Rut
1
Elimélec niina patayi aidaujai Moab nugkanum pujustatus shiyakagbau
1-2 Israel aents aidaunmak eke apu adaijachbau asamtai, ayatak makichik aents Apajuí etegkamu ayamjukam batsamajaku aina, nunú tsawantin ditá nugken ashí nujan tepeauwai. Nunikmatai makichik aents Elimélec daagtin, Judá nugken yaakat Belégnum pujau, Moab nugkanum ujumak tsawan pujustatus weuwai. Nunik wegak niina nuwe Noemí* “Noemí” tawa duka hebreo chichamnumak “yajauwajah” taku tawai. nuigtu niina uchiji jimag: Mahlón, Quilión aatus juki weuwai. Dita aidauk Belégkanmaya ainayatak, Belégkan tikich daaji Efrata “Efrata” tawa duka yaakat Belégkan tikich daaji aajakui. tutai asamtai, Efrata aents tutai aajaku ainawai. Nunik shiyakag Moab nugkanum jegawag nuwi batsamsajui.
Nuwi batsatai Noemí aishi Elimélec jakauwai. Nunikmatai niina uchiji jimag aajakua nujai Noemí juwakui.
Nunik batsamas nunú uchi aidauk Moabnumia nuwa aidaujai mai nuwenawajui. Nunú nuwa aidaun daajig Orfa, Rut aatus aajakui. Nunik nuwenawag diez mijan tumain batsamas ditashkam mai jakauwai. Nunik uchiji jinaamtai, Noemík uchigtuchu, nuigtush aishinchau nigkiuch juwakui.
Noemí Rutjai Belén wakitkimu
Nunik pujus Tuke Pujuu niina aentsji Israel aents aidaunak wait anenjae, dutikau asamtai, ajak ajakmamuji aidauk shiig tsapai kuashat nejenawai. Nuadui yamaik nujantaik waituinatsui tabaun Noemí Moab nugkanum pujus dekauwai. Nunik dekaa Judá nugkanum waketak, niina uchiji nuwe aajaku aidaujai uminas jiinkiuwai. Nunik jintá wesag Noemí ditan chichajak:
“Atumi duku pujamunum wakitkitajum, atum mina, tuja mina uchig aidaujai shiig kuitamkagtukuitjum dutiksag atumnash Tuke Pujuu kuitamjamkatnume. Tuja nuigtush ataktu aishinawag shiig batsamsatnume tusa yaimpaktinme”, tiuwai.
Aatus tusa yapinum kugkuasui kumpama ishiaktatus. Dutikam dita buutuidau. 10 Nuninak:
“¡Atsa wakitkishtatji! ¡Iik amejai amina nugkemin minittaji!” tuidau.
11 Tusa tiagtai Noemí ditan ataktu chichajak:
“¡Nawantug aidauh, tutsuk shiyaktajum! ¿Wagka wijaish wetag tajume? wika muumpakiu asan, atum aishinmainnak uchi aishmagnak nuigtuk uchigmamaitsujai. 12-13 Tutsuk atumi jemin waketjatajum. Wika shiig múuntuch wajasjai, ataktuk aishinmaitsujai. Tuja yamai kashia duik aishinan uchi aishmagkun uchigmakaintagtaih, ¡nunikmataish atumek tsakagmatai, aishinatjai tusa dakakjumek pujumaitsugme! ¡Nunú tsakagti tusajum dakakjumek, aishintsuk jamain ainagme! Nawantug aidauh, atumek wijaig pujumaitsugme. Minak Tuke Pujuu waittsati tusa tujutmatai waitiag, nuna nagkaesau atum waitiamun diisan atumin wait anentakun waitmainaitjai”, tiuwai.
14 Tusa tutai ataktushkam buutuidau. Tusa jimajá timatai, Orfak niina tsatsajin kumpama kugkuas ukuak wakitkiuwai. Untsu Rutak tsatsajijai juwakui. 15 Nunik juwakmatai Noemí niina chichajak:
“Antukta nijah, amina wajegmi nuwe niina nugken, niina apajuímtaiji ayá nuwi waketui. Nuniau asamtai, ¡ameshkam niijai wetá!” tiuwai.
16 Tusa tama Rut ayaak:
“¡Ukugkita tusamek tujutipa!
Ame tuwi wetatme nuwi wishakam minittajai.
Tuja ame tuwi pujuttame,
nuwi wishakam amejai pujuttajai.
Ame wegantu aina duka
wi wegantu agtatui.
Tuja amina Apajuígmeshkam
mina Apajuíg atatui.
17 Ame tuwi jakatnaitme
nuwig wisha jakatnaitjai,
nunika ai nuwig ukugsagtin atinme tajai.
¡Jaka megkaechayatkun,
wi amina ukuakun yaja wetaik,
Tuke Pujuu suwimkan
sujustin ati tajai!” tiuwai.
18 Tusa imattai, Noemí anentaimas, dekas mina uyuuntus wekaesatasampap tawa tusa ataktu awagkig wakitkita tusag tichauwai.
19 Nunik mai juwakag we wenakua Belén jegawajui. Nunik jegawagmatai aents aidauk senchi pampaidau shiig aneenak. Imatiagtai nuwa aidauk: “¡Noemí tae, Noemí tae!” wajaidau.
20 Tusa imatiagtai Noemí ditan chichajak: “¡Noemí tujutigpajum, Mará “Mará” tawa duka hebreo chichamnumak “yapau” taku tawai. tujuttajum! Wagki, minak Tuke Pujuu ashí senchigtina nunú kajegtuk waittsati tujutmatai waittsajai. 21 Wi juwi pujaun weuwaitag nunak kuashat yajumakan wegabiajai. Tujash yamaik wainkan uwegmatak wakitkijai, wagki Tuke Pujuu aatus wakekau asamtai. Nuadui minak Noemí tujutigpa, wagki Tuke Pujuu ashí senchigtina nunú minak waittsati tujutmatai waittsajai”, tiuwai.
22 Aatus Noemí Moab nugkanum pujau, Rut niina uchiji nuwe Moabnumia aentsu nawanji aajakua nujai wakitki, cebada ajakbau juutai tsawan jegamunum, Belén jegauwai.

*1:1-2 “Noemí” tawa duka hebreo chichamnumak “yajauwajah” taku tawai.

1:1-2 “Efrata” tawa duka yaakat Belégkan tikich daaji aajakui.

1:20 “Mará” tawa duka hebreo chichamnumak “yapau” taku tawai.