19
E'chk ca'wl tan xansal tib jun wunak, nin tan jale'n jun cyajtza'kl yi jicyuch te'j
1 Ej nin tzun jilon tzaj junt tir Kataj tetz Moisés itzun saj tloltz:
2 “Alaj yi xtxolbile'j scyetz yi e' atanum Israel: Nque'nwok tetz jun jilwutz wunak yi xansa'nt, na yi in wetz yi iRyosil, chin xan nin in, nin chin tz'aknak cunin in.*Lv 11:44-45; Mt 5:48; 1 P 1:16.
3 ”Ak'wok len k'ej itaj itxu'.†Ex 20:12; Dt 5:16.
”Ncha'tz banwok tane'n e'chk k'ej tetz ujle'n yi txumijt wa'n.‡Ex 20:8; Dt 5:12. Na yi in wetz in iRyosil, yi na chincawun tzite'j.
4 ”Quil tzilok'wok wutz junt ryos,§Lv 26:1. nin quil tziban junt ryos yi ch'ich' cu'n.*Ex 20:23; 34:17; Dt 17:25. Na yi in wetz in iRyosil, yi na chincawun tzite'j.
5 ”Yil cxopon tan toye'n yi oy yi na ẍchaj yi ja jal tzatzin paz skaxo'l, oyinwok sk'il cu'n, nin banwok yi e'chk xtxolbil yi na chintzatzin te'j. 6 Yi itawun yil tzitoy, tajwe'n tan baje'n ita'n te ite'n nin k'eja'tz, nin ncha'tz ba'n lbaj le ca'pi'n k'ej, poro yi sowril yil cyaj tetz yi toxi'n k'ej, tajwe'n tan pat-xe'n. 7 Yi kol je' bajsa'n yi jun oya'tz le toxi'n k'ej, qui'c xac sbne' tzinwutz, nin quil chintzatzin te'j. 8 Alchok scyetz yil bajse'n, sjalok til, nin stz'elk cu'n swutz, tampaj yi ja po'tzaj yi oy yi wi'nin k'ej tzinwutz.
9 ”Yil tz'opon k'ejlal yil je' yi icosech, quil tzisicy'e'n yi e'chk tal bakaj yi na cyaj cyen tx'akxuj, nin quil cxo'c tan xtxoye'n txo'lak yi stz'isil yi ja el quen. 10 Ncha'tz quil cxo'c tan xtxoye'n wutz yi uva, nin quil tzisicy'e'n yi e'chk wutz yi na cyaj cyen tx'akxuj, cyajk tu'tz ita'n scyetz yi e' tal prow me'ba', nin scyetz yi e' awer nak. Na yi in wetz in iRyosil, yi na chincawun tzite'j.†Lv 23:22; Dt 24:19-22.
11 ”Quil cxalk'ij.‡Ex 20:7; Dt 5:19. Ncha'tz quil tzijal jun wi itak', nin quil tzijop iwutz tzitibil itib.§Ex 20:16; Dt 5:20.
12 ”Quil tzisuk jun iyol tan imbi', yi quil cxe'l cu'n te'j,*Ex 20:7; Dt 5:11; Mt 5:33. na ko ya'tz tziban na tzun elpont-tz yi na cxtzan tan telse'n ink'ej. Na yi in wetz in Jehová iRyosil, yi na chincawun tzite'j.
13 ”Quil cxo'cwok tan oyintzi' tu junt, nin quil tzimajlen yi e'chk takle'n yi at tuch'. Nin chojwok chik'ej yi e' imos te ite'n nin k'eja'tz. Quil tzich'iw junt k'ej tan chichojle'n.†Dt 24:14-15.
14 ”Quil cxo'c tan xbajtzije'n jun chcan wi'.
”Quil tzitak'wok cu'n e'chk takle'n le chibe' yi e' moyi'ẍ tan chije'n trimp te'j.‡Dt 27:18. Ma na chajwok ic'ulutxumil tzinwutz. Na yi in wetz in Jehová iRyosil, yi na chincawun tzite'j.
