1 Ngo tomb ib mal menden imbi Tabiriyas kismil, ib mal aondao ngo wisao on teb so bor Njises obu wakl obun man pange baebenon el so oral pindib paesaol, obum ngub pindib paesao ka. 2 Simon Pita di, Tomas obu obun imbi mende Sango Wakl Mari kismil obu di, Nataniyel obu Kalili aol su Kena bor hakl ibisaol obu di, Seberin isi kab di, Njiseson man pange aol is kab mende di, mbini ngo baeben was ber mba hasmisa.*Njo 20:24; Njo 1:45-51

3 Ngo tomb Simon Pitam mbini aol aeben ngo ber mba hasmi nda baeben bor kakl, Ni ib wen ongon bu mukl pukl kisaol, mbinim obu bor kakl, Nao haru mbi ko pobur kismin mbinim ib taokaoll bor honda burubur wen ongon bismisa. Ngub bubur kismin mbinim bao somna ngon kongon buri ora bismi o ib wen is bombor ora di nao mismisa. 4 Ngo tomb hokloben wen nar pol bam ibisao tomb Njises obu ib mal ngon marel hasaol hindismi o, mbini Njiseson man pange aol nda baebenom obu Njises ora e ko nen nao sabismisa.*Njo 20:14 5 Ngub bismil Njisesom mbini bor kakl, Nas o hakl o, inim ib wen mendbor mu mariyem be? kisaol, mbinim obun angal ngon ko san lubur kakl, Is bombor ora di nao mu mari kismisa.*Luk 24:41 6 Ngub kismil Njisesom mbini bor wakl kakl, Inim ib wen ongon bu moroklme sao ngo ib taokaoll abon mende nan, ki tao nan o bor unu ib ndaon bor tu kobabur ib wen baoklmend mib kisesa. Ngub kisaol mbinim ib wen moroklme sao nda unu ib ndaon bor pen kismi tomb ib wen andub ora honda burubur kend aondao ora bisaol, mbinim ib wen ongon bu moroklme sao nda wakl men mukl buwaesmisa.*Luk 5:4-7 7 Ngub bismil Njiseson man pange aol is mend obum turi aondao ora himisao ndam Simon Pita bor kakl, Aol ngo obu Aorao Aondao e kisesa. Ngub kisaol Simon Pitam obun lab lab hakl kolo u mbabur wen ongon bi wisao o, aol ngo obu Aorao Aondao e kisao nda pangobur obun toklo and turub bi nda mu somaoklbir kisaon unu ibol bonge hasesa.*Mat 14:29; Njo 13:23 8 Ngub bisao tomb mbini Njiseson man pange aeben ngo hasmi nda baebenom ib taokaoll nda bor bao ber mba habur kismin, ib wen moroklme sao nda taokaoll ngon kungni ma non eben munu soklo taokl ibismisa. Ngub bismi o ib mal ngon mare enderael inj, teb sol ora win hasmisa.

9 Ngo tomb mbinim ib ngon marel po pindib pabur hindismil, is mend ngol do hasao ndal ib wen mend ngol her mba hasaol hindismi tomb palawe di mend wisaol hindismisa. 10 Ngub disaol hindismi tomb Njisesom mbini bor kakl, Inim ib wen ngo ngubi tomb maemndan mendbor haremin mini ubuklub kisesa. 11 Ngub kisaol Simon Pitam ib taokaoll ndan bongeyabur, ib wen ongon bu moroklme sao nda enjo ib mare nan eben munu sokl misesa. Ngub bisaol ib wen aondao was andub ora 153 oran wen moroklme sao ngo bor tumbi ha wisao o, wen moroklme sao ngo di ib wen aondao ngo birisao saon kend tiril kaollu bowes bu menjao nao bisesa.*Luk 5:6 12 Ngo tomb Njisesom ngub kobur kakl, Inim ne nokl ubuklub kisesa. Ngub kisao o mbinim obu Aorao Aondao e ko ora hindismil, mbinim burir biyubur mondom nje aeb ora hael ko ne mu di menjao nao bismisa. 13 Ngo tomb Njisesom palawe nda mubur kisaon obun man pange aol nda baeben nen taol bu kalobur, obun ib wen nda hakl di bombor ngo bisao ub was bisesa.*Njo 6:11

14 Ngub bisaol Njisesom ngub ngo bisao o, Njises obu pe paen lismi nda obun maol bor wakl enjaokl pobur pibnao ko kab mend mbes obun man pange baeben el sol obo pindib paesao o, ngo ne taol bu kalisao om ko tebo nan sisesa.*Njo 20:19; Njo 20:26

