Na Taroha Goro 'Onaai Usua Ana
St. Matiu
Gere Mamaani 'Iniai Bukani
'A 'ua? Tara'i 'oha 'o arungana do'ia God 'a agoheta'i hadahada tarai'o? 'A he'ua i 'iraraa amuai taha na 'ia God 'a rabasia do'oi haua 'anai ha'a-wa'ewa'ea?
Naasi ta'i mareho na 'iraaui saeni Jiu na'i madoraana Jisas rau 'adoma'inia do'a to'iraau. Na'i 'ohasi, 'e hai 'arangi harisi murinai hadahada ana God tanaraau beiai rarabea Malakae. Rau to'oraai Usu-usu Maea ana God beiraau, ma 'e ta'i mareho nagu taritari'a 'inia, rau ai'a raba araisuria. Tabu'a na 'ia God naagu ai'a ha-hadahada tarairaau'a 'inia.
Na'i madoraasi, ni gaumani na'i Rom 'a marungiraaui Jiu mana ano na 'ia God na duruduru tanaraau 'inia. Rau 'adoma'inia do 'iia 'ai ha'ataaria mai ta mwaeraha hehei'oi 'anai ha'a-hura'ahiraau baaniai heimarungi 'anai gaumani anai Rom.
Na'i 'oha na 'ia Jisas 'a boi na'i marewana 'a ha'a-arotaha'i taha na 'iraaui rarabea ra 'unu'i 'abaiai Ha'atahi. Ma'ata rei'uaa na o'asi, 'a rago i saeni Jiu narau ai'a hinihinia do 'iia naasi nai ha'atahiraau. Rau ai'a raba hinihini'i ma'ua araisuri'i taha na 'ia Jisas na maani'i tanaraau.
Tara'i 'oha 'ia God 'a mamarota'i hadahada tanagia na'i 'oha na 'iia 'a bwane 'unu'i tanagiai taha 'anai haa'i ma mamasigaau do gai araisuria. Naasi na'i 'oha na 'oi 'oha'iniai Taroha Goro ana St. Matiu, 'oi rongorongo 'iniai taha na 'ia God nai 'unua tana'o.
1
Mamaani 'Iniai Burungana Jisas Kraest
(Luk 3:23-38)
1 Naani mamaani 'iniai burungana Jisas Kraest na huta mai baaniai burungana Deved mea Ebraham.
2 'Ia Ebraham naasi amana Aisak,
'ia Aisak amana Jekop,
'ia Jekop amana Jiuda miraaui do'orana'i,
3 'ia Jiuda amana Peres mia Sira (inadarua 'ia Tama).
'Ia Peres amana Hesron,
'ia Hesron amana Ram,
4 'ia Ram amana Aminadab,
'ia Aminadab amana Nason,
'ia Nason amana Salmon,
5 'ia Salmon amana Boas ('ia Rehab naasi inana).
'Ia Boas amana Obed (inana 'ia Rut),
'ia Obed amana Jesi,
6 'ia Jesi amana Mwaeraha Deved.
'Ia Deved amana Solomon (inana 'ia Batsiba, nararu ha'iwai ga'u a Uraea).
7 'Ia Solomon amana Rehobom,
'ia Rehobom amana Abaeja,
'ia Abaeja amana 'Asa,
8 'ia 'Asa amana Jehosofat,
'ia Jehosofat amana Joram,
'ia Joram amana Usaea,
9 'ia Usaea amana Jotam,
'ia Jotam amana Ehas,
'ia Ehas amana Hesikaea,
10 'ia Hesikaea amana Manase,
'ia Manase amana Amon,
'ia Amon amana Josaea,
11 'ia Josaea amana Jekonaea miraaui do'orana'i. Rau huta gaarangiai madoraa ra wairaaui Israel 'ari na'i Babilon 'anai ha'i slev 'iniraau.
12 Na'i murinai wairaau ada i Israel 'ari Babilon
'ia Jekonaea amana Saltiel,
'ia Saltiel amana Serababel,
13 'ia Serababel amana Abiud,
'ia Abiud amana Elaeakim,
'ia Elaeakim amana Aso,
14 'ia Aso amana Sadok,
'ia Sadok amana Akim,
'ia Akim amana Eliud,
15 'ia Eliud amana Eleasa,
'ia Eleasa amana Matan,
'ia Matan amana Jekop,
16 'ia Jekop amana Josep, mwane ana Meri. 'Ia Meri inana Jisas nara 'unua 'iniai Ha'atahi.
17 'E ta'i tangahuru mana hai ugui inoni tahamora beia Ebraham tari beia Deved, ma'e ta'i tangahuru mana hai ro'u tahamora beia Deved tari madoraa ra wairaaui Israel 'ari Babilon. Mana tahamora na'i 'ohasi tari 'oha na huta i Ha'atahi 'e ta'i tangahuru mana hai ugui inoni ro'u.
Huta Ana Mai a Jisas Kraest
(Luk 2:1-7)
18 Naani mamaani 'iniai huta ana mai a Jisas Kraest. 'Ia Meri inana Jisas, ra durua tanaa i mwane na atana 'ia Josep. Na'i na'o ma rarugu ha'iwai, ra sadoia do'a to'ora 'iniai mena anai Hi'ona Maea. 19 'Ia Josep nara duruduru tanaa 'anai waina Meri, 'e sae odo-odo. 'A 'adoma'inia do'ai horosiai duruduru ana ma ai'a raba haua beiai rongo raha, 'inia 'a ai'a raba ha'animaia Meri na'i maadaaui noni.
20 Na'i 'oha na wai'ado'ado mau suriai mahosi, 'e enjel ana God 'a ha'ata'i tanaa na'i mauru'aa. 'A o'ani 'inia, “Josep baaniai burungana Deved, 'oi abui ha'ata'aiai 'adoma'imu 'anai waina Meri. 'Inia ni rurua na haua 'iniai gare, 'a to'o 'iniai mena anai Hi'ona Maea. 21 Mana'i 'oha nai huta mai garesi, 'oi ha'a-atana 'inia Jisas,*Jisas: Ni 'ado'ado 'anai Jisas naasi “'Ia God 'ai ruhasigia.” 'inia 'iia 'ai ruhasiraaui sae ana'i baani'i ora-ora'a adaa'i.”
22 Naasi duruduru ana God 'a to'o ha'a-momori'a 'onaai taha na ha'ateenga'inia Araha God na'i ngoonai rarabea o'ani, 23 “'E gere urao na ai'a mauru goni mau beia ta mwane nai rurua, ma'ai ha'ahutaa ta gare mwane marai 'unua 'inia Imanuel. Ni 'ado'ado 'anai ata naasi, 'ia God 'a awa beigia.”†1:23 Aisaea 7:14; 8:8; 8:10
24 'Oha 'ia Josep 'a rarai baaniai mauru, 'a haua 'onaai 'unua anai enjel ana Araha God. 'A waina Meri, 25 ma'ata 'a ai'a mauru goni beia tari 'oha na ha'ahutaa i gare mwane ana. Mia Josep 'a ha'a-atana 'inia Jisas.