1 Israel aents aidau anentaimtaji pegkeg aidaunak

Apajuí shiig kuitamui.

2 Namput wajaschabiajai iyautnak,

jukea akunuk iyagtinuyajai.

3 Aents Apajuín umigchau aidau wiakchamenakui,

nuna diisan kajebiajai.

4 Ditak jamamtuchu batsatu asag

jakachainjash tusagkesh puyatuinatsui.

5 Dita utugchatjig atsujuinawai,

nuadui tikich aidau waituina imanikag

waituinatsui.

6 Nuadui ditak nugkutai pegkeg najanamu

nugkumaina numamtuk,

dita emematin nugkuaju ainawai.

Tuja ditak magkagtutaijinak,

jáanchjai betek nugkuaju ainawai.

7 Duwegmatnak duwejam ainawai,

tujash dita yapinig wainnawai

anentai shiig pegkegchau aina duka.

8 Ememainak tikich aents aidaunash

dushikinawai, nuninak

makichkish datsaamtsuk,

ii wakegakuik pegkegchau takamsattaji

tusag awanmainawai.

9 Nuninak Apajuínash pegkegchaun chichajuinawai,

tuja aents aidaunash dutiksag pegkegchaun chichajuinawai.

10 Nuna aents yujajus iniinak

yajau chichainatsui tusag

shiig antuju yujaush ainawai.

11 Nuninak: “¿Apajuísh wajuk dekatki iina pujutjinash?

Tuja Apajuí nayaimpinum puja aniaush

aents takainamunash

¿wajuk dekamainaita?” tuinawai.

12 ¡Diisjua aents pegkegchau aina nunú!

Ditak utugchatji atsau,

shiig pujusag wiakuch wenawai.

13 ¡Wi pegkegchau takatan

ashí idaisauwaitag duka minak

makichkish pegkegnumak yaintsui!

14 Minak wa wamak utugchatan itagtuinawai,

tuja kashi kashikmasan suwimkanak igkuajai.

15 Tuja wisha dita anentaimaina nujai betek anentaimkunuk,

amina aentsjum aina nunak kajimatki idaikunus,

wi wakegamun takasu aintagtai.

16 Tuja ibau tudaugtin aidaush,

¿wajukag wiakchash wenawa? tusa

anentaimsan ejetakamanush

ejemainchau dekapjabiajai.

17 Nuni pujaun Apajuí jee pegkegma nuwi

niijai chichastasan waya ai,

aents pegkegchau aidaush

wajukatnuk ainawa

nuna Apajuí dekamtijuabi.

18 Nunú aents aidauk ishamainnum batsasume,

dutikamu asag dita megkaejatnunum shimawai.

19 ¡Nunú aidauk pachiachbau

shiig wamak ijina utsam agtatui!

¡Ditak sapijai jinawagtinai!

20 Tuke Pujuuwah, aents kanag tepau nantak

nii kajamjamujin kajimatama numamtuk,

ame nantakum aents pegkegchau aidau

ditash ima pegkeg ainawa tumain aina duka

emegkagtatme.

21 Wi senchi kajekan pujubiajai,

nuniai mina anentaig dajautibi.

22 Wika aents pegkegchau aina nuna

pujutjin dekajuatasan wakegakun,

kuntin jintiag anentaimchau asa

wajukmaina numamtuk wajabiajai.

23 Nuniayatkun amejaig tuke pujubiajai,

nuniau asamtai tudaunum iyawai tusam

egkegsam awekatmayume.

24 Umigtukti tujutu asam

ame chichagtukmayume,

nuadui wi jakamtaish,

eme anenjusam jujuktinaitme.

25 ¿Amina nagkaetamsaush tikichish

nayaimpinmash ya pujawa? Duka atsawai,

ima ameketme.

Amejai pujaknuk juju nugkanmaya aidaunak

makichkish wakejumaitsujai.

26 Mina pujutjua duka nagkankattawai,

tujash Apajuíya nunú

pujut tuke atinun sujustatui,

tuja nii mina anentaijuish ichichtawai.

27 Aents amina nemagtamtan dakitauk, jinawagtinai;

tuja ima aminig kajinas

anentaimainachushkam ijinatnaitme.

28 Untsu wika ima Apajuíyaig

anentaimsan pujustinaitjai,

nunú minak shiig awajtawai.

Ametme Tuke Pujuu Apajuí, mina ayamjutkatnumek.

Nuadui ashí ame dutikamu aina nunak etsegkattajai.