5
Uwig
1 Wainkabiajai ekeemtainum eketa nunú, uwejí untsujin makichik rollo*“Rollo” tawa juka, uwijá duwapé, chivo duwapé, asno duwapé aina jui agagbau pempeagbau aajakua nuna tawai. mai yantamejai agagbau, sieteya imania achiamun takus ekeemtatman. 2 Nuigtú wainkabiajai makichik ángel senchigtin senchi untsumak: “¿Yaita dekas imanush, ju rollo achigbauwa juna kuwajug atimainush?” tusa iniimtatman. 3 Tujash nayaimpinmayagkesh, nugkayagkesh, nugká initkeniagkesh nuna rollo atijá nui agagbauwa nuna diimainuk makichkish atsusmayi. 4 Nuniakui wika senchi buutmaijai, wagki rollo atimainuk, nuna diisá augmainkesh atsusú asamtai. 5 Nuniai anciano aina nuiya makichik chichagtak: “Buutipa, Judá weantua nuna Leogji, David weantua nu depetmake, nuniku asa niiyai rollo sieteya imania achigbauwa nuna ukuitug ujamainuk”, tujutmayi.
6 Takui diikman, ekeemtai ejapen cuatro iwaaku aidau, nuigtú anciano aidau ejapeam makichik Uwig maamu aajakua numamtin wajattaman wainkabiajai; ajibi siete kachují aidau, nuigtú siete jii aidau, nunú aina duka siete Wakan aidau Apajuinu ashí nugkanum ishiakbau aina nuna iwainawai. 7 Nuniai, ekeemtainum uwejí untsujiin rollo takus eketa nuna Uwig jegantun jujukmayi. 8 Nuna rollo jukimtai, cuatro iwaaku aina nunú, nuigtú veinticuatro anciano aina nujai Uwijá eemtin tikishmajagmayi; ashí nunú aidauk arpa nuigtú copa oro aidaunum incienso aimjamu aidaun makí makichik takaku agmayi, duka Apajuí aentsji pegkejam aidau Apajuí augbauwa nu agmayi. 9 Nuninak yamajam kantamtain kantamainak:
“Ameketme rollo agagbauwa nu jukim, sello aina dusha atimainmek.
Wagki amek maamu aajakuitme, nunin asam amina numpemin,
Apajuinu atinme tusam sumajatkauwaitme, ashí aents nugkanmaya aidau,
tikich chichaman chichaaku aidau nugka yaignumia nuigtú nugka muun aina nuiyashkam,
10 nuigtushkam ditak rey aidau, sacerdote aidau emakume,
Apajuin takagsatnume tusam,
dutikamu asag nugkanum inamjagtatui”, wajagmayi.
11 Nuna takui diikman, kuashat ángel aidau, nuigtú iwaaku aidau; anciano aidaushkam, nuigtush dekaapatash dekapamainchau aidau ekeemtaiya nuna tenteawag pampainamun antukbaijai, 12 nuniai senchi jiikag chichainak:
“¡Uwig maamu aajakua,
nuuwai dekas wagaaku senchigtinuk, wiyakuch, yacha,
senchigtin, eme anentsá diitai, ememattai, tuke kantamjutai atinuk!” wajagmayi.
13 Nuigtú ashí najankamu nayaimpinum, awa nunú, nugkanmaya, nuigtú nugká initkenia aidaush, nayantsanmayashkam, ashí wají aidau nui aina dushakam, senchi chichakag:
“¡Ekeemtainum eketa anú, Uwigjai
kantamjuinaku, eme anentsá ememattai
senchigtina ibau asamtai ajumaish tuke ememattai atin atí!”, awajuidaun antukbaijai.
14 Imatjiagtai cuatro iwaaku aina nu senchi aiká: “Aatus atí”, tiagmayi; nuniaig anciano aidaushkam tikishmatug, emematiagmayi ajumaish tuke pujutna nuna.
*5:1 “Rollo” tawa juka, uwijá duwapé, chivo duwapé, asno duwapé aina jui agagbau pempeagbau aajakua nuna tawai.