1 Aents pegkeg aidauwah, shiig aneasjum

Tuke Pujuu emematkujum kantamatajum.

Aents pegkeg aidau kantabauk yajautsui.

2 Arpa awatku kantamtai kantamkujum

Tuke Pujuu see titajum.

3 ¡Kantamtai pegkeg aina nunú

kantamkujum nii ememattajum!

Tuja yamajam kantamtai

kantamkujum nii eme anentsajum

shiig aneakjum untsumtajum.

4 Tuke Pujuun chichamega duka

waitchauwai, shiig dekaske,

nuadui nii tibauwa duka ashí betek uminui.

5 Tuke Pujuuk pegkeg takata nuna

dekaskea nujai aneawai.

¡Nuadui niina anenkega duka

ashí nugkan jamag awai!

6 Tuke Pujuuk ima niina chichamenig

nayaim aidaun, nantu, etsa, yaya aidaun

aatus ashí najankauwai.

7 Apajuíyai kucha múun aidaunmayan

yumi yajuak makichkinmak ijumjauwa duka.

8 ¡Aents ashí nugkanmaya aidautijum

Tuke Pujuu eme anentsajum umigkatajum!

9 Wagki nii niina chichamenig

ashí najankauwai.

Tuja nii nunikti timauwa duka imanisag

makichkish wajukachmin wajas asauwai.

10 Tuke Pujuuk aents pegkegchau

tikich nugkanmaya aidau

pegkegchaun dutikatag tusa

anentaimtugbaujin betek umikti

tusag ayatkek idaitsui.

11 Untsu Tuke Pujuu nuna dutikatjai tibauwa duka

makichkish yapajinchauwai.

12 Aents aidau Tuke Pujuuwai dekas iina

Apajuíjig tuina duka

shiig aneasag pujusagtinai,

wagki midau ati tusa etegkamu asag.

13 Tuke Pujuuk nayaimpinum pujusag

ashí aents aidaunak diyakui.

14 Nii puja nuwi pujusag

aents nugkanmaya aidaush

wajukenawa nunak ashí wainui.

15 Apajuíyai iina anentain najadauk,

nuadui ashí ii takamunak diigtamkawai.

16 Makichik apua duka

niina suntaji aina nujaig

ayamjumakag uwemaitsui,

tuja aents aidaushkam

niina senchijinigkik ayamjumamaitsui.

17 Tuja caballo aina duka

senchigtin ainayatkush,

aentsu ayamjukag uwemtikmaitsui.

18 Untsu Tuke Pujuun eme anentus,

ima niyaig kajinmamas anentaimaina

nunak nii tuké kuitamui.

19 Tuja nujan tepeamtaish,

nujantai jakati tusag idaitsui.

20 Ii aidautik Tuke Pujuuwai kajinmamsa anentaimji,

nuniajin ¡nii kuitamjamak yaimpaji!

21 Iina anentain Apajuí anentaimtusa shiig aneaji.

Nuniaku niina daaji pegkegma nuwi

kajinmamsa anentaimji.

22 ¡Tuke Pujuuwah,

aminí anentaimsa pujau asajin,

amina anenkagmia nunú uyunkagtusti!