15 ”Yil cxo'c tan pujle'n xtisya', quil tzitak'e'n ik'ab twi' jun. Quil xom iwi' tan colche'n jun prow me'ba', yi ko i' nin aj paj, nin quil xom iwi' tan colche'n jun ric, yi ko i' nin aj paj. Nicy'nin tu' tzitulej ca'wbe'n cyetz alchok jilwutz wunak.§Ex 23:6-8; Dt 16:19.
16 ”Quil cxo'c wok tan ẍchaq'ue'n yol ẍchixo'l yi e' itanum.
”Quil cxo'cwok tan biyle'n cu'n junt iwunakil. Na yi in wetz in Jehová iRyosil, yi na chincawun tzite'j.
17 ”Quil tzitawaj chi'ch c'u'lal tetz italma', te jun ititz'un, nka te jun itzicy.
”Ej nin ko na itil yi tajwe'n tan makle'n wutz jun iwisin, ba'n tzimak wutz.*Mt 18:15. Quil cxom te yi tetz tajtza'kl, ko na tzan tan juchle'n til.
18 ”Quil tziticy'se' ic'u'l tzitibil itib, nin quil tzitawaj chi'ch c'u'lal scye'j yi e' itanum. Lok'wok chiwutz iwisin, na ni'cu'n axwok scyuch'.†Mt 5:43; 19:19; 22:39; Mc 12:31, 33; Lc 10:27; Ro 13:9; Gl 5:14; Stg 2:8. Na yi in wetz in Jehová iRyosil, yi na chincawun tzite'j.
19 ”Banwok tane'n yi e'chk inca'wl.
”Quil tzitak' ama'l tan chisakche'n yi itawun tu junt jilwutz txuc.
”Quil tziyuj cu'n junt jilwutz ij txo'l yi ij yi na itaw wok swutz itx'otx'.
”Quil tz'oc jun be'ch itetz tzite'j, ko banij tane'n tan cobox jilwutz nok'.‡Dt 22:9-11.
20 ”Yi ko at jun lwitbej tib tu jun xun esclaw yi i'tz tetz junt yaj, nin txe'n lok'xij yi jun xuna'tz tan tele'n liwr, yi juna'tz yi nwitbej tib tuch', tajwe'n tan ẍchojol yi paltil. Poro nk'e'tz sotzel chiwutz sbne', na yi jun xuna'tz atite't jak' cawl yi patrón. 21 Nin yi juna'tz yi nwitbej tib tu yi xun yi esclaw, tajwe'n tan toyil jun cne'r tzinwutz tan jale'n cuybil paj, nin tajwe'n tan bene'n tcy'al kale atit puertil yi mantial tetz molbil ibaj. 22 Nin tan yi jun cne'ra'tz, tajwe'n tan jakol yi pale' cuybil paj yi jun yaja'tz swetz, nin tzincuye' paj.
23 ”Yil tzicambaj yi ama'l yi suki'nt wa'n tzitetz, yi na bi'aj Canaán, nin yil tzitawaj e'chk tze' yi na tak' lo'bajil, qui'c cuj tan cwe'n tzaj yi wutz ita'n, nin qui'c cuj tan baje'n yi wutz ita'n tetz ox yob. 24 Ma le cyaji'n yob, tircu'n yi wutz yi e'chk tze'a'tz, xansok tzinwutz, nin tircu'n wunak ẍchimole' quib tan xanse'n yi e'chk lo'baj. 25 Ma le o'i'n yob, ba'n tzun baj wutz yi e'chk tze'a'tz ita'n. Nin tan yi xtxolbila'tz yi tze' wi'nin wutz sbne' opon tunintz. Na yi in wetz in iRyosil, yi na chincawun tzite'j.
26 ”Quil tzibajsaj jun takle'n yi at ẍch'el.§Gn 9:4; Lv 7:26-27; 17:10-14; Dt 12:16, 23; 15:23.
”Quil cxo'cwok tan wutz mesi'n, nin quil tzijoy puntil tan tilwe'n yi mbi sbajok ek ca'p.*Dt 18:10.
27 ”Quil tz'el xi'il iwi' ita'n yi junit setej sban, nin quil tz'el ju' ixmatzi' ita'n.
