51
Apawa wait aneasam mina tudaujush tsagkugtugta
David Betsabén nuwatkamtai*Nunú pachisa ausata 2 Sam 12.1-12. profeta Natán jiyakam pujusa juna aatus agajui
1 Apajuíyah, amina anenkagmin wait anenjugta;
tuja amina wait anenkagtutaigmin
mina tudaujush tsagkugtugta.
2 ¡Mina anentaijui pegkegchau ayá nunú nijatjugta!
Tuja mina tudaujush jaipja utsanjukta.
3 Mina pegkegchaugnak wika shiig dekagmamjai.
Tuja wi pegkegchau takamsamua duka
mina anentaijuig sakamtsui.
4 Ame dakitamun amina emtimin
pegkegchaun takamsan
ikajeakun waitkagme.
Nuadui minak dekaskenum
suwimkak sujustatme.
Wika pegkegmaitjai tusanuk tumaitsujai.
5 Wika dekas wi akiinawaitag
duwi nagkamsanuk tudauwaitjai;
tuja mina dukuju muntsujin muntsuaku asanuk tudau ayajai.
6 Amek dekas aents ememachu
dekaskenum chichauwa nunú aneame;
nuadui shiig anentaimja pujut sujusume.
7 Wi pegkegchau takamsamu
mina anentaijui ajuta nunú hisopowai†“Hisopo” tawa duka makichik ajak ajakui. Nuna duke juki jaipmaina numamtuk jaipjugti tusa David tiuwai. jaipja ajapjutuata,
dutijuawamin pegkeg wajastajai;
ashí minak nijatjata, dutijuawamin
yujagkim pujuama nuna nagkaesau wajastajai.
8 Suwimak sujakum waitkagsau akumesh,
yamaik minash shiig aneasa pujut sujusta.
9 Mina tudaug aina duka kajimatkita,
nuniakum mina pegkegchaug aina nunú
ashí esaktujata.
10 Apajuíyah, mina anentaijush tudaugtuchu yamajam etugtita,
dutikakum pegkeg anentaimat
ima aminak umigtamain sujusta.
11 Tikima ajapjutak ajapjuawaipa,
tuja amina Wakanim Pegkegma dusha jujutkipa.
12 Tuja ame uwemtikagtujamin shiig aneamu
ajutkagtuwama nunú ataktu sujusta,
nuniakum amina Wakanim wait anenkagtina nujai
kuitamjukta.
13 Dutijuawamin aents amina chichamjumin umitan
dakitin aina nuna jintintuatjai,
amina nemagtamkatnume tusan.
Dutika ai aents tudau aidaush dita tudaujin idaisag
ima aminak umigtamkatnume.
14 Apajuíyah, ametme mina uwemtijinmek,
tuja wi pegkegchaun takamsauwaitag duwi
maatnume tusamek idaitusaipa.
Wisha ame wait anenkagtutaigmea nuna
pachisan etsegkun shiig aneasan
kantamtain senchi kantamjuatjame.
15 Apuh, minash kantamati tujutta,
wisha kantamtain amina kantamjuatjame.
16 Tuja uwija maan nuna nejen ashí apeakun,
nuigtu anentag aidaun amaakun
amina ememattag takunush
dutikmainchau dekapeajai,
wagki duka aminak shiig awajtamchau asamtai.
17 Apajuíyah, amek aents wika tudauwapitja tusa
anentaimak waitia nunú shiig anentame.
Tuja aents wika tudauwapitja tusa
awake anentaimag tsagkugtugta tusa
segapakuig, yaitskek idaichauwaitme.
18 Apuh, wait aneasam
Isarael aents aina nunú
wait anenjam kuitamkata.
Dutikakum Jerusalén peejamu tsaikbauwa nuna
ataktu peejatnume tusam yaigta.
19 Dutikawamin kuntinu maawag
nuna nejen ashí apeawagtata
nunú shiig awajtamkattawai.
Nuadui amina emematjamainak
toro tsakat aidaun maawag apeawagtinai.