Pauluse eni Sulate Nomore Lua ete Jemate Toini me Kota Tesalonika
Lepate Menai
Meije Pauluse eni sulate nomore lua ete jemate toini me kota Tesalonikare.
Jemate toini me kota Tesalonikare hkutukesi kai kaplalesi le esi nati mise mosa be Kristuse iluake suike lomei nusare petu ila kai elia. Ele mere hoko Pauluse inatue sulate memenaije etesi. Po esi noake boka sa hoko inatue sulate suike eteise meije.
Leini esi beteke be Kristuse Iluake suike peneka. Pauluse iombe esi beteke mere tinai mo. Le kena Tuhane Iluake suike lomei nusa mosare neune mei nusare tapa ktili tinaije neka. Neune mere ile sae ikbasaele rebe ibroka kai Kristuse. Ile mere tamata neune titinai.
Iahnau jemate toini me Tesalonika leke esi maka hlaleke etapa ktili kai masike esi supu susate po suke tahane neka.
Pauluse iahnausi leke esi kerike loko esi makerike kena esi supu manane kai yelu ete luma toini lupe Pauluse kai eni ebea rebe kerike sakesa kaine. Kai iahnausi leke esi ono misete rame.
Isi
1. Hlamate (1:1-2)
2. Pauluse ikotie terima kasi ete Tuhane le jemate toini me Tesalonikare kai iakbere laleisu leke masike esi supu aniaya po esi hlaleke loko Tuhane rame (1:3-12)
3. Iatetukesi loko saisa rebe eono ke Tuhane Yesuse Iluake suike (2:1-17)
4. Ikotie jemate toini me Tesolonikare esi kotie loko Alla etei kai iahnausi leke esi noso yake (3:1-15)
5. Hlamate mulini (3:16-18)
1
Hlamate
1:1-2
Kwali betaya imi,
Au Pauluse, au leki sulate meije ete imi jemate toini kota Tesalonika. Imire iteki Alla Amate Eni tamata kai Tuhane Yesuse Kristuse Eni tamata. Siliwanuse kai Timotiuse lekwe esi mei sakesa kai au, luasi beteke hlamate etemi lekwe. Ami kotie loko Alla Amate kai iteki Tuhane Yesuse Kristuse ete imi be imi supu misete elake kai lalemi ndene noma.
Alla Iteu pakala ete tamata kena Kristuse Iluake suike
1:3-12
Kwali betaya imi, suke ami kotie trima kasi bei Alla le imi rame. Kai tinai, suke ami kotie trima kasi, le imi tapa hlaleke ktili loko Kristuse kai imi li loko lomaije tapa rame. Hoko kena ami keu loko Alla Eni jemata toini maketaru ami lalema ela titinai kena alenake imi etesi be masike imi supu susate eti supu teta rame kai supu susate rame po imi tahane kai hlaleke ktili loko Kristuse rame.
Imi tahane kai hlaleke lokoI kena supu susate meije le imire Eni tamata. Mere aseluke ete ite tinai be Alla Iteu pakala ete pusue tamatare nkena. Mere, Ibeteke be Iholmate imi kena imi kusu otoi rebe Alla Ipletae ite tamatare kena ruaI Eni kbasa. Alla Iono susate ete sie rebe esi ono susate ete imire. Le Alla Iono sasaisare nkena. Kai Alla Iono imi rebe meije imi supu susate supu misete, leke imi supu susate sasaisa moneka kai ami supu susate sasaisa more neka. Mere eono kena Tuhane Yesuse Irulu bei ndete surga sakesa kai Eni malekata rebe esi kbasa elake kai Iaseluke ruaI kena auwe klitini. Irulu kena Ihukume tamata rebe rekwa Alla mo kai rebe lene loko Sou Misete kena iteki Tuhane Yesuse more. Tamata meru esi supu hukumane elake titinai eti pela lulu esi ono neunaru. Esi supu susate eti pelare esi supu sui lau bei Tuhane oaIje eti pela, kai esi blake Eni kbasa elake moneka. 10 Kena Iluake suike, kena petu misete mere Eni tamataru pususi isikeNi kai pusue tamata rebe hlaleke lokoIje esi beteke herane. Kai imi sakesa kai tamata meru lekwe le imi hlaleke loko sou rebe ami lepaele ete imire pe.
11 Hoko ami kotie loko Alla le imi rame. Ami kotie be, “Amate, Aono esi atate mise. Kena mere Akotisi. Aono esi ktili kena hidupe lulu sasaisa rebe Asukare noma. Aono esi ktili kena esi ono misete le esi hlaleke loko Yesuse Kristuse.” 12 Ami kotie loko Alla ele mere leke imi isike iteki Tuhane Yesuse kai Iono sisi isike imi lekwe. Le iteki Alla kai Tuhane Yesuse Kristuse Iriluke misete elake ete imi.