18
Babilonia tsaikbau
1 Juna wainkan, tikich ángel senchigtin, niina tsaaptinjinig nugkanak tsawan awajus nayaimpinmaya akaegun wainkabiajai. 2 Nuniak shiig senchi untsumak:
“¡Tsainkae, tsainkae yaakat Babilonia muunta duka!
¡Yamaik wakan pegkegchau aina nuna batsamtai,
nuigtú chigki tsumain dakittsá diitai aidau batsamtai wajasé!
3 Wagki ashí nugkanmaya aidauk vino nuwa pegkegchau takaamua nunak uwajaje;
nuigtush rey nugkanmaya aidaush nu nuwajai takanisaje,
wají sujin nugkanmaya aidaushkam nunú nuwa senchi wakejamujiya nuna
suwinak wiyakchameawaje”, timayi.
4 Nuigtú tikichin nayaimpinmaya chichaamun antukbaijai, nuniak:
“Mina aentsug aidautigmek, aanú yaaktanum pujutsuk jiinjatajum,
dita tudau takaina nu takaakjum,
jata ditan ishamain minittata nunú atumesh jukijum;
5 ditá tudaujig nayaimpinak antigke imaniku asamtai,
Apajuí ditá pegkegchaujin suwimkan susagtatui.
6 Aanú nuwa tikichin pegkegchau awajkauwa dutiksagmek,
niishkam pegkegchau awajkatajum.
Nuigtush ni pegkegchau takasbaujiya nuna nagkaesau waitkastajum;
ni copanum tikich uwagtinun pachimjug umijuk amujakua nuanuig, nigka aan nagkaemasjum senchi pachimjugtajum.
7 Dutikakjum ni ememas shiig aneas pujusua dutiksagmek,
ni senchi waitiak buuttinjiya dushakam susatajum, wagki ni anentaimsag:
Wika juig reinajai betek wajasan eketjai,
nuigtush wajechuitjai, nunin asan tuke waittsashtinaitjai tawai;
8 tau asamtai makichik tsawanta duik ni ashí waitiamujig ajittawai:
Jaamuji, buutbauji, yapajamuji, inagnamunum jiinum apeam atatui;
wagki Apu Apajuí ashí senchigtina ibau asa,
niina suwimkan suwak dutikattawai”.
9 Nugkanmaya rey aidau nunú nuwajai takanisaju aidauk, niijai wakegamun pujusaju asag buutiagtinai, nuninak senchi niina anentaimtusag waitiagtinai, esaak bukuitaun wainaidau asag; 10 imanik waittai ishamainak ikaag ijunas:
“¡Wait anentajame, wait anentajame Babilonia ame yaakat muun senchigtin aajakuitkum,
makichik horaya duik suwimak juamu ajutjamsa dui!”, awajiagmayi.
11 Wají sujin nugkanmaya aidaush buutiagtinai, nuninak nuwa nuna anentaimtuinak waitiagtinai, wagki ditá wajiiji sumagmainuk makichkish atsusú asamtai; 12 wají sujutaiji aidauk oro, jiju plata tutai, kaya pegkeg aidau, perla aidau, lino dekas pegkeg, jaanch yamakaitkau, seda, jaanch kapantaku aidau, ashí numi kugkuin aidau, ashí wají elefante naijai najanamun, ashí wají numi pegkeg aidaujai najankamu, cobre, hierro, nuigtú mármol; 13 nuigtú canela, kugkuin aidau, incienso, mirra, olíbano, vino, aceite, harina dekas pegkeg aidau, trigo, bestia aidau, uwig aidau, caballo carro japitai aidau, nuigtú inatai aidau, aents aidaushkam, aajakajui. 14 Nunin asamtai yaaktan chichajuinak:
“¡Ame wají shiig wakejin aayum duka,
yamaik atsugtamsae!
Ashí wajiijum shiig pegkeg aidau ajutjamajakua duka
tuke igkugchatnaitme”, awajiagmayi.
15 Nunú wajiin sujin aidauk, nuna suinak wiyakuch waigkú aina duka, nunú imanik waitiamun wainkag ishamainak ikaa ijuntsagtinai, nunik anentain idajuk buutuinak:
16 “¡Wait anentajai, wait anentajai yaakat muunta nunak!
jaanch lino najanamun,
jaanch kapantu nentetkaun nugkug,
oro, perla, kaya pegkeg aina ibaujai iwagmamnuwe nuna,
17 ¡wagki makichik horaya duik ibau wiakchameamujiya duka esagkae!” tiagmayi.
Nuigtushkam ashí lanchá anuntin aidau, nui chimpimag yujau aidau, nui takau aidaush, ashí aents nayantsanum takau aina nujai ikaa ijuntsagmayi. 18 Nunikag esaku bukuitamujin wainkag senchi untsumkag: “¿Tikich yaakat jujú yaakat muunta ibagjai betekmamtinuk atsawapita?”, wajagmayi. 19 Tusag wake besemag dekapenak nugka yukuukuntun jukiag, buuken yukuajag senchi untsumak buutuinak:
“¡Wait anentajai, wait anentajai yaakat muunta nuna!
Ashí lanchagtin aidautinak nigki wiyakuch etamiajuitak makichik horaya duik esaké”, wajagmayi.
20 “Nayaim batsatutigmesh, Apajuí aentsji pegkejam aidautijum,
apóstol aidautigmesh,
nuigtú profeta aidautigmeshkam ju nuwa imania jujú diisjum shiig aneastajum.
Wagki Apajuí atumin iikmatjamak suwimkan suwak imatikau asamtai”, timayi.
21 Nuna timatai, makichik ángel senchigtin, kaya deketai muunta numamtinun jukibi, dutika nayants ajugmayi, nuniak:
“Jujai betekak yaakat Babilonia muunta aushkam ajapeam atatui,
nunikmataig ajumaish wainkashtin ainawai.
22 Dutikamu asamin, aminiya arpa awatbauk,
pigkui umpuamush, trompeta umpuin aidau umpuamush, aents nui pujus takaush,
yutain dekedaukesh tuke antuekashtinai.
23 Nuigtush aminiya lámpara ekemamukesh wainnakchatnai tuja,
nuweniagtai fiestamainak pampainamukesh tuke antuekashtinai,
wagki amina wajiigmin sujutjamajakua duka,
nugkanmag dita wagaku aajakajui,
amina tunchigminig ashí nugkanmaya aents aidauk tsanujakuitme.
24 Nuigtush niiní profeta aina nuna numpe nuigtú,
aents pegkejam aidaun numpe wainnakui,
nuigtú ashí aents Apajuí umijin aidaun nugkanum maawajua nudaushkam”, timayi.