ima ameketme mina yainnumek!

Nuadui mina ayamjutmain atsugtaigkik,

ima minakek idaitusaipa,

wagki ametme mina Apajuíg uwemtijin.

10 Mina apag mina dukugjai

ima minak idaituinakuish,

Tuke Pujuuwah,

ame minak jujukim kuitamjuktinaitme.

11 Mina shiwag aidau egatuinawai,

nuadui Tuke Pujuuwah,

amina jintim pegkeja nunú iwaintugkata,

tuja wisha wajuk pujumainaitja nunú tujutta.

12 Mina shiwag aidau dita wakegamujin uminak,

maatnume tusamek tsagkamjukaipa,

mina shiwag tsanumin aidau nantagtujaje.

13 Tujash wika eke jatsuk

iwaku juju nugka juwig pujusan,

amina pegkegmagmia nuna

wainkatnunak shiig dekajai.

14 ¡Tuke Pujuuwai

kajinmamsam anentaimsata!

¡Ishamkagtutsuk, ichichmamjata!

¡Ehe, dekas ima Tuke Pujuuwaig

kajinmamsam anentaimsata!