28 ”Quil tziq'uixpuj iwankil tampaj tu' yi na quim jun. Nin quil tz'oc jun itechl ita'n te iwankil.†Lv 21:5; Dt 14:1. Na yi in wetz in Jehová iRyosil, yi na chincawun tzite'j.
29 ”Quil tzitelsaj k'ej ime'l, tan tu' yil tz'oc ita'n tetz jun wi'tz aj bnol tetz.‡Dt 23:17. Quil tzipo'tzaj itanum tan e'chk ajtza'kl yi chin xa'bil nin.
30 ”Banwok tane'n e'chk k'ej tetz ujle'n yi bixba'nt wa'n. Ak'wok k'ej yi mantial tetz molbil ibaj kale najlchine't. Na yi in wetz in iRyosil, yi na chincawun tzite'j.§Lv 26:2.
31 ”Quil tzijak itajtza'kl scyetz yi e' alma', nin scyetz yi e' aj wutz mes.*Dt 18:11; 1S 28:3; 2R 23:4; Is 8:19. Quil tzijuch itil tan yi e'chk takle'na'tz. Na yi in wetz in iRyosil, yi na chincawun tzite'j.
32 ”Ak'wok chik'ej yi e' yi ja tijin chic'u'l, ba'n cxcye'e'n wok ẍchiwutz tan tak'le'n chik'ej. Chajwok ic'ulutxumil, tan imbi'. Na yi in wetz in Jehová iRyosil, yi na chincawun tzite'j.
33 ”Quil che' ibuch yi e' awer nak yi najlche' tzixo'lwok. 34 Chajwok lok' ib scyetz chi na ilok' itib itetz tzitibil itib. Lok'wok chiwutz, na ni' cu'n axwok scyuch', na ncha'tz ax itetz, ax awer nak banak Egipto.†Ex 22:21; Dt 24:17-18; 27:19. Banwok tane'n, na yi in wetz in iRyosil, yi na chincawun tzite'j.
35 ”Quil tziban tramp, te alchok jilwutz ma'lbil. 36 Tajwe'n xcon e'chk ma'lbil ita'n yi tz'aknak cu'n yi talal.‡Dt 25:13-16; Pr 20:10; Ez 45:10; Am 8:5; Miq 6:11. Na in iRyosil, yi ncxe'lsan tzaj Egipto.
37 ”Ma jalu', banwok bin tane'n e'chk inca'wl, tu e'chk ley yi bixba'nt wa'n. Xomenwok te'j. Na yi in wetz in Jehová iRyosil, yi na chincawun tzite'j.”
*19:2 Lv 11:44-45; Mt 5:48; 1 P 1:16.
†19:3 Ex 20:12; Dt 5:16.
‡19:3 Ex 20:8; Dt 5:12.
§19:4 Lv 26:1.
*19:4 Ex 20:23; 34:17; Dt 17:25.
†19:10 Lv 23:22; Dt 24:19-22.
‡19:11 Ex 20:7; Dt 5:19.
§19:11 Ex 20:16; Dt 5:20.
*19:12 Ex 20:7; Dt 5:11; Mt 5:33.
†19:13 Dt 24:14-15.
‡19:14 Dt 27:18.
§19:15 Ex 23:6-8; Dt 16:19.
*19:17 Mt 18:15.
†19:18 Mt 5:43; 19:19; 22:39; Mc 12:31, 33; Lc 10:27; Ro 13:9; Gl 5:14; Stg 2:8.
‡19:19 Dt 22:9-11.
§19:26 Gn 9:4; Lv 7:26-27; 17:10-14; Dt 12:16, 23; 15:23.
*19:26 Dt 18:10.
†19:28 Lv 21:5; Dt 14:1.
‡19:29 Dt 23:17.
§19:30 Lv 26:2.
*19:31 Dt 18:11; 1S 28:3; 2R 23:4; Is 8:19.
†19:34 Ex 22:21; Dt 24:17-18; 27:19.
‡19:36 Dt 25:13-16; Pr 20:10; Ez 45:10; Am 8:5; Miq 6:11.