15 Ngo tomb mbinim ne nda nao paesmi tomb Njisesom Simon Pita bor kakl, Njonon isi Simon Pita o, aol ngo hayem baebenom ni turi homo kone woroklme ub men mbabur, njem nil aondao bu ora kone u hael be? kisesa. Ngub kisaol Pitam kakl, Aorao Aondao o, heneng ora njem di ora hendel ub nim njel kone u turi aondao ora homo haruklu kisesa. Ngub kisaol Njisesom Pita bor kakl, Njem mbini nao some sib hondbao non bi hayem baeben maeb ha, ne taol bu kalo haebe ora kisesa.*Mat 26:33; Njo 1:42 16 Ngub kobur Njisesom Pita bor ko mende kao kalobur kakl, Njonon isi Simon Pita o, njem nil kone u harili be? inj kisesa. Ngub kisaol Pitam kakl, Aorao Aondao o, e ka. Njem di ora hendel ub nim nje turi homo kone u ora haruklu kisesa. Ngub kisaol Njisesom Pita obu bor kakl, Njem nao some sib non bi baeben maeb ha, ne taol bu kalo haebe kisesa.*Bis 20:28 17 Ngub kobur Njisesom wakl Pita bor ko tebo kao kalobur kakl, Njonon isi Simon Pita o, njem nil kone u harili be? inj kisesa. Ngo tomb Njisesom Pita obu bor njem ni turi homale be? ko, ko teb ngub ne misaol, Pita obun kone bor kho so kend aondao ora bisaol obum Njises bor kakl, Aorao Aondao o, njem hambun sao ora hendel ol, nim njel kone uruklu ub di ora hendel kisesa. Ngub kisaol Njisesom Pita obu bor wakl kakl, Njem nao some sib non bi baeben maeb ha ne taol bu kalo haebe ora kisesa.*Njo 13:38; Njo 16:30

18 Njisesom ngub kobur kakl, Nim nje bor heneng ora kao njurukl, mbes nje nas hasi tomb njen mbib njen hakl munu kere mba samobur, harer njem turi homo pokl bele on paokl was pili nda o, mabor nje aol kon wi ora sam sam buklesi tomb njen ki dundukl beklesil, aol mondom njen ki kab munu tanga pabur, obum nje harer tangar mende njem turi homo pokl ko nen nao saboklesi on kemi poklao ora kisesa.*2 Pit 1:14 19 Ngub kisaol Njisesom angal ngo kisao o mabor Pita obum Ngaoron imbi aondao bu ora win kobur homoklao bor kisaol, Njises obum ngo buklao sao menger mubur angal ngo kisao ora. Njisesom ngub kobur Pita bor kakl, Njem ni taol mi ib kisesa.*Mat 16:24-25; Mak 1:17; Njo 13:36

20 Ngo tomb Pitam obun mesao nan baol munubur hindisaol, man pange aol mend Njisesom turi aondao ora himisao nda, mbibin mama mbibi taol mi ibisaol hindisesa. Ngub taol mi ibisao o, Njiseson man pange aol ngo obu mbinim mbes ne no birismi tomb obu Njises hesa bomborol ne no burubur kisaon, obum Njises bor ne wi aeben sabur, Aorao Aondao o nje aebom ora ngub karu luklao bor kal? kisao nda obu sisesa.*Njo 13:23-25 21 Ngo tomb Pitam ngub hondobur Njises bor kakl, Aorao Aondao o, njem aol ngo ebe o obu asub buklao ko nen sobal? kisesa. 22 Ngub kisaol Njisesom Pita bor kakl, Nim obu ngub bao haen was wakl oba sin, njen menjao yaol kal be? Aoh, njen menjao mend inj ngao, njem ni taol mi ib ora kisesa. 23 Ngub kisaol Njisesom obun man pange aol ngo obum turi aondao ora himisao nda bor angal ngo kisao ub, mendborom kam aeben aeben bismil mbini Njiseson man pange tenaol aeben o birismi baebenom ngub pangismi. Njisesom obun man pange aol obum turi aondao ora homaoklao ngo obu nao homoklao ora kene ke pangam aeben aeben bismi. Ngub bismi o Njisesom angal ngo obun man pange aol obum turi aondao ora himisao ngo nao homoklao kobur inj kisao ka. Ngub inj, obum nao man pange aol ngo obu bao haen was ni wakl oba sin, njen menjao mend inj kobur kisao.

24 Njises obun man pange aol obum turi aondao ora himisao ngo obum Njisesom hambun sao ngo bu hasao sao baeben tenaol hambunom pangen kao kalo habur, mbuk ngo di obum ora waeb bu wisao. Ngub ora bisaol obum angal hambun sao ngo kao dund bu hae sao baeben di, heneng ora ko hae ko naom ora hendeyom ka.*Njo 19:35

25 Heneng ora Njisesom tangar tangar hambun sao bu hasao sao baeben di arman andub ora wiyaol, mondom Njises obum hambun sao ngo bu hasao sao baeben waeb buklwao ko panga sin, obum mbuk andub ora waeb bu uklao ka. Ngub buklao o su andub ora nao wi ol, mbuk ngo baeben baehaemen haonao ora u haklao ko pangakl ko Njonom ngub waeb bu wisesa.*Njo 20:30