1 Cyakil nin k'ej swak'e' ink'ajsbil tetz Kataj.

Quil chink'e'xij tan tak'le'n ink'ajsbil tetz.

2 Nternin na chintzatzin te i'.

Bitwok tzaj bin inyol cyakil axwok yi axwok c'ulutxum, nink cxtzatzinwok te'j.

3 Junit bin kaban tan tak'le'n k'ej i'.

4 Ja cu' inwutz tetz Wajcaw nin ja tbit i' yi intzi' inkul.

Nin ja chin col i' tk'ab yi e'chk takle'n yi nchinxob tetz.

5 Na cyakil yi e' yi ajlij chic'u'l te Kataj, ẍchitzatzink cyera'tz.

Ej nin quil tz'el chitx'ix.

6 Na yi in wetz, buchij chin.

Poro ja cu' inwutz swutz i', nin ja tbit i' intzi' inkul.

Nin ja chinẍch'eyaj tk'ab sotzaj c'u'lal.

7 Na na oc yi tetz ángel tan quich'eye'n nin tan chicolche'n yi e' yi na cyak' k'ej i'.

8 Chipile'u' bin, nin squile'u' yi chumbalaj nin yi Kataj.

Ba'n cyeri yi e' yi cho'n k'uklij chic'u'l te i'.

9 Cyeke'u' ẍchi' i', yi e'u' yi cyak'o'nt quibu' tan chixcone'nu' tetz.

Na na tak' i' cyakil yi tajwe'n scyetz yi e' yi na cho'c c'ulutxum jak' ca'wl i'.

10 Yi e' ric na cho'c cyetz tetz me'ba', nin na chitij we'j.

Poro yi e' yi cho'n k'uklij chic'u'l te Kataj, quil chitij cyera'tz we'j, na stk'e' i' yi tajwe'n scyetz.

11 Axwok witz'un or itetz. Bitwok tzaj

nin tzintxole' yi ẍe'n na ban tak'le'n k'ej Kataj:

12 ¿Na pe' itaj ben ẍkon mu'ẍt itiemp?

¿Na pe' itaj cxtzatzinwok coboxt k'ej tzone'j wuxtx'otx'?

13 Makwok bin itzi' te e'chk cachi' yol.

Nin quil tzijal cu'n jun wi itak' scyetz alchok wunakil.

14 Jatxwok len itib te e'chk takle'n cachi'.

Nin banwok tane'n yi e'chk takle'n balaj.

Joywok puntil tan qui jale'n oyintzi' stzixo'lwok.

Nin ilenin banwok tane'n.

15 List atit Kataj tan quich'eye'n yi e' balaj nak.

Nin na tbit i', yi na cu' chitzi' tetz.

16 Ma na contr i' scye'j yi e' yi na chiban yi e'chk takle'n cachi'.

Na chisotz ta'n, nin junawes na che'l te kac'u'l.

17 Poro na tbit Kataj yi na cu' chitzi' yi e' balaj nak tetz i'.

Nin na che' ẍch'eyaj tk'ab e'chk takle'n yi na ul ẍchiwutz.

18 List atit Ryos tan quich'eye'n yi e' yi ate' tul bis, yi e' yi qui't na pujx cya'n yi ẍe'n chiban.

19 At wi'nin pilbil tetz jun balaj nak.

Poro at nin Kataj tan ẍch'eye'n.

20 At i' tan q'uicy'le'n.

Nin qui'c nin jun bakil yi wankil yi nink je' wak'u'n.*Jn 19:36.

21 Ma yi e' mal nak,

ẍchiquimok cyera'tz tan ẍchojle'n yi cyetz quil.

Nin yi e' yi na chi'ch chic'u'l scye'j yi e' balaj nak,

ẍchicawsok cyera'tz tan Ryos.

22 Poro yi o' ketz yi o' ẍchakum, kol kopon swutz i' tan kacolol kib, tz'ocopon tan kacolche'n.