1 Wajcaw, ilu' inRyosil.

List wutane'n tan tak'le'n ink'ajsbil teru'.

List tane'n walma' tan tak'le'n k'eju'.

Swak'e' ink'ajsbil teru'.

2 Tetz cu'n walma' swak'e' ink'ajsbil teru' cyakil jalchan. Xconk e'chk kbetz tan tak'le'n k'eju' chi tane'n arpa tu salterio.

3 Tzimbitzij e'chk bitz swutzu' tan tak'le'n k'eju' Wajcaw ẍchiwutz cu'n cyakil wunak. Qui'c na ban alchok jilwutz wunakil.

4 Na yi ilu' teru' Wajcaw wi'nin xtxaxl talma'u' skibaj, na icy'nak cu'n swutz yi tcya'j. Ba'n k'uke' kac'u'l te'ju' na na el k'abu' te yolu'.*Sal 36:5.

5 Ma jalu' ilu' inRyosil yi ilu' teru' wi'nin poreru'. Na ilu' na cawunu' tibaj cyakil e'chk takle'n yi at bene'n tzi'n tcya'j. Nin yi banlu' at bene'n tzi'n wi munt.

6 Ma jalu' bin tbite'u' yi na cu' kawutz teru'.

Sajku' tan kuch'eye'n tan yi teru' poreru'.

Che' cole'u' yi e' yi na pek'u' scye'j.

7 Na je bin yolu'e'j Wajcaw, yi talnaku':

“Tetz cu'n walma' yil no'c tan jatxle'n cu'n yi ama'l Siquem scyetz yi e' intanum.

Ncha'tz lwulej yi ẍk'ajlaj Sucot.

8 Ncha'tz cyakil yi ama'l cwent Galaad tu Manasés, na wetz cu'n tircu'n.

Ma yi ama'l tetz Efraín, ni'cu'n tane'n te'tz chi tane'n jun casco te inwi'.

Ma yi chi'ama'l yi e' aj Judá, cho'n tane'n te'tz chi tane'n jun tx'amij yi tz'amij wa'n.

9 Ma chi'ama'l yi aj Moab, ya'stzun yi ama'l kale na chintx'ajone't, kale na intx'aj wit ink'ab.

Ma yi chi'ama'l yi e' aj Edom, colbil tu' inxajab tera'tz.

Ma yi e' filistey, chinẍch'ink yil chinxcye' scye'j.”

10 Ma jalu' Wajcaw, ¿na' scyetz jun yi sbajxok skawutz tan kaxcyewe'n scye'j yi e' kacontr yi ate' tul jun tnum yi at chin tapij solte'j?

¿Na' scyetz jun yi sbajxok skawutz tan kopone'n tan oyintzi' scye'j e' aj Edom?

11 Cya'l bina'tz, na ja ko' cyaj cyen tilolu'.

Qui't na xomu' ske'j yi na ke'l tan oyintzi'.

12 Poro Ta', ¿qui pe' tz'el k'ajabu' ske'j?

Ko' ẍch'eyaju' ẍchik'ab yi e' kacontr.

Na yi o' ketz qui'c nin ketz kaxac.

13 Poro yi nink xomu' ske'j, jun cu'n skaxcyek scye'j yi e' kacontr, na ilu' tz'ocoponu' tan chixite'n cu'n chicyakil cu'n.