1 Cho'n na cu' inwutz tetz Ryos.

Nin na chinẍch'in, tan tbital i' yi intzi' inkul.

2 Na te yi na chimbisun, na no'c tan joyle'n i'.

Nin cyakil ak'bal na je' ink'ab tan nachle'n i'.

Na qui na jal tzatzin wa'n.

3 Yi na no'c tan xtxumle'n Ryos, at na ban cu'nt na nok' nin na chimbisun, tan paj i cu'n qui xomij i' swe'j.

4 Wajcaw, qui na tak'u' ama'l tan inwite'n.

Nin tan paj bis, qui't na jal puntil yol wa'n.

Na ja chin lo'on, na innach.

5 Nk'e'tz cho'n wutane'n chi wutane'n sajle'n.

6 Na yi sajle'n, na wak' ink'ajsbil teru' cyakil ak'bal.

Nin ncha'tz na no'c tan xtxumle'n tinc'u'l cuntu', cyakil yi balajilu'. Nin na waltz:

7 “¿Ja pe' ne'l te c'u'l yi Wajcaw?

¿Ilenin pe' ẍchi'chok c'u'l i' swe'j?

8 ¿Qui pe' tz'el k'ajab i' swe'j?

¿Qui't pe' tz'el k'ab i' te yi yol yi suknak?

9 ¿Qui'ct polo' banl talma' Ryos jalu'?

¿Tan paj yi sajnak colpuj wi' i', qui't polo' tz'el k'ajab te jun wunak?”

10 Poro yi mas ch'on yi na wil i'tz, yi nk'e'tz ni'cu'n tane'n Kataj ske'j chi bank i' sajle'n.

11 Poro tz'ul tx'akx tinc'u'l cyakil e'chk takle'n balaj yi banak yi wi'tz Ajcaw sajle'n.

12 Nin nocopon tan xtxumle'n cyakil yi e'chk balaj milawr yi bnixnak ta'n. Nin tzintxole' cyakil cu'n.

13 Ilu' kaRyosil chin tz'aknak cu'n ilu' te cyakil e'chk takle'n yi na banu'.

Qui'c nin junt ryos yi ni'cu'n porer tu yi teru'.

14 Na yi ilu' teru', wi'nin e'chk balaj milawr na bnix tanu'.

Nin ja ẍchaju' yi poreru' scyetz cyakil jilwutz wunak, bene'n tzi'n wi munt.

15 Na tan yi poreru', ja che'l tzaj tcy'alu' yi teru' tanumu'.

Ja xcye'u' tan chicolpe'n yi e' xonl Jacow tu yi e' xonl Ẍep.

16 Ilu' inRyosil, yi cawune'nu' tan cwe'n cabsal tib yi mar, ja tbit yi yolu', na ja xob teru'.*Ex 14:21-22.

17 Ja cawunu' tan saje'n a'bal, nin ja saj.

Ja jal xlitz' tu k'ancyok bene'n tzi'n, nin ja saj jun chin a'bal tanu'.

18 Ja quibit cyakil wunak bene'n tzi'n yi e'chk k'ancyok yi ncu'.

Ncha'tz chin txekun nin ban bene'n tzi'n tan yi e'chk xlitz'.

Nin tircu'n yi wuxtx'otx', ja yucan tan yi e'chk coblajnob.

19 Ja cu' cabsalu' yi mar, nin ja icy'u' tul.

Poro cya'l jun na jalsan yi tkambe'nu'.

20 Nin yi ilu' teru', ja bajxcu'nu' ẍchiwutz yi teru' tanumu', chi na ban jun pstor ẍchiwutz yi tawun.

Ya'stzun ntuleju' tan Moisés tu Aarón.